૩૦. વત્તનિદ્દેસવણ્ણના

૨૧૩. ઇદાનિ આગન્તુકવત્તાદીનિ દસ્સેતું ‘‘વત્ત’’ન્તિ માતિકાપદં ઉદ્ધટં. પરિક્ખિત્તસ્સ (ચૂળવ. ૩૫૬ આદયો; ચૂળવ. અટ્ઠ. ૩૫૭ આદયો) વિહારસ્સ પરિક્ખેપં, અપરિક્ખિત્તસ્સ દ્વીહિ લેડ્ડુપાતેહિ પરિચ્છિન્નટ્ઠાનં પત્વા ઉપાહનં ઓમુઞ્ચિત્વા નીચં કત્વા પપ્ફોટેત્વા ઉપાહનં દણ્ડકેન ગહેત્વા છત્તં અપનામેત્વા સીસં વિવરિત્વા સીસે ચીવરં ખન્ધે કરિત્વા સાધુકં અતરમાનેન આરામો પવિસિતબ્બોતિ અત્થો.

૨૧૪. પુચ્છેય્ય સયનાસનન્તિ ‘‘કતમં મે સેનાસનં પાપુણાતિ, કિં અજ્ઝાવુત્થં વા અનજ્ઝાવુત્થં વા’’તિ એવં પુચ્છિતબ્બન્તિ અત્થો.

૨૧૫-૬. મઞ્ચપીઠાદિદારુભણ્ડઞ્ચ (ચૂળવ. ૩૬૦; ચૂળવ. અટ્ઠ. ૩૬૦) રજનભાજનાદિમત્તિકાભણ્ડઞ્ચ. આપુચ્છાતિ ભિક્ખુસ્સ વા સામણેરસ્સ વા આરામિકસ્સ વા ‘‘આવુસો ઇમં જગ્ગાહી’’તિ આરોચેત્વાતિ અત્થો. અઞ્ઞથાતિ એવં અકત્વાતિ અત્થો.

૨૧૭-૮. વુડ્ઢાગન્તુકસ્સાતિ એત્થ (ચૂળવ. ૩૫૮ આદયો; ચૂળવ. અટ્ઠ. ૩૫૯ આદયો) દૂરતોવ દિસ્વા યદિ ‘‘વુડ્ઢો’’તિ જાનાતિ, તસ્મિં અનાગતે એવ આસનપઞ્ઞાપનાદિવત્તં કાતબ્બન્તિ અત્થો. પાદોદપ્પભુતિન્તિ પાદોદકં પાદપીઠં પાદકથલિકં ઉપનિક્ખિપિતબ્બન્તિ અત્થો. પાનીયેન આપુચ્છન્તેન સચે સકિં આનીતં પાનીયં સબ્બં પિવતિ, પુનપિ આપુચ્છિતબ્બો એવ. પઞ્ઞપેતિ ‘‘એતં તુમ્હાકં સેનાસનં પાપુણાતી’’તિ એવં આચિક્ખિતબ્બન્તિ અત્થો.

૨૧૯-૨૦. ‘‘ભિક્ખાચારગામો ઇતો દૂરે’’તિ વા ‘‘સન્તિકે’’તિ વા ‘‘કાલસ્સેવ પિણ્ડાય ચરિતબ્બ’’ન્તિ વા ‘‘ઉપટ્ઠાકે ચરિતબ્બ’’ન્તિ વા ગોચરો આચિક્ખિતબ્બો. અગોચરોતિ મિચ્છાદિટ્ઠિકાનં વા ગામો, પરિચ્છિન્નભિક્ખકો વા ગામો, યત્થ એકસ્સ વા દ્વિન્નં વા ભિક્ખા દીયતિ, સો આચિક્ખિતબ્બોતિ અત્થો. કતિકન્તિ સઙ્ઘસ્સ કતિકટ્ઠાનં. ‘‘ઇમં કાલં પવિસિતબ્બં, ઇમં કાલં નિક્ખમિતબ્બ’’ન્તિ એવં પવેસનનિક્ખમનકાલં આચિક્ખિતબ્બં. કેસુચિ ઠાનેસુ અમનુસ્સા વા વાળા વા હોન્તિ, તસ્મા એવં આચિક્ખિતબ્બમેવ. નિસિન્નોવાતિ ઇદં આપત્તિઅભાવમત્તદીપકં, ઉટ્ઠહિત્વાપિ સબ્બં કાતું વટ્ટતેવ. વત્તવિનિચ્છયો.

વત્તનિદ્દેસવણ્ણના નિટ્ઠિતા.