૭. બ્રાહ્મણસંયુત્તં

૧. અરહન્તવગ્ગો

૧. ધનઞ્જાનીસુત્તવણ્ણના

૧૮૭. ધનઞ્જાનિગોત્તાતિ એત્થ પુબ્બપુરિસતો આગતસ્સ કુલવંસસ્સ નામાભિધાનસઙ્ખાતં ગં તાયતીતિ ગોત્તં. (કિં પન તન્તિ? અઞ્ઞકુલપરમ્પરાસાધારણં તસ્સ કુલસ્સ આદિપુરિસસમુદાગતં તંકુલપરિયાપન્નસાધારણં સામઞ્ઞરૂપન્તિ દટ્ઠબ્બં.) ધનઞ્જાનિગોત્તં એતિસ્સન્તિ ધનઞ્જાનિગોત્તા. તસ્સા ઉદાનસ્સ કારણં પુચ્છિત્વા આદિતો પટ્ઠાય વિભાવેતું ‘‘સો કિરા’’તિઆદિ વુત્તં. નાનારસભોજનં દેતીતિ યોજના. પઞ્ચગોરસસમ્પાદિતં સાલિભત્તં સૂપસાકબ્યઞ્જનં નાનારસં બ્રાહ્મણભોજનં. મણ્ડલગ્ગખગ્ગન્તિ મણ્ડલગ્ગસઙ્ખાતં ખગ્ગં. દુવિધો હિ ખગ્ગો મણ્ડલગ્ગો દીઘગ્ગોતિ. તત્થ યસ્સ અગ્ગો મણ્ડલાકારેન ઠિતો, સો મણ્ડલગ્ગો. યસ્સ પન અસિપુત્તિકા વિય દીઘો, સો દીઘગ્ગો.

સાસનાતિ અનુસાસના. ‘‘નમો…પે… સમ્બુદ્ધસ્સા’’તિ એવં વુત્તા પઞ્ચપદિકગાથા. સત્થુસાસને હિ લોકિયચ્છન્દં અનપેક્ખિત્વા એસા પઞ્ચપદિકગાથાતિ દટ્ઠબ્બા. ઓક્કાવરધરાતિ પુબ્બપુરિસસઙ્ખાતઉક્કાકવંસવરધારિકા. સક્કાતિ સક્કુણેય્યં.

એવન્તિ ‘‘સચે મે અઙ્ગમઙ્ગાની’’તિઆદિના ઇમિના પકારેન. ‘‘પઞ્ચ ગાથાસતાનિ પન અટ્ઠકથં આરુળ્હાનિ, ઇધ પન દ્વે એવ ઉદ્ધટા’’તિ વદન્તિ. પહરિતું વાતિ એકવારમ્પિ હત્થેન વા પાદેન વા પહરિતુમ્પિ પરામસિતુમ્પિ અસક્કોન્તોતિ અત્થો. સો હિ તસ્સા અરિયસાવિકાય આનુભાવેન અત્તનો સામત્થિયેન વસે વત્તાપનત્થં સન્તજ્જિત્વાપિ તદનુવત્તન્તો નિબ્બિસો અહોસિ. તેનાહ ‘‘ભોતી’’તિઆદિ.

તસ્સ બ્રાહ્મણસ્સાતિ અત્તનો સામિકબ્રાહ્મણસ્સ. ઉપસંહરન્તીતિ ઉપનેન્તી. તસ્મિં સમયેતિ તસ્મિં દુક્ખુપ્પત્તિકાલે ‘‘સબ્બે સઙ્ખારા દુક્ખા’’તિ ભગવતો વચનં અનુસ્સરિત્વા ‘‘દસબલસ્સ ભગવતો’’તિઆદીસુ યથાપરિચિતં ગુણપદં અનુસ્સરિ. તેનાહ ‘‘દસબલં સરી’’તિ.

ખન્તિસોરચ્ચરહિતતાય કુજ્ઝિત્વા. ભિજ્જિત્વાતિ સંયતાભાવતો તસ્સ બ્રાહ્મણસ્સ અન્તરે મેત્તિભેદેન ભિજ્જિત્વા. એવમેવાતિ યથા એતરહિ અકારણેન, એવમેવ અઞ્ઞદાપિ અકારણેનાતિ અત્થો. નિક્કારણતાદીપને એવં-સદ્દો, એવ-સદ્દો પન અવધારણત્થો. નિક્કારણતા ચ નામ નિરત્થકતા, નિરત્થકવિપ્પલાપભાવેનેત્થ એવં-સદ્દસ્સ ગહણે પવત્તિ ગવેસિતબ્બા. ગરહત્થો વાયં એવં-સદ્દો અનેકત્થત્તા નિપાતાનં. ગરહત્થતા ચસ્સ વસલિસદ્દસન્નિધાનતો પાકટા એવ.

ગામનિગમરટ્ઠપૂજિતોતિ ઇમિના ગામનિગમરટ્ઠસામિકેહિ પૂજિતભાવો દીપિતો ગામાદીનં તેસં વસે વત્તનતો. અસુકસ્સ નામ પુગ્ગલસ્સ. સેસન્તિ અભિક્કન્તન્તિઆદિ, યમ્પિ ચઞ્ઞં ઇધાગતં હેટ્ઠા વણ્ણિતઞ્ચ.

ધનઞ્જાનીસુત્તવણ્ણના નિટ્ઠિતા.

૨. અક્કોસસુત્તવણ્ણના

૧૮૮. ભારદ્વાજોવ સોતિ ભારદ્વાજો નામ એવ સો બ્રાહ્મણો. ગોત્તવસેન હિ તયિદં નામં, વિસેસેન પનેતં જાતન્તિ દસ્સેતું ‘‘પઞ્ચમત્તેહી’’તિઆદિ વુત્તં. જાનિકતાતિ ઞાતિવગ્ગહાનિકતા. પક્ખો ભિન્નોતિ તતો એવ ઞાતિપક્ખો નટ્ઠો. યથા દોમનસ્સિતો અનત્તમનોતિ વત્તબ્બં લભતિ, એવં કુપિતોતિ આહ ‘‘દોમનસ્સેન ચા’’તિ. દસહીતિ અનવસેસપરિયાદાનવસેન વુત્તં પઞ્ચહિ ગાથાસતેહિ અક્કોસન્તો તથા અક્કોસેય્યાતિ કત્વા. તત્થ પન યેન કેનચિ અક્કોસન્તોપિ અક્કોસતિયેવ નામ. કરોસિ મમ ભાતિકસ્સ પબ્બજ્જં.

સમ્ભુઞ્જતીતિ સમ્ભોગં કરોતિ. અક્કોસાદીહિ એકતો ભુઞ્જતિ. વીતિહરતીતિ બ્યતિહારં કરોતિ, અક્કોસતો પચ્ચક્કોસનાદિના વિનિમયં કરોતીતિ અત્થો. તેનાહ ‘‘કતસ્સ પટિકારં કરોતી’’તિ. અસ્સ અનુસ્સવવસેન સુત્વા ‘‘સપતિ મ’’ન્તિ સઞ્ઞિનો ભયં ઉપ્પજ્જીતિ યોજના. અસ્સાતિ બ્રાહ્મણસ્સ. સુત્વાતિ પદં ઉભયત્થાપિ યોજેતબ્બં ‘‘તવેવેતં બ્રાહ્મણાતિ સુત્વા, અનુસ્સવવસેન સુત્વા’’તિ ચ. કામં કિસવચ્છાદયો સપનં નાદંસુ, દેવતાનંયેવ હિ સો અત્થો, સત્તાનં પન તથા સઞ્ઞા ઉપ્પન્ના, સોપિ તથાસઞ્ઞી અહોસિ. તેનાહ ‘‘અનુસ્સવવસેના’’તિ.

દન્તસ્સ સબ્બસો દમથં ઉપગતત્તા. નિબ્બિસેવનસ્સાતિ રાગદોસાદિહેતુકવિપ્ફન્દનરહિતસ્સ. તસ્સેવાતિ પટિકુજ્ઝન્તસ્સેવ પુગ્ગલસ્સ તેન કોધેન પાપં હોતિ પાપસ્સ સન્તાનન્તરસઙ્કન્તિયા અભાવતો. કેચિ પન ‘‘તસ્સેવાતિ તસ્સેવ પટિકુજ્ઝન્તપુરિસસ્સ તેન પટિકુજ્ઝનેન. પાપિયોતિ પટિકુજ્ઝન્તપુગ્ગલસ્સ લામકતરો’’તિ એવમેત્થ અત્થં વદન્તિ. સતિયા સમન્નાગતો હુત્વા પટિસઙ્ખાને ઠિતો અધિવાસેતિ, ન સહો મૂળ્હો હુત્વાતિ અધિપ્પાયો. ઉભિન્નં તિકિચ્છન્તન્તિ ઉભિન્નં ઉપ્પન્નકોધસઙ્ખાતં કિલેસબ્યાધિં તિકિચ્છન્તં વૂપસમેન્તં તં પુગ્ગલં. યો પુગ્ગલોતિઆદિના પુરિમાસુ ગાથાસુ પવત્તિતાનિ પદાનિ સમ્બન્ધિત્વા દસ્સેતિ. પઞ્ચસુ ખન્ધેસુ યાથાવતો વિનીતા અરિયધમ્મસ્સ કોવિદા નામ હોન્તીતિ આહ ‘‘ધમ્મસ્સાતિ પઞ્ચક્ખન્ધધમ્મસ્સા’’તિ. ઇદાનિ તમત્થં પરિપુણ્ણં કત્વા દસ્સેન્તો આહ ‘‘ચતુસચ્ચધમ્મસ્સ વા’’તિ.

અક્કોસસુત્તવણ્ણના નિટ્ઠિતા.

૩. અસુરિન્દકસુત્તવણ્ણના

૧૮૯. તેનેવાતિ ભાતુપબ્બજિતેનેવ. અસ્સેવાતિ તિતિક્ખસ્સ. ‘‘તં જયં હોતી’’તિ લિઙ્ગવિપલ્લાસવસેન વુત્તન્તિ આહ ‘‘સો જયો હોતી’’તિ, દુજ્જયં કોધં તિતિક્ખાય જિનન્તસ્સાતિ અધિપ્પાયો. યસ્મા તિતિક્ખાદયો ન કોધવસિકં ધુરં, તં પન બાલાનં મઞ્ઞનામત્તન્તિ ઇધ ઇમમત્થં વિભાવેતું ‘‘કતમસ્સા’’તિઆદિ વુત્તં. વિજાનતોવ જયો ન અવિજાનતો તિતિક્ખાય અભાવતો. ન હિ અવિજાનન્તો અન્ધબાલો કોધં વિજેતું સક્કોતિ. કેવલં જયં મઞ્ઞતિ કિલેસેહિ પરાજિતો સમાનોપીતિ અધિપ્પાયો.

અસુરિન્દકસુત્તવણ્ણના નિટ્ઠિતા.

૪. બિલઙ્ગિકસુત્તવણ્ણના

૧૯૦. સુદ્ધન્તિ કેવલં સમ્ભારવિરહિતં. સમ્ભારયુત્તન્તિ કટુકભણ્ડાદિસમ્ભારસહિતં. કઞ્જિતો નિબ્બત્તત્તા કઞ્જિકં, આરનાલં, બિલઙ્ગન્તિ અત્થો. નામં ગહિતં સઙ્ગીતિકાલે ‘‘બિલઙ્ગિકભારદ્વાજો’’તિ વિસેસનવસેન. તયોતિ ધનઞ્જાનિયા સામિકો ભારદ્વાજો, અક્કોસકભારદ્વાજો, અસુન્દરિકભારદ્વાજોતિ આદિતો તીસુ સુત્તેસુ આગતા તયો. મેતિ મય્હં.

બિલઙ્ગિકસુત્તવણ્ણના નિટ્ઠિતા.

૫. અહિંસકસુત્તવણ્ણના

૧૯૧. એસાતિ બ્રાહ્મણો. ‘‘અહિંસકો અહ’’ન્તિ તદત્થં સાધેતું ઇચ્છાય કથેસીતિ વુત્તં ‘‘અહિંસકપઞ્હં પુચ્છી’’તિ. તથા ચે અસ્સાતિ યથા તે નામસ્સ અત્થો, તથા ચેતં ભવેય્યાસિ અન્વત્થનામકો ભવેય્યાસિ અહિંસકો એવ સિયાતિ. ન દુક્ખાપેતિ દુક્ખમત્તમ્પિ ન ઉપ્પાદેતિ, દુક્ખતો અપનેતીતિ અત્થો.

અહિંસકસુત્તવણ્ણના નિટ્ઠિતા.

