૨૨. ઉપાહનનિદ્દેસવણ્ણના

૧૭૫. ગુણઙ્ગુણૂપાહનાતિ (મહાવ. અટ્ઠ. ૨૪૫) ચતુપટલતો પટ્ઠાય વુચ્ચતિ, ન એકદ્વિતિપટલતો પટ્ઠાય ‘‘અનુજાનામિ, ભિક્ખવે, એકપલાસિકં ઉપાહનં, ન ભિક્ખવે દિગુણા ઉપાહના ધારેતબ્બા, ન તિગુણા ઉપાહના ધારેતબ્બા, ન ગુણઙ્ગુણૂપાહના ધારેતબ્બા, યો ધારેય્ય, આપત્તિ દુક્કટસ્સા’’તિ (મહાવ. ૨૪૫) વુત્તત્તા. ‘‘અનુજાનામિ, ભિક્ખવે, ઓમુક્કં ગુણઙ્ગુણૂપાહનં, ન ભિક્ખવે નવા ગુણઙ્ગુણૂપાહના ધારેતબ્બા, યો ધારેય્ય, આપત્તિ દુક્કટસ્સા’’તિ (મહાવ. ૨૪૭) વુત્તત્તા ‘‘નવા’’તિ વુત્તં. સબ્બત્થાપિ મજ્ઝિમદેસે ગિલાનોપિ નવં ગુણઙ્ગુણૂપાહનં ન લભતિ, એકવારમ્પિ અઞ્ઞેહિ પરિભુત્તં ઓમુક્કઉપાહનસઙ્ખાતં લભતિ, પચ્ચન્તિમેસુ જનપદેસુ ગિલાનો નવમ્પિ લભતીતિ વેદિતબ્બં ‘‘અનુજાનામિ, ભિક્ખવે, સબ્બપચ્ચન્તિમેસુ જનપદેસુ ગુણઙ્ગુણૂપાહન’’ન્તિ (મહાવ. ૨૫૯) અવિસેસેન વુત્તત્તા.

સબ્બસ્સાતિ ગિલાનસ્સાપિ અગિલાનસ્સાપીતિ અત્થો. મજ્ઝિમદેસેપિ પચ્ચન્તિમદેસેપિ આરામે આરામૂપચારે ગિલાનસ્સાપિ અગિલાનસ્સાપિ ‘‘અનુજાનામિ, ભિક્ખવે, અજ્ઝારામે ઉપાહનં ધારેતુ’’ન્તિ (મહાવ. ૨૪૯) વુત્તત્તા કપ્પિયન્તિ અત્થો. સબ્બત્થાતિ આરામેપિ ગામેપિ. અકલ્લકસ્સાતિ ગિલાનસ્સ. એત્થ પન મજ્ઝિમદેસે ગિલાનસ્સ ગુણઙ્ગુણૂપાહના પરિભુત્તાવ આરામેપિ ગામેપિ વટ્ટતિ, પચ્ચન્તિમદેસે અપરિભુત્તાપિ. મજ્ઝિમદેસેપિ પચ્ચન્તિમદેસેપિ ભગવતા ગિલાનસ્સેવ ઉપાહના અનુઞ્ઞાતા ‘‘અનુજાનામિ, ભિક્ખવે, યસ્સ પાદા વા દુક્ખા, પાદા વા ફલિતા, પાદખિલો વા આબાધો, ઉપાહનં ધારેતુ’’ન્તિ (મહાવ. ૨૪૯) ચ ‘‘અનુજાનામિ, ભિક્ખવે, ગિલાનેન ભિક્ખુના સઉપાહનેન ગામં પવિસિતુ’’ન્તિ (મહાવ. ૨૫૬) વુત્તત્તા ચ. મજ્ઝિમદેસે ચ ગિલાનો નવં ગુણઙ્ગુણૂપાહનં ધારેતું યદિ લભતિ, કથં પદેસપઞ્ઞત્તિ હોતીતિ? સબ્બત્થ પન ભગવતા ગિલાનસ્સેવ ઉપાહના અનુઞ્ઞાતા, તસ્મા મજ્ઝિમદેસે ગિલાનો નવં ગુણઙ્ગુણૂપાહનં લભતીતિ ગહેતબ્બન્તિ વદન્તિ.

૧૭૬-૯. સબ્બાવ નીલકા (મહાવ. ૨૪૬; મહાવ. અટ્ઠ. ૨૪૬) સબ્બનીલકા. એસ નયો સબ્બત્થ ઓદાતકાદીસુપિ. ઓદાતં પન નેવ પાળિયં, ન અટ્ઠકથાયં પટિક્ખિત્તં, અનુલોમવસેન પન ઇધ પટિક્ખિત્તન્તિ વેદિતબ્બં. મહારઙ્ગરત્તા સતપદિપિટ્ઠિવણ્ણા. મહાનામરઙ્ગરત્તા મન્દરત્તા. મઞ્જેટ્ઠિકા કણવેરપુપ્ફવણ્ણા. પુપ્ફલતાદીહિ વિચિત્તા ચિત્રા. નીલપીતાદિવદ્ધિકાતિ એત્થ આદિ-સદ્દેન ઓદાતલોહિતમઞ્જેટ્ઠિકમહારઙ્ગમહાનામરઙ્ગરત્તાદિવસેન વદ્ધિકા ગહિતા. સીહબ્યગ્ઘુદ્દાજિનદીપીનં ચમ્મેહિ ચાતિ સમ્બન્ધો. કોચીતિ ગિલાનોપિ અગિલાનોપિ.

૧૮૦. સકલં વા એકદેસકં વા રજનં ચોળેન (મહાવ. અટ્ઠ. ૨૪૬) પુઞ્છિત્વા વળઞ્જેય્યાતિ અત્થો. ખલ્લકાદિકં પન સબ્બં હારિત્વા વળઞ્જેતબ્બં. ઉપાહનવિનિચ્છયો.

ઉપાહનનિદ્દેસવણ્ણના નિટ્ઠિતા.