૫. અરહન્તસુત્તવણ્ણના

૨૫. કતાવીતિ કતવા, પરિઞ્ઞાદિકિચ્ચં કત્વા નિટ્ઠપેત્વા ઠિતોતિ અત્થો. તેનાહ ‘‘ચતૂહિ મગ્ગેહિ કતકિચ્ચો’’તિ. સ્વાયમત્થો અરહન્તિઆદિસદ્દસન્નિધાનતો વિઞ્ઞાયતિ. એવં ‘‘અહં વદામી’’તિઆદિઆકારેન પુચ્છતિ.

ખન્ધાદીસુ કુસલોતિ ખન્ધાયતનાદીસુ સલક્ખણાદીસુ ચ સમૂહાદિવસેન પવત્તિયઞ્ચ છેકો યથાભૂતવેદી. ઉપલદ્ધિનિસ્સિતકથન્તિ અત્તુપલદ્ધિનિસ્સિતકથં હિત્વા. વોહારભેદં અકરોન્તોતિ ‘‘અહં પરમત્થં જાનામી’’તિ લોકવોહારં ભિન્દન્તો અવિનાસેન્તો લોકે લોકસમઞ્ઞમેવ નિસ્સાય ‘‘અહં, મમા’’તિ વદેય્ય. ખન્ધા ભુઞ્જન્તીતિઆદિના વોહારભેદં, તત્થ ચ આદીનવં દસ્સેતિ.

માનો નામ દિટ્ઠિયા સમધુરો. તથા હિ દુતિયમગ્ગાદીસુ સમ્માદિટ્ઠિયા પહાનાભિસમયસ્સ પટિવિપચ્ચનીકે પટિપત્તિસિદ્ધિ. તેનાહ ‘‘યદિ દિટ્ઠિયા વસેન ન વદતિ, માનવસેન નુ ખો વદતીતિ ચિન્તેત્વા’’તિ. વિધૂપિતાતિ સન્તાપિતા ઞાણગ્ગિના દડ્ઢા. તે પન વિદ્ધંસિતા નામ હોન્તીતિ આહ ‘‘વિધમિતા’’તિ. મમઙ્કારાદયો મયન્તિ સત્તસન્તાને સતિ પવત્તન્તિ એતેનાતિ મયો, મઞ્ઞના. મયો એવ મયતાતિ આહ ‘‘મયતન્તિ મઞ્ઞન’’ન્તિ.

અરહન્તસુત્તવણ્ણના નિટ્ઠિતા.