૬. જટાસુત્તવણ્ણના

૧૯૨. જટાપઞ્હસ્સાતિ ‘‘અન્તોજટા બહિજટા’’તિ એવં જટાપરિયાયસ્સ પઞ્હસ્સ.

જટાસુત્તવણ્ણના નિટ્ઠિતા.

૭. સુદ્ધિકસુત્તવણ્ણના

૧૯૩. સુદ્ધિકપઞ્હસ્સાતિ ‘‘નાબ્રાહ્મણો સુજ્ઝતી’’તિ એવં સુદ્ધસન્નિસ્સિતસ્સ પઞ્હસ્સ. સીલસમ્પન્નોતિ પઞ્ચવિધનિયમલક્ખણેન સીલેન સમન્નાગતો. તપોકમ્મન્તિ અનસનપઞ્ચાતપતપ્પનાદિપરિભેદનતપોકમ્મં કરોન્તોપિ. વિજ્જાતિ તયો વેદાતિ વદન્તિ ‘‘તાય ઇધલોકત્થં પરલોકત્થં ઞાયન્તી’’તિ કત્વા. ગોત્તચરણન્તિ ગોત્તસઙ્ખાતં ચરણં. બ્રાહ્મણો સુજ્ઝતિ જેટ્ઠજાતિકત્તા. તથા હિ સો એવ તપં આચરિતું લભતિ, ન ઇતરો. અઞ્ઞા લામિકા પજાતિ ઇતરવણ્ણં વદતિ. વચનસહસ્સમ્પીતિ ગાથાનેકસહસ્સમ્પિ. અન્તો કિલેસેહિ પૂતિકો સભાવેન પૂતિકો. કિલિટ્ઠેહિ કાયકમ્માદીહિ કાયદુચ્ચરિતાદીહિ.

સુદ્ધિકસુત્તવણ્ણના નિટ્ઠિતા.

૮. અગ્ગિકસુત્તવણ્ણના

૧૯૪. અગ્ગિપરિચરણવસેનાતિ અગ્ગિહુત્તજુહનવસેન. સન્નિહિતોતિ મિસ્સીભાવં સમ્પાપિતો. તથાભૂતો ચ સો સપ્પિના સદ્ધિં યોજિતો નામ હોતીતિ આહ ‘‘સંયોજિતો’’તિ. અપાયમગ્ગં ઓક્કમતિ મિચ્છાદિટ્ઠિમિચ્છાસઙ્કપ્પાદીનં અત્તનો સન્તાને સમુપ્પાદનતો. તેનાહ ‘‘ઇમં લદ્ધિ’’ન્તિઆદિ.

જાતિયાતિ સદોસકિરિયાપરાધસ્સ અસમ્ભવેન પરિસુદ્ધાય જાતિયા. નાનપ્પકારે અટ્ઠારસવિજ્જાટ્ઠાનસઞ્ઞિતે ગન્થે. સુતવાતિ સુત્વા નિટ્ઠં પત્તો અગ્ગદક્ખિણેય્યત્તાતિ અધિપ્પાયો.

પુબ્બેનિવાસઞાણેનાતિ ઇદં લોકે સાસને ચ નિરુળ્હતાવસેન વુત્તં. અઞ્ઞે હિ પુબ્બેનિવાસં જાનન્તા પુબ્બેનિવાસઞાણેનેવ જાનન્તિ, ભગવા પન સબ્બઞ્ઞુતઞ્ઞાણેનપિ જાનાતિ. દિબ્બેન ચક્ખુનાતિ એત્થાપિ એસેવ નયો. સબ્બસો જાતિ ખીયતિ એતેનાતિ જાતિક્ખયો, અગ્ગમગ્ગો, તેન પત્તબ્બત્તા આપન્નત્તા ચ જાતિક્ખયો અરહત્તં. જાનિત્વા વોસિતવોસાનોતિ વિજાનિતબ્બં ચતુસચ્ચધમ્મં મગ્ગઞાણેન જાનિત્વા સોળસન્નમ્પિ કિચ્ચાનં વોસિતવોસાનો.

ઉપ્પત્તિં દીપેત્વાતિ પાયસદાનસ્સ આગમનં પકાસેત્વા. ગાથાહિ અભિગીતન્તિ દ્વીહિ ગાથાહિ મયા અભિગીતં. અભુઞ્જિતબ્બન્તિ ભુઞ્જિતું ન યુત્તં. ‘‘અભોજનેય્ય’’ન્તિ કસ્મા વુત્તં, નનુ ભગવતો અજ્ઝાસયો અચ્ચન્તમેવ સુદ્ધોતિ? સચ્ચમેતં, બ્રાહ્મણો પન પુબ્બે અદાતુકામો પચ્છા ગાથા સુત્વા ધમ્મદેસનાય મુદુહદયો હુત્વા દાતુકામો અહોસિ, તસ્મા તં ભિક્ખૂનં અનાગતે દિટ્ઠાનુગતિઆપજ્જનત્થં પટિક્ખિપિ. તથા હિ અનન્તરસુત્તે કસિભારદ્વાજસુત્તે ચ એવમેવ પટિપજ્જિ. તેનાહ ‘‘ત્વં બ્રાહ્મણા’’તિઆદિ. કિલઞ્જમ્હિ…પે… પકાસિતાતિ એતેન ગાથં ઉદ્દેસટ્ઠાનેવ ઠપેત્વા ભગવા બ્રાહ્મણસ્સ વિત્થારેન ધમ્મં દેસેસીતિ દસ્સેતિ. ગાયનેનાતિ ગાયનકેન, ગાનેન વા. અત્થઞ્ચ ધમ્મઞ્ચાતિ સદેવકસ્સ લોકસ્સ હિતઞ્ચેવ તસ્સ કારણઞ્ચ. સમ્પસ્સન્તાનન્તિ સમ્મદેવ પસ્સન્તાનં. ધમ્મોતિ પવેણિઆગતો ચારિત્તધમ્મો ન હોતિ. ભોજનેસુ ઉક્કંસગતં દસ્સેતું ‘‘સુધાભોજન’’ન્તિ આહ. ધમ્મે સતીતિ અરિયાનં આચારધમ્મે સતિ તં આલમ્બિત્વા જીવન્તાનં એતદેવ સેટ્ઠન્તિ ‘‘સોમં ભુઞ્જેય્ય પાયસ’’ન્તિ તં આરબ્ભ કથાય ઉપ્પન્નત્તા.

સલ્લક્ખેતિ અયં બ્રાહ્મણો. સેસા પચ્ચયા નિદ્દોસા તે આરબ્ભ કથાય અપ્પવત્તિતત્તા. કુક્કુચ્ચવૂપસન્તન્તિ અગ્ગિઆહિતપદસ્સ વિય સદ્દસિદ્ધિ વેદિતબ્બા. અન્નેન પાનેનાતિ લક્ખણવચનમેતં યથા ‘‘કાકેહિ સપ્પિ રક્ખિતબ્બ’’ન્તિ. તેનાહ ‘‘દેસનામત્તમેત’’ન્તિ. બહુસસ્સફલદાયકં સુખેત્તં વિય પટિયત્તન્તિ સમ્મા કસનબીજનઉદકાનયનાપનયનાદિના સુસજ્જિતં ખેત્તં વિય સીલાદિગુણવિસેસસમ્પાદનેન પટિયત્તં પુઞ્ઞક્ખેત્તં એતં.

અગ્ગિકસુત્તવણ્ણના નિટ્ઠિતા.

૯. સુન્દરિકસુત્તવણ્ણના

૧૯૫. આનેત્વા હુનિતબ્બતો આહુતિ. સપ્પિમધુપાયસાદીહિ અગ્ગિં જુહોતિ એત્થાતિ અગ્ગિહુત્તં, સાધિટ્ઠાનં વેદિતબ્બં. તેનાહ ‘‘અગ્યાયતન’’ન્તિઆદિ. સુવિસોધિતો ચસ્સાતિ નિહીનજાતિકાનં અનેન સુટ્ઠુ વિસોધિતો ચ ભવેય્ય. ‘‘મે’’તિ પદં આનેત્વા સમ્બન્ધો.

અફલં કરોતીતિ ઇતો પટ્ઠાય યાવ દેમીતિ પદં. તાવ અનન્તરસુત્તવણ્ણનાય આગતસદિસમેવાતિ પેય્યાલવસેન ઠપેસિ, ન સપ્પિસઙ્ખારટ્ઠપનં. હિમપાતસ્સ ચ સીતવાતસ્સ ચ પટિબાહનત્થન્તિ અકારણમેતન્તિ તં અનાદિયિત્વા અઞ્ઞમેવ સુકારણં દસ્સેતું ‘‘પટિબલોવા’’તિઆદિ વુત્તં. સઞ્જાનિત્વાતિ ‘‘નાયં બ્રાહ્મણો’’તિ સઞ્જાનિત્વા.

નીચકેસન્તન્તિ રસ્સકેસન્તં. બ્રાહ્મણાનં સુદ્ધિઅત્થા સિખાતિ આહ ‘‘પવત્તમત્તમ્પિ, સિખં અદિસ્વા’’તિ, ‘‘પરમહંસપરિક્ખાદિના’’તિ કેચિ.

અકારણં દક્ખિણેય્યભાવસ્સ જાતિ અદક્ખિણેય્યભાવહેતૂનં પાપધમ્માનં અપટિક્ખેપભાવતો. એતન્તિ સીલાદિભેદં ચરણં. દક્ખિણેય્યભાવસ્સ કારણં અદક્ખિણેય્યભાવકારકપાપધમ્માનં તદઙ્ગાદિવસેન પજહનતો. અસ્સાતિ બ્રાહ્મણસ્સ. તમત્થન્તિ તં દક્ખિણેય્યભાવસ્સ કારણતાસઙ્ખાતમત્થં ઉપમાય વિભાવેન્તો. સાલાદિકટ્ઠા જાતોવાતિ સાલાદિવિસુદ્ધકટ્ઠાવ જાતો. સાપાનદોણિઆદિઅવિસુદ્ધકટ્ઠા જાતો અગ્ગિકિચ્ચં ન ચ ન કરોતિ. એવન્તિ યથા અગ્ગિ યતો કુતોચિ જાતોપિ અગ્ગિકિચ્ચં કરોતિયેવ, એવં ચણ્ડાલકુલાદીસુ જાતોપિ દક્ખિણેય્યો ન ન હોતિ ગુણસમ્પદાવસેન અરિયાનં વંસે પજાતત્તાતિ આહ ‘‘ગુણસમ્પત્તિયા જાતિમા’’તિ. ધિતિયા ગુણસમ્પત્તિયા પમુખભાવં દસ્સેતું ‘‘સો હી’’તિઆદિ વુત્તં. તત્થ ધિતિયાતિ વીરિયેન. તઞ્હિ અનુપ્પન્નાનં કુસલધમ્માનં ઉપ્પાદનપરિબ્રૂહનેહિ તે ધારેતિ. હિરિયા દોસે નિસેધેતિ, સમ્મદેવ પાપાનં જિગુચ્છને સતિ તેસં પવત્તિયા અવસરો એવ નત્થિ. મોનધમ્મેન ઞાણસઙ્ખાતેન ઓત્તપ્પધમ્મેન. કારણાકારણજાનનકોતિ તેસં તેસં ધમ્માનં યથાભૂતં ઠાનં, પાપધમ્માનં વા વિપ્પકારસભાવટ્ઠાનં જાનનકો.

પરમત્થસચ્ચેન નિબ્બાનેન આરમ્મણપચ્ચયભૂતેન અરિયમગ્ગેન દન્તો. ઇન્દ્રિયદમેનાતિ તતો એવ અરિયેન ઇન્દ્રિયસંવરેન ઉપગતો. વિદન્તિ તેહિ સચ્ચાનીતિ વેદા. મગ્ગવેદાનં અન્તન્તિ અરિયફલં. કિલેસાનં અન્તન્તિ તેસં અનુપ્પાદનિરોધટ્ઠાનં. યઞ્ઞોતિ અગ્ગફલં. નિરત્થકન્તિ અફલં તેસં અનાગમનતો, આગતાનમ્પિ અગ્ગદક્ખિણેય્યાભાવતો. જુહતિ દેતિ.

સુયિટ્ઠન્તિ સુદાનં અગ્ગદક્ખિણેય્યલાભેન. સુહુતન્તિ તસ્સેવ વેવચનં. અથ વા સુયિટ્ઠન્તિ સુટ્ઠુ સમ્મદેવ યિટ્ઠં સારે ઉપનીતં મમ ઇદં દેય્યવત્થુ. સુહુતન્તિ એત્થાપિ એસેવ નયો.

