૩૩. કાયબન્ધનનિદ્દેસવણ્ણના

૨૩૫. અકાયબન્ધનોતિ કાયબન્ધનં અબન્ધિત્વાતિ અત્થો. તતો પટ્ઠાય ચીવરં પારુપિતબ્બં, તતો પટ્ઠાય એવ કાયબન્ધનં બન્ધિતબ્બં. ‘‘ન ભિક્ખવે અકાયબન્ધનેન ગામો પવિસિતબ્બો. યો પવિસેય્ય, આપત્તિ દુક્કટસ્સા’’તિ (ચૂળવ. ૨૭૮) હિ વુત્તં. તત્થેવાસતિયા ગતોતિ અસતિયા ગતો યત્થ સરતિ, તત્થેવ બન્ધિતબ્બં. સરિત્વા પન યાવ ન બન્ધતિ, તાવ પિણ્ડાય ચરિતું ન વટ્ટતિ. યદિ અન્તોગામે સરતિ, કાયબન્ધને સતિ એકમન્તે ઠત્વા બન્ધિતબ્બં, અસતિ ચે નિક્ખમિત્વા બન્ધિત્વા પુન પિણ્ડાય પવિસિતબ્બન્તિ વદન્તિ.

૨૩૬. ‘‘અનુજાનામિ, ભિક્ખવે, દ્વે કાયબન્ધનાનિ પટ્ટિકં સૂકરન્તક’’ન્તિ (ચૂળવ. ૨૭૮) વુત્તત્તા ‘‘દુવિધ’’ન્તિ વુત્તં. તત્થ સૂકરન્તં નામ કુઞ્ચિકાકોસકા વિય અન્તે સુસિરં કત્વા કોટ્ટિતં. રજ્જુ ચ એકાતિ એકવટ્ટા રજ્જુ ચ. તદનુલોમિકાતિ તેસં દ્વિન્નં અનુલોમિકા.

૨૩૭. મચ્છકણ્ડકખજ્જુરી-પત્તા મટ્ઠા ચ પટ્ટિકાતિ એત્થ (ચૂળવ. અટ્ઠ. ૨૭૮) એતે મચ્છકણ્ટકાદયો મટ્ઠા વિકારરહિતા પટ્ટિકા ચ તદન્તોગધાતિ અધિપ્પાયો. લબ્ભા દસા ચતસ્સોતિ એકાય વા દ્વીસુ વા તીસુ વા કથા એવ નત્થીતિ અધિપ્પાયો, તતો પરં ન વટ્ટતિ. અન્તેસૂતિ ઉભોસુ અન્તેસુ. ગુણસુત્તકન્તિ દિગુણસુત્તકં.

૨૩૯. મકરમુખાદિન્તિ આદિ-સદ્દેન દેડ્ડુભસીસં ગહિતં. ઉભન્તેતિ ઉભોસુ અન્તેસુ. કસ્સાતિ? વિધસ્સ. ઘટકાતિ ઘટકતો. લેખાતિ લેખાય. ઘટકતો ચ લેખાય ચ અઞ્ઞં ચિત્તકં ન કપ્પતીતિ અત્થો.

૨૪૦. દેડ્ડુભકન્તિ (ચૂળવ. ૨૭૮; ચૂળવ. અટ્ઠ. ૨૭૮) ઉદકસપ્પસિરસદિસં. મુરજન્તિ બહુરજ્જુકે એકતો સઙ્કડ્ઢિત્વા એકાય રજ્જુયા પલિવેઠેત્વા કતરજ્જુ. મદ્દવીણન્તિ પામઙ્ગસદિસં. કલાબુકન્તિ અનેકવટ્ટં. એતાનિ પન સબ્બાનિ ન કપ્પન્તિ. દસાસુ દ્વે મજ્ઝિમાતિ મુરજં મદ્દવીણન્તિ દ્વે મજ્ઝિમા એવ. કપ્પરેતિ કપ્પન્તીતિ અત્થો.

૨૪૧. ગણ્ઠિયો ચાપીતિ (ચૂળવ. ૨૭૯) ચીવરગણ્ઠિયોપિ. વેળુઆદિમયા કપ્પન્તીતિ પસઙ્ગેન વુત્તં. કાયબન્ધનવિનિચ્છયો.

કાયબન્ધનનિદ્દેસવણ્ણના નિટ્ઠિતા.

પઠમભાણવારં.