૫. પત્તનિદ્દેસો

પત્તો ચાતિ –

૬૦. અયોપત્તો ભૂમિપત્તો, જાતિયા કપ્પિયા દુવે;

ઉક્કટ્ઠો મજ્ઝિમો ચેવ, ઓમકો ચ પમાણતો.

૬૧. ઉક્કટ્ઠો મગધે નાળિ-દ્વયતણ્ડુલસાધિતં;

ગણ્હાતિ ઓદનં સૂપં, બ્યઞ્જનઞ્ચ તદૂપિયં.

૬૨. મજ્ઝિમો તસ્સુપડ્ઢોવ, તતોપડ્ઢોવ ઓમકો;

ઉક્કટ્ઠતો ચ ઉક્કટ્ઠો, અપત્તો ઓમકોમકો.

૬૩. અતિરેકપત્તો ધારેય્યો, દસાહપરમં સકો;

કપ્પો નિસ્સગ્ગિયો હોતિ, તસ્મિં કાલેતિનામિતે.

૬૪. અચ્છેદદાનગાહેહિ, વિબ્ભમા મરણુદ્ધટા;

લિઙ્ગસિક્ખાહિ છિદ્દેન, પત્તાધિટ્ઠાનમુજ્ઝતિ.

૬૫. પત્તં ન પટિસામેય્ય, સોદકં ન ચ ઓતપે;

ઉણ્હે ન નિદહે ભુમ્યા, ન ઠપે નો ચ લગ્ગયે.

૬૬. મિડ્ઢન્તે પરિભણ્ડન્તે, અઙ્કે વા આતપત્તકે;

પાદેસુ મઞ્ચપીઠે વા, ઠપેતું ન ચ કપ્પતિ.

૬૭. ન નીહરેય્ય ઉચ્છિટ્ઠો-દકઞ્ચ ચલકટ્ઠિકં;

પત્તેન પત્તહત્થો વા, કવાટં ન પણામયે.

૬૮. ભૂમિઆધારકે દારુદણ્ડાધારે સુસજ્જિતે;

દુવે પત્તે ઠપેય્યેકં, નિક્કુજ્જિત્વાન ભૂમિયં.

૬૯. દારુરૂપિયસોવણ્ણ-મણિવેળુરિયામયા;

કંસકાચતિપુસીસફલિકાતમ્બલોહજા.

૭૦. છવસીસમયો ચાપિ, ઘટીતુમ્બકટાહજા;

પત્તા અકપ્પિયા સબ્બે, વુત્તા દુક્કટવત્થુકાતિ.