૨૬. સમાનાસનિકનિદ્દેસવણ્ણના

૧૯૫. તિણ્ણં વસ્સાનં અન્તરં તિવસ્સન્તરં. ‘‘અનુજાનામિ, ભિક્ખવે, તિવસ્સન્તરેન સહ નિસીદિતુ’’ન્તિ (ચૂળવ. ૩૨૦) હિ વુત્તં. યો દ્વીહિ વસ્સેહિ (ચૂળવ. અટ્ઠ. ૩૨૦) વુડ્ઢો વા નવો વા, સો તિવસ્સન્તરો નામ.

૧૯૬. મુનીતિ બુદ્ધમુનિ. સબ્બેહેવાતિ અનુપસમ્પન્નેહિપિ.

૧૯૭. અન્તન્તિ પચ્છિમં. ‘‘અનુજાનામિ, ભિક્ખવે, યં તિણ્ણં પહોતિ, એત્તકં પચ્છિમં દીઘાસન’’ન્તિ (ચૂળવ. ૩૨૦) વુત્તત્તા યં તિણ્ણં પહોતિ, એતં સંહારિમં વા હોતુ અસંહારિમં વા, તથારૂપેસુ ફલકખણ્ડેસુપિ નિસીદિતું વટ્ટતિ. દ્વિન્નન્તિ દ્વિન્નં સમાનાસનિકાનં. ‘‘અનુજાનામિ, ભિક્ખવે, દુવગ્ગસ્સ મઞ્ચં દુવગ્ગસ્સ પીઠ’’ન્તિ (ચુળવ. ૩૨૦) વુત્તત્તા દ્વે સમાનાસનિકા સહ નિસીદિતું લભન્તિ. અઞ્ઞેહિ અસમાનાસનિકેહિ, અનુપસમ્પન્નાદીહિ વા દ્વે હુત્વાપિ નિસીદિતું ન લભન્તિ. સમાનાસનિકવિનિચ્છયો.

સમાનાસનિકનિદ્દેસવણ્ણના નિટ્ઠિતા.