૧૯. ન્હાનકપ્પનિદ્દેસવણ્ણના

૧૬૮. કપ્પનં કપ્પિયતા કપ્પો, ન્હાને કપ્પો ન્હાનકપ્પો. નવકો થેરાનં પુરતો ઉપરિ વા ન ચ ન્હાયેય્યાતિ સમ્બન્ધો. ન ચાતિ નયેવ. પુરતોતિ અભિમુખે. ઉપરીતિ નદિયા ઉપરિ.

૧૬૯-૧૭૧. કુટ્ટત્થમ્ભતરુટ્ટાને કાયં ન ઘંસયેતિ સમ્બન્ધો. તત્થ કુટ્ટં નામ ઇટ્ઠકદારુસિલાભિત્તિ. થમ્ભો નામ નહાનતિત્થે નિખનિત્વા ઠપિતો. તરૂતિ રુક્ખો. અટ્ટાનં નામ તચ્છેત્વા અટ્ઠપદાકારેન રાજિયો છિન્દિત્વા નહાનતિત્થે નિખાતફલકં. ગન્ધબ્બહત્થેન વા…પે… મલ્લકેન વા કાયં સરીરેન વા અઞ્ઞમઞ્ઞં ન ઘંસયેતિ સમ્બન્ધો. ગન્ધબ્બહત્થેનાતિ દારુમયહત્થેન. કુરુવિન્દકસુત્તિયાતિ કુરુવિન્દકપાસાણચુણ્ણાનિ લાખાય બન્ધિત્વા કતગુળિકાવલિયા સુત્તેન આવુણિતસુત્તિયા. મલ્લકેનાતિ મકરદન્તકે છિન્દિત્વા પદુમકણ્ણિકસણ્ઠાનેન કતમલ્લકેન. સરીરેનાતિ અત્તનો કાયેન. અઞ્ઞમઞ્ઞસ્સ અઞ્ઞમઞ્ઞં કિરિયાકરણસઙ્ખાતે કિરિયાબ્યભિહારે દ્વિત્તં. કપાલ…પે… પુથુપાણિ ચ સબ્બેસં વટ્ટતીતિ સમ્બન્ધો. કપાલઞ્ચ ઇટ્ઠકા ચ, તાસં ખણ્ડાનિ. પુથુપાણીતિ પુથુ નાના પાણિ પુથુપાણિ, હત્થપરિકમ્મં રુળ્હીવસેન. સબ્બેસન્તિ ગિલાનાગિલાનાનં. ગિલાનસ્સ અકતમલ્લકં વટ્ટતીતિ સમ્બન્ધો. અકતમલ્લકં નામ કતમલ્લકવિપરીતં. ફેણં નામ સમુદ્દફેણન્તિ.

ન્હાનકપ્પનિદ્દેસવણ્ણના નિટ્ઠિતા.