ઉપહટમત્તેતિ બ્રાહ્મણેન ‘‘ભુઞ્જતુ ભવ’’ન્તિ ઉપનીતમત્તે. નિબ્બત્તિતોજમેવાતિ સવત્થુકં અગ્ગહેત્વા વત્થુતો વિવેચિતઓજમેવ. તેન તં સુખુમત્તં ગતન્તિ તં હબ્યસેસં સબ્બસો સુખુમભાવં ગતન્તિ ઓજાય અનોળારિકતાય પુરિમાકારેનેવ પઞ્ઞાયમાનતં સન્ધાય વુત્તં, ન પન ઓજાય એવ કેવલાય ગહણં સન્ધાય. સા હિ અવિનિબ્ભોગવુત્તિતાય વિસું ગણ્હિતું ન સક્કા, તસ્મા દેવતાહિપિ સવત્થુકા ગય્હતિ. મનુસ્સાનં વત્થૂતિ કરજકાયમાહ. ઓળારિકવત્થુતાય દેવાનં વિય ગહણી ન તિક્ખાતિ દિબ્બોજસમ્મિસ્સતાય સમ્મા પરિણામં ન ગચ્છતિ. સુખુમાપિ સમાના દિબ્બોજા તેન પાયસેન મિસ્સિતા ઓળારિકસમ્મિસ્સતાય સુખુમવત્થુકાનં દેવાનં સુખદા ન હોતીતિ ઇમમત્થં દસ્સેતિ ‘‘ગોયૂસે પના’’તિઆદિના. પરિભોગવત્થુનો ઓળારિકતાય વા દેવાનં દુક્કરં સમ્મા પરિણામેતું, દિબ્બોજાય ગરુતરભાવેન મનુસ્સાનં. તેનાહ ભગવા ‘‘ન ખ્વાહ’’ન્તિઆદિ. સમાપત્તિચિત્તસમુટ્ઠિતા તેજોધાતુ ઝાનાનુભાવસન્તેજિતા તિક્ખતરા હોતીતિ વુત્તં ‘‘અટ્ઠ…પે… પરિણામેય્યા’’તિ. ભગવતો પન સુદ્ધેનેવ પરિણમતીતિ વુત્તં ‘‘પાકતિકેનેવા’’તિ, ઝાનાનુભાવપ્પત્તેન ઝાનેન વિના સભાવસિદ્ધેનેવ.

‘‘અપ્પહરિતે’’તિ એત્થ અપ્પ-સદ્દો ‘‘અપ્પિચ્છો’’તિઆદીસુ વિય અભાવત્થોતિ આહ ‘‘અપ્પહરિતેતિ અહરિતે’’તિ. પાતિસતેપિ પાયસે. ન આલુળતીતિ ન આવિલં હોતિ. અનાગન્તાવ ગચ્છેય્ય ‘‘અત્તનાપિ ન પરિભુઞ્જિ, અઞ્ઞેસં ન દાપેસિ, કેવલં પાયસં નાસેસી’’તિ દોમનસ્સપ્પત્તો.

દારુ સમાદહાનોતિ દારુહરિદ્દિ દારુસ્મિં તસ્સ દહન્તો. યદીતિઆદિ દારુઝાપનસ્સ બહિદ્ધભાવસાધનં અસુદ્ધહેતૂનં પટિપક્ખાભાવતો તસ્સ. ખન્ધાદીસુ કુસલાતિ તેસુ સભાવતો સમુદયતો અત્થઙ્ગમતો અસ્સાદતો આદીનવતો નિસ્સરણતો જાનનતો છેકા પણ્ડિતા. ઞાણજોતિન્તિ ઞાણમયં જોતિં. જાલેમીતિ પજ્જલિતં કરોમિ. નિચ્ચં પજ્જલિતગ્ગિ સબ્બત્થકમેવ વિગતસમ્મોહન્ધકારતાય એકોભાસભાવતો. સબ્બસો વિક્ખેપાભાવતો નિચ્ચસમાહિતત્તો. એવં વદતીતિ ચરિતં બ્રહ્મચરિયં ગહેત્વા ચરામીતિ એવં વત્તમાનં વિય વદતિ આસન્નતં હદયે ઠપેત્વા.

ખારિભારોતિ ખારિભારસદિસો. તેનાહ ‘‘યથા’’તિઆદિ. ખન્ધેન વય્હમાનોતિ કાજે પક્ખિપિત્વા ખન્ધેન વય્હમાનો. પથવિયા સદ્ધિં ફુસેતિ ભારસ્સ ગરુકભાવેન કાજસ્સ પરિણમનેન. માનેન અત્તનો જાતિઆદીનિ પગ્ગણ્હતો અઞ્ઞસ્સ તાનિ ન સહતીતિ આહ – ‘‘તત્થ તત્થ ઇસ્સં ઉપ્પાદેન્તો’’તિ, તત્થ તત્થ જાતિઆદિમાનવત્થુસ્મિં ગરુતરગ્ગહણેન સંસીદેય્યાતિ અધિપ્પાયો. કોધો ધૂમોતિ યથાપિ ભાસુરો અગ્ગિ ધૂમેન ઉપક્કિલિટ્ઠો, એવં કોધેન ઉપક્કિલિટ્ઠો. ઞાણગ્ગીતિ તસ્સ કોધો ધૂમો. મુસાવાદોવ મોસવજ્જં. યથા ઞાણે સતિ મુસાવાદો નત્થિ, એવં મુસાવાદે સતિ ઞાણમ્પીતિ તેન તં નિરોધિતં વિય હોતીતિ આહ – ‘‘મુસાવાદેન પટિચ્છન્નં ઞાણ’’ન્તિ. યથા સુજાય વિના બ્રાહ્મણાનં યાગો ન ઇજ્ઝતિ, એવં પહૂતજિવ્હાય વિના સત્થુ ધમ્મયાગો ન ઇજ્ઝતીતિ જિવ્હા સુજાપરિયાયા વુત્તા. જોતિ ઠિયતિ એત્થાતિ જોતિટ્ઠાનં વેદિ, યં અગ્ગિકુણ્ડં. સત્તાનં હદયં જોતિટ્ઠાનં ઞાણગ્ગિનો તત્થ સમુજ્જલનતો. અત્તાતિ ચિત્તં ‘‘આહિતો અહં માનો એત્થા’’તિ કત્વા.

ધમ્મો રહદોતિ અસ્સદ્ધિયાદિઆલસિયાભાવતો કિલેસમલપક્ખાલનતો પરમગ્ગિનિબ્બુતાવહનતો અરિયમગ્ગધમ્મો અનાવિલો રહદો. હેટ્ઠુપરિયવાલુકાતિ વિપરિવત્તિતવાલુકા હુત્વા. આલુળાતિ આકુલજાતા. પણ્ડિતાનં પસત્થોતિ પણ્ડિતાનં પુરતો સેટ્ઠો. સેટ્ઠભાવેન સન્તો પાસંસો હુત્વા કિલેસે ભિન્દતિ સમુચ્છિન્દતીતિ સબ્ભીતિ વુચ્ચતિ. તેનાહ ‘‘ઉત્તમટ્ઠેના’’તિ. તથા ચાહ ભગવા ‘‘મગ્ગાનટ્ઠઙ્ગિકો સેટ્ઠો’’તિ (ધ. પ. ૨૭૩).

વચીસચ્ચન્તિ ઇમિના ‘‘ચતુરઙ્ગસમન્નાગતા વાચા સુપરિસુદ્ધા હોતી’’તિ સમ્માવાચં દસ્સેતિ. સચ્ચસંયમપદેહિ દસ્સિતા મગ્ગધમ્મા ઇધ ‘‘ધમ્મો’’તિ અધિપ્પેતાતિ આહ – ‘‘ધમ્મોતિ ઇમિના…પે… દસ્સેતી’’તિ. મગ્ગસચ્ચં ગહિતં અનન્તરગાથાય અનેકેહિ વિસેસેત્વા વુત્તત્તા. અત્થતોતિ પુબ્બઙ્ગમત્તાદિઅત્થતો. તાય હિ સકિચ્ચં કરોન્તિયા ઇતરે સબ્બેપિ તદનુવત્તિકા હોન્તિ. તગ્ગતિકત્તાતિ સમ્માદિટ્ઠિયા ઉપકારકભાવેન તાય સમાનગતિકત્તા. આરમ્મણઞ્હિ વિતક્કેનાહટં પઞ્ઞા વિચિનિતું સક્કોતિ. તથા હિ સો પઞ્ઞાક્ખન્ધેન સઙ્ગહં ગતો. ધમ્મોતિ સભાવતો સમાધિ ગહિતો, ઇતરે દ્વે તદુપકારત્તા. તથા હિ ‘‘એવંધમ્મા તે ભગવન્તો’’તિઆદીસુ (દી. નિ. ૨.૧૩; મ. નિ. ૩.૧૯૭; સં. નિ. ૫.૩૭૮) સમાધિ ‘‘ધમ્મો’’તિ વુત્તો. પરમત્થસચ્ચં ગહિતં સબ્બેસં સેટ્ઠભાવતો. યથાહ – ‘‘યાવતા, ભિક્ખવે, ધમ્મા સઙ્ખતા વા અસઙ્ખતા વા, વિરાગો તેસં અગ્ગમક્ખાયતી’’તિ (ઇતિવુ. ૯૦; અ. નિ. ૪.૩૪). અત્થતોતિ તતો એવ પરમત્થતો, અનન્તરં વુચ્ચમાનાનં વા મગ્ગધમ્માનં આરમ્મણભાવતો. પઞ્ચઙ્ગાનિ ગહિતાનિ તાસં મગ્ગભાવતો. તીણિ અઙ્ગાનિ. બ્રહ્મચરિયં નામાતિ એતં નિબ્બાનગામિ ઉત્તમટ્ઠેન મગ્ગબ્રહ્મચરિયં નામ. મજ્ઝે સિતાતિ લીનુદ્ધચ્ચાદિઅન્તદ્વયવિવજ્જનેન મજ્ઝે મજ્ઝિમપટિપદાભાવનં નિસ્સિતા. સસ્સતુચ્છેદગ્ગહણં હેત્થ પધાનતાય નિદસ્સનમત્તં. સેટ્ઠપ્પત્તીતિ સેટ્ઠભાવપ્પત્તિ. ત-કારો પદસન્ધિકરોતિ ‘‘સ ઉજુભૂતેસૂ’’તિ વત્તબ્બે મજ્ઝે ત-કારો પદસન્ધિકરો, ‘‘સ દુજ્જુભૂતેસૂતિ કેચિ પઠન્તિ, તેસં દ-કારો પદસન્ધિકરો. સ-ઇતિ સુન્દરિકો બ્રાહ્મણો વુત્તોતિ કત્વા આહ ‘‘સ ત્વ’’ન્તિ, સો ત્વન્તિ અત્થો. ધમ્મો સારિયો પરિધાનભૂતા અલઙ્કારા એતસ્સાતિ ધમ્મસારી. અથ વા ધમ્મેહિ સારિતવાતિ ધમ્મસારી, તેહિ સારેત્વા ઠિતવાતિ અત્થો. તેનાહ ‘‘કુસલધમ્મેહી’’તિઆદિ.

સુન્દરિકસુત્તવણ્ણના નિટ્ઠિતા.

૧૦. બહુધીતરસુત્તવણ્ણના

૧૯૬. સમન્તતોતિ દક્ખિણવામાનં વસેન સમન્તતો. ઊરુબદ્ધાસનન્તિ ઊરૂનં બન્ધનવસેન નિસજ્જનં. દ્વિન્નં ઊરૂનં અઞ્ઞમઞ્ઞબન્ધનવસેન આભુજિતાકારં સન્ધાયાહ ‘‘આભુજિત્વાતિ બન્ધિત્વા’’તિ. હેટ્ઠિમકાયસ્સ અનુજુકં ઠપનં નિસજ્જાવચનેનેવ બોધિતન્તિ ‘‘ઉજું કાય’’ન્તિ એત્થ કાય-સદ્દો ઉપરિમકાયવિસયોતિ આહ ‘‘ઉપરિમં સરીરં ઉજુકં ઠપેત્વા’’તિ. તં પન ઉજુકટ્ઠપનં સરૂપતો પયોજનતો ચ દસ્સેતું ‘‘અટ્ઠારસા’’તિઆદિ વુત્તં. પરિમુખન્તિ એત્થ પરિ-સદ્દો અભિસદ્દેન સમાનત્થોતિ આહ ‘‘કમ્મટ્ઠાનાભિમુખ’’ન્તિ, બહિદ્ધા પુથુત્તારમ્મણતો નિવારેત્વા કમ્મટ્ઠાનંયેવ પુરેક્ખતોતિ અત્થો. પરિગ્ગહટ્ઠો ‘‘પરિણાયિકા’’તિઆદીસુ વિય. મુખન્તિ નિય્યાનટ્ઠો ‘‘સુઞ્ઞતવિમોક્ખમુખ’’ન્તિઆદીસુ વિય. પટિપક્ખતો નિગ્ગમનટ્ઠો હિ નિય્યાનટ્ઠો, તસ્મા પરિગ્ગહિતનિય્યાનન્તિ સબ્બથા ગહિતસમ્મોસં પરિચ્ચત્તસમ્મોસં સતિં કત્વા પરમં સતિનેપક્કં ઉપટ્ઠપેત્વાતિ અત્થો. છબ્બણ્ણા…પે… નિસીદિ બ્રાહ્મણસ્સ પસાદસઞ્જાનનત્થં. અટવિમુખા ચરમાનાતિ ગોચરં ગણ્હન્તા.

