૮. બીજગામસુત્તવણ્ણના

૧૧૪૮. ‘‘મૂલબીજ’’ન્તિઆદીસુ મૂલમેવ બીજન્તિ મૂલબીજં, મૂલબીજં એતસ્સાતિપિ મૂલબીજં. તત્થ પુરિમેન બીજગામો વુત્તો ‘‘બીજાનં સમૂહો’’તિ કત્વા, દુતિયેન ભૂતગામો. દુવિધોપેસો સામઞ્ઞનિદ્દેસેન, ‘‘મૂલબીજઞ્ચ મૂલબીજઞ્ચ મૂલબીજ’’ન્તિ એકસેસનયેન વા બીજત્થો વેદિતબ્બો. એસ નયો સેસેસુપિ. ફળુબીજન્તિ પબ્બબીજં. બાહિરપચ્ચયન્તરસમવાયે સદિસફલુપ્પત્તિયા વિસેસકારણભાવતો વિરુહનસમત્થે સારફલે નિરુળ્હો બીજ-સદ્દો. તદત્થસિદ્ધિયા મૂલાદીસુપિ કેસુચિ પવત્તતીતિ તતો નિવત્તનત્થં એકેન બીજ-સદ્દેન વિસેસેત્વા વુત્તં ‘‘બીજબીજ’’ન્તિ ‘‘રૂપરૂપં, દુક્ખદુક્ખ’’ન્તિ (સં. નિ. ૪.૩૨૭) ચ યથા. નીલતિણરુક્ખાદિકસ્સાતિ અલ્લતિણસ્સ ચેવ અલ્લરુક્ખાદિકસ્સ ચ. આદિ-સદ્દેન ઓસધિગચ્છલતાદીનં ગહણં.