૧. છેત્વાસુત્તવણ્ણના

૭૧. વધિત્વાતિ હન્ત્વા વિનાસેત્વા. અપરિદય્હમાનત્તાતિ અપીળિયમાનત્તા. વિનટ્ઠદોમનસ્સત્તા ન સોચતિ ચેતોદુક્ખદુક્ખાભાવતો. વિસં નામ દુક્ખં અનિટ્ઠભાવતો, તસ્સ મૂલકારણં કોધો અનિટ્ઠફલત્તાતિ આહ ‘‘વિસમૂલસ્સાતિ દુક્ખવિપાકસ્સા’’તિ. અક્કુટ્ઠસ્સાતિ અક્કોસાપરાધસ્સ. અક્કોસપહારત્થસમ્બન્ધેન હિ ‘‘કુદ્ધસ્સા’’તિ ઉપયોગત્થે સમ્પદાનવચનં. સુખં ઉપ્પજ્જતિ કોધં નસ્સતિ. સુખુપ્પત્તિં સન્ધાય એસ કોધો ‘‘મધુરગ્ગો’’તિ વુત્તો, સુખાવસાનોતિ અત્થો.

છેત્વાસુત્તવણ્ણના નિટ્ઠિતા.