અજ્જસટ્ઠિન્તિ અજ્જ છન્નં પૂરણી સટ્ઠી દિવસવુત્તિ, અજ્જ આદિં કત્વા છ દિવસેતિ અત્થો. અચ્ચન્તસંયોગે ચેતં ઉપયોગવચનં. અજ્જ છદિવસમત્તકાતિ અજ્જતો છટ્ઠદિવસમત્તકા. લામકાતિ નિહીના નિપ્ફલા. તેનાહ ‘‘તિલખાણુકા’’તિઆદિ.

ઉસ્સાહેનાતિ ઉદ્ધં ઉદ્ધં પસારેન અભિભવનેન. તં પન નેસં અભિભવનં દસ્સેતું ‘‘કણ્ણનઙ્ગુટ્ઠાદીની’’તિઆદિમાહ.

‘‘ઉપ્પાટકપાણકા’’તિ તચં ઉપ્પાટેત્વા વિય ખાદકપાણકા ઊકામઙ્ગુલાદયો.

કળારપિઙ્ગલાતિ નિક્ખન્તપિઙ્ગલક્ખિકા, કળારપિઙ્ગલાતિ વા રત્તગત્તા ચ પિઙ્ગલચક્ખુકા ચ. તિલકાહતાતિ આહતતિલકા, તિલપ્પમાણેહિ બિન્દૂહિ સમન્તતો સન્થતસરીરા.

પટિગાથાહિ બ્રાહ્મણસ્સ ધમ્મદેસનં વડ્ઢેસીતિ પકતિયા તસ્સ અત્તના કથેતબ્બં ધમ્મદેસનં પબ્બજ્જાગુણકિત્તનવસેન સત્તહિ વડ્ઢેસિ. પબ્બજિત્વાતિ ઇણાયિકાનં અત્તનો પલિબોધં તથા તથા જાનાપેત્વા પબ્બજિત્વા.

યથા ચ તત્થ ભગવા પટિપજ્જિ, તં દસ્સેતું ‘‘પુન દિવસે’’તિઆદિ વુત્તં.

તં તં કુલઘરં પેસેત્વાતિ તં તં તસ્સ બ્રાહ્મણસ્સ ધીતરં તસ્સ તસ્સાનુચ્છવિકસ્સ બ્રાહ્મણસ્સ દેન્તો તં તં કુલઘરં પેસેત્વા બ્રાહ્મણધમ્મે ગરુકરણાભાવતો.

‘‘નટ્ઠે મતે પબ્બજિતે, નપુંસકેપિ ભત્તરિ;

ઇત્થિયા પતિસેટ્ઠાય, ન અઞ્ઞો પતિ ઇચ્છિયો’’તિ. –

અયઞ્હિ બ્રાહ્મણધમ્મો. અય્યિકટ્ઠાનેતિ માતામહિટ્ઠાને ઠપેસિ સત્થુ ચિત્તારાધનવસેનાતિ.

બહુધીતરસુત્તવણ્ણના નિટ્ઠિતા.

પઠમવગ્ગવણ્ણના નિટ્ઠિતા.

૨. ઉપાસકવગ્ગો

૧. કસિભારદ્વાજસુત્તવણ્ણના

૧૯૭. દક્ખિણાગિરિસ્મિન્તિ દક્ખિણાગિરિજનપદે, તસ્મિં દક્ખિણાગિરિજનપદે દક્ખિણાગિરિવિહારે. ખન્ધેસુ ઠપેત્વા યુગે યોત્તેહીતિ યોત્તરજ્જૂહિ યુત્તાનિ પયોજિતાનિ ઇચ્ચેવ અત્થો.

પઠમદિવસેતિ વપનદિવસેસુ પઠમદિવસે આરદ્ધદિવસે. પઞ્ચઙ્ગાનિપિ પરિપુણ્ણાનિ, પગેવ ઇતરઙ્ગાનીતિ દસ્સેતું ‘‘પરિપુણ્ણપઞ્ચઙ્ગા’’ઇચ્ચેવ વુત્તં. હરિતાલમનોસિલાઅઞ્જનેહિ ઉરત્થનાદીસુ ઠપિતત્તા આભાય ઉજ્જલગત્તા. અવસેસા બલીબદ્દા. કિલન્તગોણં મોચેત્વા અકિલન્તસ્સ યોજનં કિલન્તપરિવત્તનં.

સીહકુણ્ડલાનીતિ સીહમુખકુણ્ડલાનિ. બ્રહ્મવેઠનન્તિ બ્રહ્મુનો વેઠનસદિસં, અસ્સનખવેઠનસદિસન્તિ અત્થો.

બુદ્ધાનં કિચ્ચાનિ કાલવસેન વિભત્તાનિ પઞ્ચ કિચ્ચાનિ ભવન્તિ. પુરેભત્તકિચ્ચન્તિ ભત્તતો પુબ્બે બુદ્ધેન કાતબ્બકિચ્ચં. વીતિનામેત્વાતિ ફલસમાપત્તિયા કાલં વીતિનામેત્વા. કદાચિ એકોતિઆદિ તેસં તેસં વિનેય્યાનં વિનયનાનુરૂપપટિપત્તિદસ્સનં. પકતિયાતિ પકતિબુદ્ધવેસેન. બુદ્ધાનં હિ રૂપકાયસ્સ અસીતિઅનુબ્યઞ્જનપટિમણ્ડિત-બાત્તિંસમહાપુરિસ- લક્ખણ-કાયપ્પભા-બ્યામપ્પભા-કેતુમાલાવિચિત્તતા બુદ્ધવેસો. કદાચિ અનેકેહિ પાટિહારિયેહિ વત્તમાનેહીતિ ઇમિના પારમીનં નિસ્સન્દભૂતાનિ પાટિહારિયાનિ રુચિવસેનેવ પકાસનકાનિ ભવન્તિ, ન સબ્બદાતિ દસ્સેતિ. એવઞ્ચ કત્વા ‘‘ઇન્દખીલસ્સ અન્તો ઠપિતમત્તે દક્ખિણપાદે’’તિઆદિવચનં સમત્થિતં હોતિ. ભગવતો કાયે પીતરસ્મીનં યેભુય્યતાય ‘‘સુવણ્ણરસસિઞ્ચનાનિ વિયા’’તિ વત્વા કાયમ્હિ નીલાદિરસ્મીહિ તહં તહં પીતમિસ્સિતં સન્ધાય ‘‘વિચિત્રપટપરિક્ખિત્તાનિ વિય ચા’’તિ વુત્તં. મધુરેનાકારેન સદ્દં કરોન્તિ તુટ્ઠરવરવનતો.

તત્થાતિ વિહારે. ગન્ધમણ્ડલમાળેતિ હત્થેન કતપરિભણ્ડે સમોસરિતગન્ધપુપ્ફદામે મણ્ડલમાળે.

ઉપટ્ઠાનેતિ પમુખે. ‘‘ઓવદતી’’તિ વત્વા તત્થોવાદં સામઞ્ઞતો દસ્સેતું, ‘‘ભિક્ખવે’’તિઆદિ વુત્તં. સમ્પત્તીતિ ચક્ખાદિઇન્દ્રિયપારિપૂરિ ચેવ હત્થાદિસમ્પદા ચ. સમસ્સાસિતકાયો કિલમથવિનોદનેન. ‘‘તઞ્ચ ખો સમાપજ્જનેના’’તિ વદન્તિ. દુતિયભાગેતિ ઇમિના અપરભાગં તયો ભાગે કત્વા તત્થ પુરિમભાગં સેય્યનિસજ્જાવસેન સમાપત્તીહિ વીતિનામેતીતિ દસ્સેતિ. લોકન્તિ રાજગહાદીસુ યં તદા ઉપનિસ્સાય વિહરતિ, તત્થ અઞ્ઞત્થ વા બુજ્ઝનકં વિનેય્યસત્તલોકં બુદ્ધચક્ખુના વોલોકેતિ. કાલયુત્તન્તિ તેસં ઇન્દ્રિયપરિપાકકાલાનુરૂપં. સમયયુત્તન્તિ તસ્સેવ વેવચનં. સમયયુત્તન્તિ વા તેહિ આજાનિતબ્બવિસેસપટિલાભાનુરૂપં.

પટિસલ્લીનોતિ કાલપરિચ્છેદં કત્વા સમાપત્તિં સમાપન્નો. અધિપ્પાયં સમ્પાદેન્તો તં અવિરાધેન્તો, અજ્ઝાસયાનુરૂપન્તિ અત્થો.

સકલ…પે… દેવતાયોતિ એત્થ લોકધાતુસાકલ્યં દટ્ઠબ્બં, ન દેવતાસાકલ્યં. ન હિ મહાસમયે વિય સબ્બદા મજ્ઝિમયામે દસસહસ્સચક્કવાળે સબ્બત્થ સબ્બા દેવતા સત્થુ સમીપં ઉપગચ્છન્તિ. કિલાસુભાવો કિલમથો.

વિહારચીવરપરિવત્તનવસેનાતિ વિહારે નિવત્થનિવાસનપરિવત્તનવસેન. આદિયિત્વાતિ પારુપનવસેન ગહેત્વા. તેનાહ ‘‘ધારેત્વા’’તિ. ભિક્ખાચારન્તિ ભિક્ખત્થં ચરિતબ્બટ્ઠાનં.

અતિરોચમાનન્તિ તં તં અતિક્કમિત્વા સમન્તતો સબ્બદિસાસુ વિરોચમાનં. સરીરપ્પભન્તિ અત્તનો સરીરપ્પભં. જઙ્ગમં વિય પદુમસરન્તિ રતનમયકિઞ્જક્ખં રજતમયકણ્ણિકં સમન્તતો સમ્ફુલ્લિતકઞ્ચનપદુમં સઞ્ચારિમસરં વિય. ગગનતલન્તિ અબ્ભમહિકાદિઉપક્કિલેસવિગમેન સુવિસુદ્ધઆકાસતલં વિય. તમ્પિ હિ તારાગણકિરણજાલસમુજ્જલતાય સમન્તતો વિરોચતિ. કનકસિખરન્તિ કનકગિરિસિખરં. સિરિયા જલમાનન્તિ સબ્બસો અનવજ્જાય સબ્બાકારેન પરિપુણ્ણકાયતાય અનઞ્ઞસાધારણાય રૂપકાયસિરિયા સમુજ્જલં, યસ્સા રુચિરભાવો વિદ્ધે વિગતવલાહકે પુણ્ણમાસિયં પરિપુણ્ણકલમનોમમણ્ડલં ચન્દમણ્ડલં અતિરોચતિ, પભસ્સરભાવો સહસ્સરંસિકિરણતેજોજાલસમુજ્જલં સૂરિયમણ્ડલં અભિભવતિ, હેમસમુજ્જલભાવો તદુભયે અભિભુય્ય પવત્તમાનં એકક્ખણે દસસહસ્સિલોકધાતુવિજ્જોતનસમત્થ-મહાબ્રહ્મુનો પભાસમુદયં અભિવિહચ્ચ ભાસતિ તપતિ વિરોચતિ.

સમન્તપાસાદિકેતિ સમન્તતો પસાદાવહે. તઞ્ચ ખો સબ્બસો સરિતબ્બતાયાતિ આહ ‘‘પસાદનીયે’’તિ. ઉત્તમદમથસમથમનુપ્પત્તેતિ કાયવાચાહિ અનુત્તરં દન્તભાવઞ્ચેવ અનુત્તરં ચિત્તવૂપસમઞ્ચ સમ્પત્તે. અપ્પસાદેનાતિ પસાદાભાવેન, પસાદપટિક્ખેપેન વા અસ્સદ્ધિયેન. ઉભયથાપિ નોતિ અપ્પસાદો મચ્છરિયન્તિ ઉભયથાપિ નો એવ, અથ ખો અનત્તમનતાય ઉપારમ્ભાધિપ્પાયેન અપસાદેન્તો, ભગવતો મુખતો કિઞ્ચિ દેસેતુકામો વા એવમાહ. તત્થ કારણં દસ્સેન્તો ‘‘ભગવતો પના’’તિઆદિમાહ. અતિત્તન્તિ તિત્તિં અગચ્છન્તં. કમ્મભઙ્ગન્તિ કમ્મહાનિં.

