૨૩. અનોલોકિયનિદ્દેસવણ્ણના

૧૮૧. સારત્તોતિ સંરત્તો, સઞ્જાતરાગચિત્તોતિ અત્થો. ઇત્થિયાતિ તદહુજાતાયપિ પટસતનિવત્થાય અનોકાસુપનિજ્ઝાયને અન્તમસો તિરચ્છાનગતાનમ્પિ દુક્કટમેવ. ભિક્ખાદાયિયાતિ ઉપલક્ખણમત્તં, ઇત્થી વા હોતુ પુરિસો વા, ભિક્ખાદાનસમયે અસારત્તેનાપિ મુખં ન ઉલ્લોકેતબ્બં. ઉજ્ઝાનં લામકતો સંચિન્તનં, કોપો, તત્થ સઞ્ઞા અસ્સાતિ ઉજ્ઝાનસઞ્ઞી. ઇધ પન ગિલાનોપિ ન મુચ્ચતિ. આદાસે ઉદકપત્તેતિ ઇમિના સેસેસુ કંસપત્તાદીસુ કઞ્જિયાદીસુ ચ મુખનિમિત્તં પઞ્ઞાયતિ, તેસં સઙ્ગહો. ‘‘સઞ્છવિ નુ ખો મે વણ્ણો, નો, જિણ્ણો નુ ખોમ્હિ, નો’’તિ પન ઓલોકેતું વટ્ટતિ. અસ્સાતિ ભિક્ખુનો.

અનોલોકિયનિદ્દેસવણ્ણના નિટ્ઠિતા.