૩. પેસલસુત્તવણ્ણના

૨૧૧. એતેસન્તિ એતેસં મહલ્લકાનં. ન પાળિ આગચ્છતિ અપ્પગુણભાવતો. ન ચ પાળિ ઉપટ્ઠાતિ, એકાય પાળિયા સતિ પાળિગતિયા તથા તથા ઉપટ્ઠાનમ્પિ નેસં નત્થીતિ વદતિ. ન અટ્ઠકથાતિ એત્થાપિ એસેવ નયો. સિથિલધનિતાદિતંતંબ્યઞ્જનબુદ્ધિં અહાપેત્વા ઉચ્ચારણં પદબ્યઞ્જનમધુરતા. અતિક્કમિત્વા મઞ્ઞતિ અઞ્ઞે ભિક્ખૂ. હીળનવસેન અભિભવિત્વા પટિભાનસુતેન અત્તાનં પસંસતિ સમ્ભાવેતિ. માનસ્સ પવત્તિતાય સહજાતનિસ્સયાદિપચ્ચયધમ્મા તંસહભુધમ્મા. માનવસેન વિપ્પટિસારી અહુવા. મા અહોસીતિ યોજના. વણ્ણભણનન્તિ પરેહિ કિરિયમાનં ગુણાભિત્થવં. અખિલોતિ પઞ્ચચેતોખિલરહિતો. નિસ્સેસં નવવિધન્તિ નવવિધમ્પિ માનં કસ્સચિ એકદેસસ્સપિ અસેસતો. વિજ્જાયાતિ અગ્ગમગ્ગવિજ્જાય. અચ્ચન્તમેવ સમિતતાય વૂપસમિતતાય સમિતાવી.

પેસલસુત્તવણ્ણના નિટ્ઠિતા.