તિક્ખપઞ્ઞો એસ બ્રાહ્મણો, તથા હિ ન ચિરસ્સેવ અરહત્તં સચ્છિકરિસ્સતિ. કથાપવત્તનત્થમ્પિ એવમાહ – ‘‘એવં અહં ઇમસ્સ કઞ્ચિ ધમ્મં સોતું લભિસ્સામી’’તિ. વેનેય્યવસેનાતિ અત્તનો કસનકારિભાવકિત્તનમુખેન વિનેતબ્બપુગ્ગલવસેન.

ઓળારિકાનીતિ પાકતિકાનિ. ‘‘એસ ઉત્તમદક્ખિણેય્યો’’તિ સઞ્જાતબહુમાનો. પાળિયં ‘‘યુગં વા નઙ્ગલં વા’’તિ વા-સદ્દો અવુત્તવિકપ્પત્થો. તેન બીજાદિં સઙ્ગણ્હાતિ, તસ્મા બીજં વા ઈસં વા પરિગ્ગહયોત્તાનિ વાતિ અયમત્થો દસ્સિતો હોતિ. તથા હિ ભગવા બ્રાહ્મણસ્સ પટિવચનં દેન્તો ‘‘સદ્ધા બીજ’’ન્તિઆદિમાહ. પુબ્બધમ્મસભાગતાયાતિ પઠમં ગહિતધમ્મસભાગતાય. યં પનેત્થ વત્તબ્બં, તં અટ્ઠકથારુળ્હમેવ ગહેતબ્બઞ્ચ સદ્દતો અત્થાપત્તિતો વા ઇધ દટ્ઠબ્બં. બુદ્ધાનં આનુભાવો અયં, યદિદં પસઙ્ગાગતધમ્મમુખેન દેસનં આરભિત્વા વેનેય્યવિનયનં.

અનનુસન્ધિકાતિ પુચ્છાનુસન્ધિવસેન અનનુસન્ધિકા. એવન્તિ ઇદાનિ વુચ્ચમાનાકારેન. એત્થાતિ એતિસ્સા દેસનાય. સોતિ ભગવા. તસ્સાતિ બ્રાહ્મણસ્સ. અનુકમ્પાયાતિ અસબ્બઞ્ઞૂ હિ સતિપિ અનુકમ્પાય પુચ્છિતમત્તે તિટ્ઠેય્ય, તથા જાનન્તોપિ અનનુકમ્પકો, ભગવા પન ઉભયધમ્મપારિપૂરિયા ‘‘ઇદં અપુચ્છિત’’ન્તિ અપરિહાપેત્વા કથેતિ. સમૂલન્તિઆદિના સઙ્ખેપેન વુત્તમત્થં વિવરન્તો ‘‘તત્થા’’તિઆદિમાહ. તત્થ બીજસ્સ કસિયા મૂલભાવો નાનન્તરિયતો તપ્પમાણવિધાનતો ચાતિ આહ ‘‘તસ્મિં…પે… કત્તબ્બતો’’તિ. તેન અન્વયતો બ્યતિરેકતો ચ બીજસ્સ કસિયા મૂલભાવં વિભાવેતિ. કુસલાતિ ઇમિના અકુસલા તતો અઞ્ઞથાપિ કરોન્તિ, તં પન અપ્પમાણન્તિ દસ્સેતિ.

તસ્સાતિ બ્રાહ્મણસ્સ બીજટ્ઠાનિયસ્સ ધમ્મસ્સ ચ ઉપકારભાવતો. ધમ્મસમ્બન્ધસમત્થભાવતોતિ તથા વુત્તધમ્મસ્સ ફલેન સમ્બન્ધિતું યોજેતું સમત્થભાવતો. તપો વુટ્ઠીતિ વુત્તવચનં સન્ધાય વુત્તં. સઙ્ખેપતો વુત્તમત્થં પાકટં કાતું ‘‘અયં હી’’તિઆદિ વુત્તં. કસ્સકસ્સ ઉપકારસ્સ બીજસ્સ અનન્તરં વુટ્ઠિ વુચ્ચમાના અટ્ઠાને વુત્તા નામ ન હોતિ. કસ્મા? બીજસ્સ વપ્પકાલે અનુરૂપાય વુટ્ઠિયા ઇચ્છિતબ્બતો, તસ્મા અવસાને મજ્ઝે વા વુચ્ચમાનાય ધમ્મસમ્બન્ધસમત્થતા તસ્સા વિભાવિતા ન સિયા. અત્તનો અવિસયેતિ ઝાનાદિઉત્તરિમનુસ્સધમ્મે. પચ્છાપીતિ કસિસમ્ભારકથનતો પચ્છાપિ. વત્તબ્બોતિ એકન્તેન વત્તબ્બો. તદનન્તરંયેવાતિ બીજાનન્તરંયેવ. વુચ્ચમાના વુટ્ઠિ સમત્થા હોતિ, બીજસ્સ ફલેન સમ્બન્ધને સમત્થાતિ દીપિતા હોતિ અનન્તરવચનેનેવ તસ્સા આસન્નઉપકારત્તદીપનતો.

સમ્પસાદલક્ખણાતિ પસીદિતબ્બે વત્થુસ્મિં સમ્મદેવ પસીદનલક્ખણા. ઓકપ્પનલક્ખણાતિ સદ્ધેય્યવત્થુનો એવમેતન્તિ પક્ખન્દનલક્ખણા. મૂલબીજન્તિઆદીસુ મૂલમેવ બીજં મૂલબીજં. એસ નયો સેસેસુપિ બીજગામસ્સ અધિપ્પેતત્તા. ભૂતગામો પન મૂલં બીજં એતસ્સાતિ મૂલબીજન્તિઆદિના વેદિતબ્બો. બીજબીજન્તિ પઞ્ચમં પન પચ્ચયન્તરસમવાયે સદિસફલુપ્પત્તિયા વિસેસકારણભાવતો વિરૂહનસમત્થે સારફલે નિરુળ્હો બીજસદ્દો તદત્થસિદ્ધિયા મૂલાદીસુપિ કેસુચિ પવત્તતીતિ તતો નિવત્તનત્થં એકેન બીજ-સદ્દેન વિસેસેત્વા વુત્તં ‘‘બીજબીજ’’ન્તિ ‘‘દુક્ખદુક્ખં રૂપરૂપ’’ન્તિ ચ યથા. એવમ્પિ ઇમિના અત્થેન ઇમસ્સપિ નિપ્પરિયાયોવ બીજભાવોતિ દસ્સેન્તો આહ ‘‘તં સબ્બમ્પિ…પે… ગચ્છતી’’તિ.

ઇદાનિ કથઞ્ચિ વત્તબ્બે સદ્ધાય ઓપમ્મત્તે બીજે સદ્ધાય બીજભાવં વિભાવેતું ‘‘તત્થ યથા’’તિઆદિ આરદ્ધં. કામં સદ્ધૂપનિસં સીલં, તથાપિ સમાધિસ્સ વિય સબ્બેસમ્પિ અનવજ્જધમ્માનં આદિમૂલભાવતો સદ્ધાયપિ પતિટ્ઠા હોતીતિ આહ ‘‘હેટ્ઠા સીલમૂલેન પતિટ્ઠાતી’’તિ. યસ્મા સબ્બસ્સેવ પુગ્ગલસ્સ સદ્ધાવસેન સમથવિપસ્સનારમ્ભો, તસ્મા સા ‘‘ઉપરિ સમથવિપસ્સનઙ્કુરં ઉટ્ઠાપેતી’’તિ વુત્તા. તન્તિ ધઞ્ઞબીજં. પથવિરસં આપોરસન્તિ સસમ્ભારપથવીઆપેસુ લબ્ભમાનં રસં. ગહેત્વાતિ પચ્ચયપરમ્પરાય ગહેત્વા. ધઞ્ઞપરિપાકગહણત્થન્તિ ધઞ્ઞપરિપાકનિબ્બત્તિઅત્થં. રસન્તિ સદ્ધાસીલમૂલહેતુસમથવિપસ્સનાભાવનારસં આદિયિત્વા. અરિયમગ્ગનાળેનાતિ અરિયમગ્ગસોતેન અરિયફલધઞ્ઞપરિપાકગહણત્થન્તિ અરિયફલમેવ ધનાયિતબ્બતો ધઞ્ઞં તસ્સ નિબ્બત્તિઅત્થં. ધઞ્ઞનાળં નામ કણ્ડસ્સ નિસ્સયભૂતો પચ્છિમદેસો, કણ્ડો તબ્ભન્તરો તંનિસ્સયોયેવ દણ્ડો. પસવો નામ પુપ્ફં. વુદ્ધિન્તિ અવયવપારિપૂરિવસેન વુદ્ધિં. વિરૂળ્હિન્તિ મૂલસન્તાનદળ્હતાય વિરુળ્હતં. વેપુલ્લન્તિ પત્તનાળાદીહિ વિપુલભાવં. ખીરં જનેત્વાતિ તરુણસલાટુકભાવપ્પત્તિયા તણ્ડુલસ્સ બીજસ્સ બીજભૂતં ખીરં ઉપ્પાદેત્વા. એસાતિ સદ્ધા. પતિટ્ઠહિત્વાતિ કમ્મપથાકમ્મપથસમ્માદિટ્ઠિસહિતેન આદિતો પવત્તસીલમત્તેન પતિટ્ઠહિત્વા. વુદ્ધિન્તિઆદીસુ સુપરિસુદ્ધાહિ સીલચિત્તવિસુદ્ધીહિ વુદ્ધિં, દિટ્ઠિકઙ્ખાવિતરણવિસુદ્ધીહિ વિરૂળ્હિં. મગ્ગામગ્ગપટિપદાઞાણદસ્સનવિસુદ્ધીહિ વેપુલ્લં પત્વા. ઞાણદસ્સનવિસુદ્ધિખીરન્તિ સાદુરસસુવિસુદ્ધિભાવતો ઞાણદસ્સનવિસુદ્ધિસઙ્ખાતં ખીરં જનેત્વા. અનેક…પે… ફલન્તિ અનેકપટિસમ્ભિદા-અનેકાભિઞ્ઞાણપરિપુણ્ણં અરહત્તફલસીસં નિપ્ફાદેતિ.

બીજકિચ્ચકરણતોતિ બીજકિચ્ચસ્સ કરણતો. યઞ્હિ તંસદિસસ્સ વિસદિસસ્સ ચ અત્તનો ફલસ્સ પતિટ્ઠાપનસમ્બન્ધનનિપ્ફાદનસઙ્ખાતં બીજસ્સ કિચ્ચં, તસ્સ કરણતો નિબ્બત્તનતો ‘‘એવં સદ્ધા બીજકિચ્ચ’’ન્તિ વુત્તં. ઇમિના અનઞ્ઞસાધારણં સદ્ધાય કુસલધમ્માનં બીજભાવં દસ્સેતિ. સા ચાતિઆદિના તમેવત્થં સમત્થેતિ. ઇદાનિ તત્થ આગમં દસ્સેન્તો ‘‘સદ્ધાજાતો’’તિઆદિમાહ. તેન યથા સપ્પુરિસૂપનિસ્સયસ્સ સદ્ધમ્મસ્સવનસ્સ ચ, એવં અનવસેસાય સમ્માપટિપત્તિયા સદ્ધા મૂલકારણન્તિ દસ્સેતિ.

ઇન્દ્રિયસંવરો વીરિયઞ્ચ અકુસલધમ્મે, દુક્કરકારિકા ધુતઙ્ગઞ્ચ અકુસલધમ્મે ચેવ કાયઞ્ચ તપતિ વિબાધતીતિ તપોતિ વુચ્ચતિ. ઇન્દ્રિયસંવરો અધિપ્પેતો વીરિયસ્સ ધોરય્હભાવેન ગય્હમાનત્તા, ઇતરેસં વુટ્ઠિભાવસ્સ અનુયુઞ્જમાનત્તા. આદિ-સદ્દેન કલલઙ્ગારવુટ્ઠિઆદીનં સઙ્ગહો. સમનુગ્ગહિતન્તિ ઉપગતં. વિરુહનામિલાયનનિપ્ફત્તિવચનેહિ ધઞ્ઞબીજસન્તાનસ્સ વિય તેસં વુદ્ધિયા સદ્ધાબીજસન્તાનસ્સ તપોવુટ્ઠિયા આદિમજ્ઝપરિયોસાનેસુ ઉપકારતં દસ્સેતિ.

પુરિમપદેસુપીતિ અપિ-સદ્દેન પરપદેસુપીતિ અત્થો દટ્ઠબ્બો ‘‘હિરી મે ઈસા, મનો મે યોત્ત’’ન્તિ ઇચ્છિતત્તા, ‘‘સતિ મે’’તિ એત્થ મે-સદ્દો આનેત્વા યોજેતબ્બો. ઉદકમ્પિ તાવ દાતબ્બં હોતિ નદીતળાકાદિતો આનેત્વા. વીરિયબલીબદ્દે ચતુબ્બિધે યોજેત્વા. નિચ્ચકાલં અત્થીતિ વચનસેસો.

સહ વિપસ્સનાય મગ્ગપઞ્ઞા અધિપ્પેતા અમતપ્ફલાય કસિયા અધિપ્પેતત્તા. વિપસ્સના પઞ્ઞા ચાતિ દુવિધાપિ પઞ્ઞા ઉપનિસ્સયા હોતિ વિસિટ્ઠભાવતો. તેનાહ ‘‘યથા હી’’તિઆદિ. પઞ્ઞાતિ પકારેહિ જાનાતીતિ પઞ્ઞા. પઞ્ઞવતં પઞ્ઞા પુરતો હોતિ યોનિસોમનસિકારસ્સ વિસેસપચ્ચયભાવતો, સહજાતાધિપતીસુ ચ ઉક્કટ્ઠભાવતો. સિરીતિ સોભગ્ગં. સતં ધમ્મા સદ્ધાદયો, અન્વાયિકાતિ અનુગામિનો. ઈસાબદ્ધા હોતીતિ હિરિસઙ્ખાતઈસાય બદ્ધા હોતિ, પઞ્ઞાય કદાચિ અપ્પયોગતો મનોસીસેન સમાધિ ઇધ વુત્તોતિ આહ ‘‘મનોસઙ્ખાતસ્સ સમાધિયોત્તસ્સા’’તિ. સમં ઉપનેત્વા બન્ધિત્વા બદ્ધરજ્જુકત્તા સમાધિયોત્તં. એકતો ગમનન્તિ લીનચ્ચારદ્ધસઙ્ખાતં એકપસ્સતો ગમનં વારેતિ. મજ્ઝિમાય વિપસ્સનાવીથિયા પટિપાદનતો કાયાદીસુ સુભસુખનિચ્ચત્તભાવવિગમને પઞ્ઞાય વિસેસપચ્ચયા સતીતિ વુત્તં – ‘‘સતિયુત્તા પઞ્ઞા’’તિ તસ્સા સતિવિપ્પયોગાસબ્ભાવતો. સન્તતિઘનાદીનં અયં વિસેસો – પુરિમપચ્છિમાનં ધમ્માનં નિરન્તરતાય એકીભૂતાનં વિય પવત્તિ સન્તતિઘનતા, એકસમૂહવસેન એકીભૂતાનમિવ પવત્તિ સમૂહઘનતા, દુબ્બિઞ્ઞેય્યકિચ્ચભેદવસેન એકીભૂતાનમિવ પવત્તિ. કિચ્ચઘનતા, એકારમ્મણવસેન એકીભૂતાનમિવ પવત્તિ આરમ્મણઘનતા. સબ્બેસં, સબ્બાનિ વા કિલેસાનં મૂલસન્તાનકાનિ સબ્બ…પે… સન્તાનકાનિ. અનુપ્પયોગો હિ અત્થો. પદાલેતીતિ ભિન્દતિ સમુચ્છિન્દતિ. સા ચ ખો ‘‘પદાલેતી’’તિ વુત્તા લોકુત્તરાવ પઞ્ઞા અનુસયપ્પહાનસ્સ અધિપ્પેતત્તા. સન્તતિઘનાદિભેદના પન લોકિયાપિ હોતિ વિપસ્સનાવસેન ઘનવિનિબ્ભોગસ્સ નિપ્ફાદનતો. તેનાહ ‘‘ઇતરા પન લોકિકાપિ સિયા’’તિ.

હિરીયતીતિ લજ્જતિ, જિગુચ્છતીતિ અત્થો. તસ્મા ‘‘પાપકેહિ ધમ્મેહી’’તિ નિસ્સક્કવચનં દટ્ઠબ્બં, હેતુમ્હિ વા કરણવચનં. ઓત્તપ્પમ્પિ ગહિતમેવ, ન હિ લજ્જનં નિબ્ભયં પાપભયં વા અલજ્જનં અત્થીતિ. રુક્ખલટ્ઠીતિ રુક્ખદણ્ડો. તેન પદેસેન કસનતો વિસેસતો નઙ્ગલન્તિ વુચ્ચતીતિ આહ ‘‘ઈસા યુગનઙ્ગલં ધારેતી’’તિ. કામં પઞ્ઞારહિતા હિરી અત્થિ, હિરિરહિતા પન પઞ્ઞા નત્થેવાતિ આહ ‘‘હિરિ…પે… અભાવતો’’તિ. સન્ધિટ્ઠાને કમ્પનાભાવતો અચલં. થિરભાવેન અસિથિલં. હિરિપટિબદ્ધપઞ્ઞા પટિપક્ખવસેન ચ અસિથિલભાવેન ચ અચલા અસિથિલાતિ આહ ‘‘અબ્બોકિણ્ણા અહિરિકેના’’તિ. નાળિયા મિનમાનપુરિસો વિય આરમ્મણં મુનાતિ પરિચ્છેદતો જાનાતીતિ મનો. મનોસીસેનાતિ મનસો અપદેસેન. તંસમ્પયુત્તોતિ ઇમિના કુન્તસહચરણતો પુરિસો કુન્તો વિય મનસહચરણસમાધિ ‘‘મનો’’તિ વુત્તોતિ દસ્સેતિ. સારથિનાતિ કસ્સકેન. સો હિ ઇધ બલીબદ્દાનં સારણતો પાચનતો ‘‘સારથી’’તિ અધિપ્પેતો. એકાબન્ધનન્તિ એકાબદ્ધકરણં. સકકિચ્ચેતિ સકકિચ્ચેન યુત્તે. તેન હિ ઈસાદીસુ યથારહં બન્ધિત્વા એકાબદ્ધેસુ કતેસુ નઙ્ગલેસુ કિચ્ચં ઇજ્ઝતિ, નો અઞ્ઞથાતિ તં ‘‘સકકિચ્ચે પટિપાદેતી’’તિ વુત્તં. અવિક્ખેપસભાવેનાતિ અત્તનો અવિક્ખેપસભાવેન. બન્ધિત્વાતિ સહજાતાદિપચ્ચયભાવેન અત્તના સમ્બન્ધિત્વા. સકકિચ્ચેતિ હિરીઆદીહિ યથાસકં કત્તબ્બે કિચ્ચે.

ચિરકતાદિમત્થન્તિ ચિરભાસિતમ્પિ અત્થં. સરતિ અનુસ્સરતિ કાયાદિં અસુભાદિતો નિજ્ઝાયતિ. ફાલેતીતિ પદાલેતિ. પાજેન્તિ ગમેન્તીતિ તં પાજનં. ઇધ ઇમસ્મિં સુત્તે ‘‘પાચન’’ન્તિ વુત્તં જ-કારસ્સ ચ-કારં કત્વા. ફાલપાચનન્તિ ઇમમત્થં દસ્સેતું ‘‘યથા હિ બ્રાહ્મણ…પે… સતી’’તિ વુત્તં. ઇદાનિ તમત્થં વિત્થારતો દસ્સેન્તો ‘‘તત્થ યથા’’તિઆદિમાહ. નઙ્ગલં અનુરક્ખતિ ભિજ્જનફાલનતો. પુરતો ચસ્સ ગચ્છતીતિ અસ્સ નઙ્ગલસ્સ કસ્સને ભૂમિયા વિલિખને પુરતો ગચ્છતિ પુબ્બઙ્ગમા હોતિ. ગતિયોતિ પવત્તિયો. સમન્વેસમાનાતિ સરણવસેન ગવેસમાના. આરમ્મણે વા કાયાદિકે ઉપટ્ઠાપયમાના અસુભાદિવસેન પઞ્ઞાનઙ્ગલં રક્ખતિ. સભાવાસભાવૂપગમે ફાલો વિય નઙ્ગલસ્સ ‘‘આરક્ખા’’તિ વુત્તા ‘‘સબ્બાનત્થતો સતિ રક્ખતી’’તિ કત્વા. તથા હેસા આરક્ખપચ્ચુપટ્ઠાના. ચિરકતચિરભાસિતાનં અસમ્મુસ્સનવસેન સતિ પઞ્ઞાનઙ્ગલસ્સ પુરતો હોતીતિ વત્વા તસ્સ પુરતોભાવં દસ્સેતું ‘‘સતિ…પે… નો પમુટ્ઠે’’તિ આહ. સતિપરિચિતેતિ સતિયા પટ્ઠાપિતે. ‘‘ઉપટ્ઠાપિતે’’તિપિ પાઠો, અયમેવત્થો. સંસીદિતું ન દેતીતિ સકિચ્ચકિરિયાય સંસીદનં કાતું ન દેતિ. કોસજ્જસઙ્ખાતં સંસીદનં કોસજ્જસંસીદનં.

પાતિમોક્ખસંવરસીલં વુત્તં કાયિકવાચસિકસંયમસ્સ કથિતત્તા. આહારે ઉદરે યતોતિ પરિભુઞ્જિતબ્બઆહારે સંયતભાવદસ્સનેન પરિભુઞ્જિતબ્બતાય ચતૂસુપિ પચ્ચયેસુ સંયતભાવો દીપિતોતિ આહ ‘‘આહારમુખેના’’તિઆદિ. સંયતભાવો ચેત્થ પચ્ચયહેતુ અનેસનાભાવોતિ વુત્તં ‘‘નિરુપક્કિલેસોતિ અત્થો’’તિ. ભોજનસદ્દો આહારપરિભોગે નિરુળ્હોતિ કત્વા વુત્તં ‘‘ભોજને મત્તઞ્ઞુતામુખેના’’તિ. પરિભુઞ્જનટ્ઠેન પન ભોજનસદ્દમુખેનાતિ વુત્તે અધિપ્પેતત્થો લબ્ભતેવ. તેનાતિ કાયગુત્તાતિઆદિવચનેન. ન વિલુમ્પન્તીતિ ‘‘દીપેતી’’તિ પદં આનેત્વા સમ્બન્ધો.

દ્વીહાકારેહીતિ અદિટ્ઠાદીનં અદિટ્ઠાદિવસેન દિટ્ઠાદીનઞ્ચ દિટ્ઠાદિવસેનાતિ એવં દ્વિપ્પકારેહિ. અવિસંવાદનં અવિતથકથનં. છેદનં મૂલપ્પદેસે નિકન્તનં. લુનનં યત્થ કત્થચિ છેદનં. ઉપ્પાટનં ઉમ્મૂલનં. અસિતેનાતિ દત્તેન, લાયિતેનાતિ અત્થો. વિસંવાદનસઙ્ખાતાનં તિણાનં, અટ્ઠન્નં અનરિયવોહારાનન્તિ અત્થો. યથાભૂતઞાણન્તિ નામ રૂપપરિચ્છેદકઞાણં. સચ્ચન્તિ વેદિતબ્બં અવિપરીતવુત્તિકત્તા ‘‘છેદકં’’ છિન્દનકં. નિદ્દાનન્તિ નિદ્દાયકં. ઇદમેવ સચ્ચં મોઘમઞ્ઞન્તિ દિટ્ઠિ ‘‘દિટ્ઠિસચ્ચ’’ન્તિ વુચ્ચતિ. દ્વીસુ વિકપ્પેસૂતિ ભાવકત્તુસાધનવસેન દ્વીસુ વિકપ્પેસુ. ‘‘નિદ્દાન’’ન્તિ ઉપયોગવસેનેવ અત્થો.

સીલમેવ ‘‘સોરચ્ચ’’ન્તિ વુત્તં ‘‘પાણાતિપાતાદીહિ સુટ્ઠુ ઓરતસ્સ કમ્મ’’ન્તિ કત્વા. સઙ્ખારદુક્ખાદીનં અભાવતો સુન્દરભાવતો સુન્દરે નિબ્બાને આરમ્મણકરણવસેન રતત્તા સુરતો, અરહા. તસ્સ ભાવો સોરચ્ચં, અરહત્તં. અપ્પમોચનમેવ અચ્ચન્તાય પમોચનં ન હોતિ.

યદગ્ગેન વિપસ્સનાય પઞ્ઞાય તંસહગતવીરિયસ્સ ચ નઙ્ગલધોરય્હતા, તથાપવત્તકુસલભાવનાય ચ કસિભાવો ચ, તદગ્ગેન તતો પુરેતરં પવત્તપઞ્ઞાવીરિયપારમીનં નઙ્ગલધોરય્હતા, તથાપવત્તકુસલભાવનાય ચ કસિભાવો વેદિતબ્બોતિ દસ્સેન્તો ‘‘યથા હી’’તિઆદિમાહ. ધુરં વહતીતિ ધોરય્હં. યથાવુત્તં ઘનન્તિ અસ્મિમાનાદિભેદં ઘનં. વહિતબ્બા આદિભૂતા ધુરા એતેસં અત્થીતિ ધુરા, પુરિમધુરવાહકા. તંમૂલકા અપરં ધુરં વહન્તા ધોરય્હા. ધુરા ચ ધોરય્હા ચ ધુરધોરય્હં એકત્તવસેન. વહન્તન્તિ કસનેન પવત્તન્તં.

કામયોગાદીહિ યોગેહિ ખેમત્તા અનુપદ્દવત્તા. તં નિબ્બાનં અધિકિચ્ચ ઉદ્દિસ્સ. વાહીયતિ વિપસ્સનાય સહગતં. અભિમુખં વાહીયતિ મગ્ગપરિયાપન્નં. ખેત્તકોટિન્તિ ખેત્તમરિયાદં. દિટ્ઠેકટ્ઠેતિ દિટ્ઠિયા સહજાતેકટ્ઠે પહાનેકટ્ઠે ચ. ઓળારિકેતિ ઉપરિમગ્ગવજ્ઝે ઉપાદાય વુત્તં, અઞ્ઞથા દસ્સનપહાતબ્બાપિ દુતિયમગ્ગવજ્ઝેહિ ઓળારિકાતિ. અણુસહગતેતિ અણુભૂતે. ઇદં હેટ્ઠિમમગ્ગવજ્ઝે ઉપાદાય વુત્તં. સબ્બકિલેસે અવસિટ્ઠસબ્બકિલેસે પજહન્તં અનિવત્તન્તં ગચ્છતિ પુન પહાતબ્બતાય અભાવતો. અનિવત્તન્તન્તિ ન નિવત્તન્તં, યથા નિવત્તનં ન હોતિ, એવં ગચ્છતીતિ અત્થો. તેનાહ ‘‘નિવત્તનરહિત’’ન્તિઆદિ. એતં પન તવ ધુરધોરય્હં.

એવમેસા કસીતિ યથાવુત્તસ્સ પચ્ચામસનં. તેનાહ ‘‘નિગમનં કરોન્તો’’તિ. વુત્તસ્સેવ હિ અત્થસ્સ પુન વચનં. પઞ્ઞાનઙ્ગલેન સતિફાલં આકોટેત્વાતિ પઞ્ઞાસઙ્ખાતેન નઙ્ગલેન સદ્ધિં સતિફાલસ્સ એકાબદ્ધભાવકરણેન આકોટેત્વા. કટ્ઠાતિ એત્થ ‘‘કસી’’તિ પદં આનેત્વા સમ્બન્ધિતબ્બં ‘‘કટ્ઠા કસી’’તિ. કમ્મપરિયોસાનન્તિ યથાવુત્તકસિકમ્મસ્સ પરિયોસાનભૂતં. યદિપિ પુબ્બે ‘‘પઞ્ઞા મે યુગનઙ્ગલ’’ન્તિઆદિના અત્તુદ્દેસિકવસેનાયં અમતપ્ફલા કસિ દસ્સિતા, મહાકારુણિકસ્સ પન ભગવતો દેસના સબ્બસ્સપિ સત્તનિકાયસ્સ સાધારણા એવાતિ દસ્સેન્તો ‘‘સા ખો પનેસા’’તિઆદિમાહ.

દિવસેયેવાતિ તંદિવસે એવ. આદિમાહાતિ એત્થ આદિ-સદ્દેન કથાપરિયોસાને પાઠપદેસો ગહિતોતિ તદઞ્ઞં ‘‘એવં વુત્તે’’તિઆદિપાઠં સન્ધાય ‘‘તતો પરઞ્ચા’’તિ આહ.

કસિભારદ્વાજસુત્તવણ્ણના નિટ્ઠિતા.

૨. ઉદયસુત્તવણ્ણના

૧૯૮. એતં વુત્તન્તિ ‘‘ઓદનેન પૂરેસી’’તિ એતં વચનં વુત્તં. ‘‘ગહેતું સમત્થો નામ નાહોસીતિ ભગવતો અધિટ્ઠાનબલેના’’તિ વદન્તિ. તં બ્રાહ્મણં વિનેતુકામતાય કિર ભગવા તથા અકાસિ.

ઉપારમ્ભભયેનાતિ પરૂપવાદભયેન. અવત્વાવ નિવત્તો ‘‘અબ્ભાગતોપિ પાસણ્ડો વાચામત્તેનપિ ન પૂજેતબ્બો’’તિ બ્રાહ્મણધમ્મે વુત્તત્તા. પક્કન્તોતિ બ્રાહ્મણસ્સ ધમ્મં અવત્વા પક્કન્તો બ્રાહ્મણસ્સ ન તાવ ઞાણં પરિપક્કન્તિ. એતં વચનં…પે… મગમાસિ ‘‘પુનપ્પુનઞ્ચેવ વપન્તિ બીજ’’ન્તિઆદિના ધમ્મં કથેતું અવસ્સં આકઙ્ખન્તો. પકારતો કસ્સતીતિ પકટ્ઠકો, રસતણ્હાય પકટ્ઠોતિ અત્થો. તેનાહ ‘‘રસગિદ્ધો’’તિ.

‘‘પુનપ્પુનઞ્ચેવ વપન્તિ બીજ’’ન્તિ ઇમં દેસનં આરભીતિ સમ્બન્ધો. બીજન્તિ ચ ઇતિ-સદ્દો નિદસ્સનત્થો વા. તેન અવયવેન સમુદાયં નિદસ્સેતિ. ઓસક્કસીતિ સઙ્કોચસિ. વુત્તન્તિ વપનં કતં. તસ્મા વુત્તં ‘‘અલમેત્તાવતા’’તિ. ‘‘વસ્સિત્વા’’તિ વુટ્ઠિં પવત્તેત્વા.

દેસના…પે… દસ્સેતિ બ્રાહ્મણેન વુત્તં અયુત્તવચનં પરિવટ્ટેન્તોપિ દિવસે દિવસે ભિક્ખાચરિયા નામ ભિક્ખૂનં કાયગતા વુત્તીતિ. ખીરં હત્થેન નયન્તીતિ વા ખીરનિકા. કિલમતીતિ તંતંકિચ્ચકરણવસેન ખિજ્જતિ. ફન્દતીતિ અનત્થસમાયોગવસેન વિપ્ફન્દતિ. અપુનબ્ભવાયાતિ આયતિં અનુપ્પત્તિયા. મગ્ગો નામાતિ ઉપાયો નામ નિબ્બાનં, તસ્મિં લદ્ધે પુનબ્ભવાભાવતો. ‘‘પુનપ્પુન’’ન્તિ વચનં ઉપાદાય બીજવપનાદયો પુનપ્પુનધમ્મા નામ જાતાતિ આહ ‘‘સોળસ પુનપ્પુનધમ્મે દેસેન્તેના’’તિ.

ઉદયસુત્તવણ્ણના નિટ્ઠિતા.

૩. દેવહિતસુત્તવણ્ણના

૧૯૯. ઉદરવાતેહીતિ વાતકતવિજ્ઝનતોદનાદિવસેન અપરાપરં વત્તમાનેહિ ઉદરવાતેહિ, તસ્સ વા વિકારેહિ. નિબદ્ધુપટ્ઠાકકાલે પન ધમ્મભણ્ડાગારિકોવ. અરઞ્ઞન્તિ ભગવતો ભિક્ખૂનઞ્ચ વસનટ્ઠાનભૂતં તપોવનં. તં નિદ્ધૂમં હોતિ ઉદકતાપનસ્સપિ અકરણતો. તસ્માતિ યસ્મા તસ્સ ઉણ્હોદકવિક્કિણનચરિયાય જીવિકાકપ્પનં હોતિ, તસ્મા.

વત્તમેતં તસ્સ પતિકારત્થં પરિકથાદીનમ્પિ કાતું લબ્ભનતો. ઇદાનિ તત્થ કારણમ્પિ સવિસયં દસ્સેતું ‘‘વણ્ણં હી’’તિઆદિ વુત્તં. ભગવા હિ આયસ્મતો ઉપવાણસ્સ દેવહિતબ્રાહ્મણસ્સ તં સમ્ભાવિતં ભવિસ્સતિ તિકિચ્છાપટિયત્તં, તાય ચ અત્તનો રોગસ્સ વૂપસમનં, તપ્પસઙ્ગેન ચ દેવહિતબ્રાહ્મણો મમ સન્તિકં આગન્ત્વા ધમ્મસ્સવનેન સરણેસુ સીલેસુ ચ પતિટ્ઠહિસ્સતીતિ સબ્બમિદં ઞત્વા એવં ‘‘ઇઙ્ઘ મે ત્વં, ઉપવાણ, ઉણ્હોદકં જાનાહી’’તિ અવોચ. આગમનીયપ્પટિપદં પુબ્બભાગપ્પટિપદં પુબ્બભાગપ્પટિપત્તિં કથેતું વટ્ટતિ અનુત્તરિમનુસ્સધમ્મત્તા. સદેવકેન લોકેનાતિ અનવસેસતો લોકસ્સ ગહણં. ફલવિસેસાકઙ્ખાય પૂજેતબ્બાતિ પૂજનીયા, તે એવ ઇધ ‘‘પૂજનેય્યા’’તિ વુત્તા. તથા આદરેન પૂજેતબ્બતાય સક્કારિયા, આ-કારસ્સ રસ્સત્તં, રિ-સદ્દસ્સ ચ રે-આદેસં કત્વા ‘‘સક્કરેય્યા’’તિ વુત્તં. ‘‘અપચયેય્યા’’તિ વત્તબ્બે ય-કારલોપં કત્વા ‘‘અપચેય્યા’’તિ વુત્તં. તેસન્તિ સદેવકેન પૂજનેય્યાદીનં. હરિતુન્તિ નેતું.

એત્તકેનપીતિ ઉપસઙ્કમનાદિના એત્તકેન અપ્પમત્તકેનપિ કતવત્તેન અયં કિત્તિ…પે… સોમનસ્સજાતો.

યજમાનસ્સાતિ દેય્યધમ્મં દેન્તસ્સ. દક્ખિણાય ઇજ્ઝનં નામ વિપુલફલભાવોતિ આહ ‘‘મહપ્ફલો હોતી’’તિ. વિદિતન્તિ પટિવિદ્ધપચ્ચક્ખકતં. આજાનાતીતિ વુત્થભવાદિં પરિયાદાય જાનાતિ પટિવિજ્ઝતિ. જાનિત્વાતિ ચત્તારિ સચ્ચાનિ મગ્ગપટિપાટિયા પટિવિજ્ઝિત્વા. અગ્ગપ્પત્તતાય કતકિચ્ચતં પત્તો. બ્રાહ્મણેન અત્તના કતો કારો ચ ભગવતો એવ પચ્ચુપટ્ઠાતીતિ તં દસ્સેન્તો ‘‘ઇમિના ખીણાસવે યજનાકારેન યજન્તસ્સા’’તિ વુત્તં.

દેવહિતસુત્તવણ્ણના નિટ્ઠિતા.

૪. મહાસાલસુત્તવણ્ણના

૨૦૦. યસ્મા તસ્સ બ્રાહ્મણસ્સ અનિસ્સયસ્સ જિણ્ણભાવેન વિસેસતો કાયો લૂખો જાતો, જિણ્ણપિલોતિકખણ્ડેહિ સઙ્ઘટિતં પાવુરણં, તસ્મા ‘‘લૂખપાવુરણો’’તિ પદસ્સ ‘‘જિણ્ણપાવુરણો’’તિ અત્થો વુત્તો. પાટિયેક્કન્તિ પુત્તેસુ એકમેકો એકમેકાય વાચાય વિસું વિસું.

સમ્પુચ્છનં નામ ઇધ સમ્મન્તનન્તિ આહ ‘‘સદ્ધિં મન્તયિત્વા’’તિ. નન્દિસ્સન્તિ અભિનન્દિં. અતીતત્થે હિ ઇદં અનાગતવચનં. તેનાહ ‘‘નન્દિજાતો…પે… અહોસિ’’ન્તિ. ભુસ્સન્તાતિ નિબ્ભુસ્સનવસેન રવન્તા.

વયોગતન્તિ પચ્છિમવયં ઉપગતં. સો પન યસ્મા પુરિમે દ્વે વયે અતિક્કમવસેન ગતો. પચ્છિમં એકદેસતો અતિક્કમનવસેન, તસ્મા વુત્તં – ‘‘તયો વયે ગતં અતિક્કન્તં પચ્છિમવયે ઠિત’’ન્તિ.

નિપ્પરિભોગોતિ જિણ્ણભાવેન જવપરક્કમહાનિયા અપરિભોગો ન ભુઞ્જિતબ્બો. ખાદના અપનીયતીતિ યવસં અદદન્તા તતો નીહરન્તિ નામ. થેરોતિ વુડ્ઢો.

અનસ્સવાતિ ન વચનકરા. અપ્પતિસ્સાતિ પતિસ્સયરહિતા. અવસવત્તિનોતિ ન મય્હં વસેન વત્તનકા. સુન્દરતરોતિ ઉપત્થમ્ભકારિભાવેન સુન્દરતરો.

પુરતોતિ ઉપત્થમ્ભકભાવેન પુરતો કત્વા. ઉદકે પતિટ્ઠં લભતિ તત્થ પતિટ્ઠતો થિરપતિટ્ઠભાવતો. અદ્ધપતિટ્ઠો હિ દણ્ડો દણ્ડધરપુરિસસ્સ પતિટ્ઠં લભાપેતિ.

બ્રાહ્મણિયોતિ અત્તનો બ્રાહ્મણિયો. પાટિયેક્કન્તિ ‘‘અસુકસ્સ ગેહે અસુકસ્સ ગેહે’’તિ એવં ઉદ્દેસિકં કત્વા વિસું વિસું. મા નિય્યાદેહિ, અમ્હાકં રુચ્ચનટ્ઠાનમેવાતિ તવ પુત્તાનં ગેહેસુ યં અમ્હાકં રુચ્ચનટ્ઠાનં. તત્થમેવ ગમિસ્સામાતિ સબ્બેસમ્પિ એતેસં અનુગ્ગહં કાતુકામો ભગવા એવમાહ.

તતો પટ્ઠાયાતિ સોતાપત્તિફલપટિલાભતો પટ્ઠાય. યદત્થં મયં ઇમસ્સ બ્રાહ્મણસ્સ મહાસમ્પત્તિદાનાદિના અનુગ્ગહો કતો, સો ચસ્સ પુત્તપરિજનસ્સપિ અત્થો સિદ્ધોતિ સત્થા ન સબ્બકાલં તસ્સ બ્રાહ્મણસ્સ પુત્તાનં ગેહં અગમાસિ, તે એવ પન કાલેન કાલં સત્થુ સન્તિકં ગન્ત્વા યથાવિભવં સક્કારસમ્માનં અકંસૂતિ અધિપ્પાયો.

મહાસાલસુત્તવણ્ણના નિટ્ઠિતા.

૫. માનત્થદ્ધસુત્તવણ્ણના

૨૦૧. માનેન થદ્ધોતિ ‘‘અયં ખો’’તિઆદિના પગ્ગહિતેન માનેન થદ્ધો બજ્ઝિતચિત્તો થદ્ધઅયોસલાકો વિય કસ્સચિપિ અનોનતો. ન કિઞ્ચિ જાનાતિ લોકે પટિસન્થારમત્તસ્સપિ અજાનનતો.

અબ્ભુતવિત્તજાતાતિ સઞ્જાતઅબ્ભુતવિત્તા. વિત્તં વિત્તીતિ ચ તુટ્ઠિપરિયાયા. અભૂતપુબ્બાયાતિ યા તસ્સા પરિસાય વિત્તિ તદા ભૂતા, સા ઇતો પુબ્બે અભૂતા. તેનાહ ‘‘અભૂત…પે… સમન્નાગતા’’તિ. અસ્સ પુગ્ગલસ્સાતિ અનેન પુગ્ગલેન. અપચિતાતિ પરમનિપચ્ચેન પૂજનીયસામઞ્ઞતો તત્થ અત્તનો પક્ખિપનં ઇધ દેસનાકોસલ્લં.

માનત્થદ્ધસુત્તવણ્ણના નિટ્ઠિતા.

૬. પચ્ચનીકસુત્તવણ્ણના

૨૦૨. ‘‘સબ્બં સેત’’ન્તિ કેનચિ વુત્તે તસ્સ પચ્ચનીકં કરોન્તસ્સેવ અસ્સ બ્રાહ્મણસ્સ. વિનેત્વાતિ વિનાસેત્વા. સુણાતીતિ અત્થોતિ ‘‘સુણાતી’’તિ કિરિયાપદં આહરિત્વા ગાથાય અત્થો વેદિતબ્બો ‘‘જઞ્ઞા સુભાસિત’’ન્તિ વુત્તત્તા. ન હિ અસુત્વા દેસિતં જાનિતું સક્કોન્તિ.

પચ્ચનીકસુત્તવણ્ણના નિટ્ઠિતા.

૭. વનકમ્મિકસુત્તવણ્ણના

૨૦૩. વનકમ્મે નિયુત્તો, કિરિયમાનેન વનકમ્મં એતસ્સ અત્થીતિ વનકમ્મિકો. ઇમસ્મિં વનસણ્ડેતિ ઇમસ્મિં એવંમહન્તે વનસણ્ડે. ન મે વનસ્મિં કરણીયમત્થિ યથા, ‘‘બ્રાહ્મણ, તુય્હ’’ન્તિ અધિપ્પાયો. ઇતરં પન યં મહાકિલેસવનં, તં મગ્ગઞાણફરસુના સમાધિમયસિલાયં સુનિસિતેન સબ્બસો ઉચ્છિન્નમૂલં, તતો એવ નિબ્બનથો નિક્કિલેસગહનો. વિવેકાભિરતિયા એકકો અભિરતો પટિપક્ખવિગમેન. તેનાહ ‘‘અરતિં…પે… જહિત્વા’’તિ.

વનકમ્મિકસુત્તવણ્ણના નિટ્ઠિતા.

૮. કટ્ઠહારસુત્તવણ્ણના

૨૦૪. ધમ્મન્તેવાસિકાતિ કિઞ્ચિપિ ધનં અદત્વા કેવલં અન્તેવાસિકા. તેનાહ ‘‘વેય્યાવચ્ચં કત્વા સિપ્પુગ્ગણ્હનકા’’તિ. ગમ્ભીરસભાવેતિ સમન્તતો દૂરતો ગહનસચ્છન્નવિપુલતરરુક્ખગચ્છલતાય ચ, તદા હિમપિણ્ડસિન્નભાવેન મયૂરયાનેહિ પતિટ્ઠાતું અસક્કુણેય્યતાય ચ ગમ્ભીરભાવે.

બહુભેરવેતિ બહુભયાનકે. અનિઞ્જમાનેનાતિ ઇત્થમ્ભૂતત્થે કરણવચનં. અતિસુન્દરં વતાતિ એવં સન્તે નામ અરઞ્ઞે એવં નિચ્ચલકાયો નિસિન્નો ઝાયન્તો અતિવિય સુન્દરઞ્ચ ઝાનં ઝાયસીતિ વદતિ.

અચ્છેરરૂપન્તિ અચ્છરિયભાવં. સેટ્ઠપ્પત્તિયાતિ સેટ્ઠભાવપ્પત્તિયા.

‘‘લોકાધિપતિસહબ્યતં આકઙ્ખમાનો’’તિ ઇમિના બ્રાહ્મણો લોકાધિપતિસહયોગં પુચ્છતિ, ‘‘કસ્મા ભવ’’ન્તિઆદિના પન તદઞ્ઞવિસેસાકઙ્ખં પુચ્છતીતિ આહ ‘‘અપરેનપિ આકારેન પુચ્છતી’’તિ.

કઙ્ખાતિ તણ્હા અભિક્ખણવસેન પવત્તા. અનેકસભાવેસૂતિ રૂપાદિવસેન અજ્ઝત્તિકાદિવસેન એવં નાનાસભાવેસુ આરમ્મણેસુ. અસ્સાદરાગો લોભો અભિજ્ઝાતિ નાનપ્પકારા. સેસકિલેસા વા દિટ્ઠિમાનદોસાદયો. નિચ્ચકાલં અવસ્સિતા સત્તાનં અવસ્સયભાવત્તા. પજપ્પાપનવસેનાતિ પકારેહિ તણ્હાયનવસેન. નિરન્તાતિ અન્તરહિતા નિરવસેસા.

અનુપગમનોતિ અનુપાદાનો. સબ્બઞ્ઞુતઞ્ઞાણં દીપેતિ, તસ્સ હિ વસેન એવ નાનાસભાવેસુ ભગવા સમન્તચક્ખુના પસ્સતીતિ ‘‘સબ્બે…પે… દસ્સનો’’તિ વુચ્ચતિ. અરહત્તં સન્ધાયાહ, તઞ્હિ નિપ્પરિયાયતો ‘‘અનુત્તર’’ન્તિ વુચ્ચતિ.

કટ્ઠહારસુત્તવણ્ણના નિટ્ઠિતા.

૯. માતુપોસકસુત્તવણ્ણના

૨૦૫. ઇતોતિ મનુસ્સત્તભાવતો. પટિગન્ત્વાતિ અભિગન્ત્વા. સગ્ગે હિ નિબ્બત્તન્તો કમ્મફલેન ધમ્મતાવસેન પટિસન્ધિકાલતો પટ્ઠાય અભિરતિવસેન અભિરમતિ એવ નામાતિ.

માતુપોસકસુત્તવણ્ણના નિટ્ઠિતા.

૧૦. ભિક્ખકસુત્તવણ્ણના

૨૦૬. વિરૂપં ગન્ધં પસવતીતિ વિસ્સો, દુગ્ગન્ધો. બાહિત્વાતિ અત્તનો સન્તાનતો બહિકત્વા નીહરિત્વા. તં પન અનવસેસતો પજહનન્તિ આહ ‘‘અગ્ગમગ્ગેન જહિત્વા’’તિ. સઙ્ખાયતિ સમ્મદેવ પરિચ્છિન્દતિ એતાયાતિ સઙ્ખા, ઞાણન્તિ આહ ‘‘સઙ્ખાયાતિ ઞાણેના’’તિ. ભિન્નકિલેસત્તાતિ નિરુત્તિનયેન ભિક્ખુસદ્દસિદ્ધિમાહ.

ભિક્ખકસુત્તવણ્ણના નિટ્ઠિતા.

૧૧. સઙ્ગારવસુત્તવણ્ણના

૨૦૭. પચ્ચેતીતિ પત્તિયાયતિ સદ્દહતિ. તથાભૂતો ચ તમત્થં નિકામેન્તો નામ હોતીતિ વુત્તં ‘‘ઇચ્છતિ પત્થેતી’’તિ. સાધુ, ભન્તેતિ એત્થ સાધુ-સદ્દો આયાચનત્થો, ન અભિનન્દનત્થોતિ ‘‘આયાચમાનો આહા’’તિ વત્વા આયાચને કારણં દસ્સેન્તો ‘‘થેરસ્સ કિરા’’તિઆદિમાહ. ઉદકસુદ્ધિકો ન એકંસેન અપાયૂપગો, લદ્ધિયા પન સાવજ્જકિલેસભૂતભાવતો આયાચતિ. અઞ્ઞં કારણં અપદિસન્તો ‘‘અપિચા’’તિઆદિમાહ. ફલભૂતો અત્થો એતસ્સાતિ અત્થવસં, કારણન્તિ આહ ‘‘અત્થાનિસંસં અત્થકારણ’’ન્તિ. પપઞ્ચસૂદનિયં પન ફલેનેવ અરણીયતો અત્થો, કારણન્તિ કત્વા ‘‘અત્થો એવ અત્થવસો, તસ્મા દ્વે અત્થવસેતિ દ્વે અત્થે દ્વે કારણાની’’તિ વુત્તં.

સઙ્ગારવસુત્તવણ્ણના નિટ્ઠિતા.

૧૨. ખોમદુસ્સસુત્તવણ્ણના

૨૦૮. એવંલદ્ધનામં પિણ્ડાય પાવિસીતિ યોજના. એવમેવન્તિ કેનચિ અનિમન્તિતેન સયમેવ ઉપસઙ્કમન્તે. અફાસુકધાતુકન્તિ અયુત્તરૂપં. સભાધમ્મન્તિ સભાય ચરિતબ્બં ચારિત્તધમ્મં. અસઞ્ચાલેત્વાતિ આસનતો અવુટ્ઠાપેત્વા. ઉજુકમેવ આગચ્છતિ લોકગ્ગનાયકો ભગવા સબ્બસત્તુત્તમો અત્તનો ઉત્તરિતરસ્સ અભાવતો લોકસ્સ અપચિતિં ન દસ્સેતિ. યે સબ્બસો સંકિલેસે પજહન્તિ, તેવ પણ્ડિતે ‘‘સન્તો’’તિ દસ્સેતિ ‘‘એતે’’તિઆદિના.

ખોમદુસ્સસુત્તવણ્ણના નિટ્ઠિતા.