૪૨. દેસનાનિદ્દેસો

દેસનાતિ –

૩૮૨. ચાગો યો ભિક્ખુભાવસ્સ, સા પારાજિકદેસના;

યથાવુત્તેન વુટ્ઠાનં, ગરુકાપત્તિદેસના.

૩૮૩. ઉક્કુટિકં નિસીદિત્વા, પગ્ગણ્હિત્વાન અઞ્જલિં;

થુલ્લચ્ચયાદિં દેસેય્ય, એવમેકસ્સ સન્તિકે.

૩૮૪. ‘‘અહં, ભન્તે, એકં થુલ્લચ્ચયાપત્તિં આપજ્જિં, તં તુમ્હમૂલે પટિદેસેમી’’તિ વત્વા તેન ‘‘પસ્સસિ, આવુસો, તં આપત્તિ’’ન્તિ વુત્તે ‘‘આમ, ભન્તે, પસ્સામી’’તિ વત્વા પુન તેન ‘‘આયતિં, આવુસો, સંવરેય્યાસી’’તિ વુત્તે ‘‘સાધુ સુટ્ઠુ, ભન્તે, સંવરિસ્સામી’’તિ વત્તબ્બં. ‘‘અહં, ભન્તે, દ્વે થુલ્લચ્ચયાપત્તિયો આપજ્જિં, અહં ભન્તે સમ્બહુલા થુલ્લચ્ચયાપત્તિયો આપજ્જિં, તા તુમ્હમૂલે પટિદેસેમી’’તિ વત્તબ્બં.

નિસ્સગ્ગિયેસુ પન ‘‘ઇદં મે, ભન્તે, ચીવરં દસાહાતિક્કન્તં નિસ્સગ્ગિયં, ઇમાહં આયસ્મતો નિસ્સજ્જામી’’તિ. ‘‘ઇમાનિ મે, ભન્તે, ચીવરાનિ…પે… એતં મે, ભન્તે, ચીવરં…પે… એતાનિ મે, ભન્તે, ચીવરાનિ દસાહાતિક્કન્તાનિ નિસ્સગ્ગિયાનિ, એતાનાહં આયસ્મતો નિસ્સજ્જામી’’તિ.

૩૮૫. નિસ્સજ્જિત્વાન દેસેય્ય, આપત્તિં તેન ભિક્ખુના;

પટિગ્ગહેત્વા આપત્તિં, દેય્યં નિસ્સટ્ઠચીવરં.

‘‘ઇમં, ઇમાનિ, એતં, એતાનિ ચીવરાનિ આયસ્મતો દમ્મી’’તિ.

૩૮૬. (ક) ઇદં મે, ભન્તે, ચીવરં રત્તિવિપ્પવુત્થં અઞ્ઞત્ર ભિક્ખુસમ્મુતિયા નિસ્સગ્ગિયં.

(ખ) ઇદં મે, ભન્તે, અકાલચીવરં માસાતિક્કન્તં નિસ્સગ્ગિયં.

(ગ) ઇદં મે, ભન્તે, પુરાણચીવરં અઞ્ઞાતિકાય ભિક્ખુનિયા ધોવાપિતં નિસ્સગ્ગિયં.

(ઘ) ઇદં મે, ભન્તે, ચીવરં અઞ્ઞાતિકાય ભિક્ખુનિયા હત્થતો પટિગ્ગહિતં અઞ્ઞત્ર પારિવત્તકા નિસ્સગ્ગિયં.

(ઙ) ઇદં મે, ભન્તે, ચીવરં અઞ્ઞાતકં ગહપતિકં અઞ્ઞત્ર સમયા વિઞ્ઞાપિતં નિસ્સગ્ગિયં.

(ચ) ઇદં મે, ભન્તે, ચીવરં અઞ્ઞાતકં ગહપતિકં તતુત્તરિ વિઞ્ઞાપિતં નિસ્સગ્ગિયં.

(છ) ઇદં મે, ભન્તે, ચીવરં પુબ્બે અપ્પવારિતો અઞ્ઞાતકં ગહપતિકં ઉપસઙ્કમિત્વા વિકપ્પં આપન્નં નિસ્સગ્ગિયં.

(જ) ઇદં મે, ભન્તે, ચીવરં પુબ્બે અપ્પવારિતો અઞ્ઞાતકે ગહપતિકે ઉપસઙ્કમિત્વા વિકપ્પં આપન્નં નિસ્સગ્ગિયં.

(ઝ) ઇદં મે, ભન્તે, ચીવરં અતિરેકતિક્ખત્તું ચોદનાય અતિરેકછક્ખત્તું ઠાનેન અભિનિપ્ફાદિતં નિસ્સગ્ગિયં.

(ઞ) ઇદં મે, ભન્તે, કોસિયમિસ્સકં સન્થતં કારાપિતં નિસ્સગ્ગિયં.

(ટ) ઇદં મે, ભન્તે, સુદ્ધકાળકાનં એળકલોમાનં સન્થતં કારાપિતં નિસ્સગ્ગિયં.

(ઠ) ઇદં મે, ભન્તે, સન્થતં અનાદિયિત્વા તુલં ઓદાતાનં તુલં ગોચરિયાનં કારાપિતં નિસ્સગ્ગિયં.

(ડ) ઇદં મે, ભન્તે, સન્થતં ઊનકછબ્બસ્સાનિ કારાપિતં અઞ્ઞત્ર ભિક્ખુસમ્મુતિયા નિસ્સગ્ગિયં.

(ઢ) ઇદં મે, ભન્તે, નિસીદનસન્થતં અનાદિયિત્વા પુરાણસન્થતસ્સ સામન્તા સુગતવિદત્થિં કારાપિતં નિસ્સગ્ગિયં.

(ણ) ઇમાનિ મે, ભન્તે, એળકલોમાનિ તિયોજનપરમં અતિક્કામિતાનિ નિસ્સગ્ગિયાનિ.

(ત) ઇમાનિ મે, ભન્તે, એળકલોમાનિ અઞ્ઞાતિકાય ભિક્ખુનિયા ધોવાપિતાનિ નિસ્સગ્ગિયાનિ.

(થ) અહં, ભન્તે, રૂપિયં પટિગ્ગહેસિં, ઇદં મે, ભન્તે, નિસ્સગ્ગિયં, ઇમાહં સઙ્ઘસ્સ નિસ્સજ્જામિ.

(દ) અહં, ભન્તે, નાનપ્પકારકં રૂપિયસંવોહારં સમાપજ્જિં, ઇદં મે, ભન્તે, નિસ્સગ્ગિયં, ઇમાહં સઙ્ઘસ્સ નિસ્સજ્જામીતિ.

૩૮૭. નિસ્સજ્જિત્વાન આપત્તિં, દેસેય્યાથ ગિહિં વદે;

‘‘જાનાહિમ’’ન્તિ ઇમિના, સો વદેય્યાહરામિ કિં.

૩૮૮. અવત્વામન્તિ તેલાદિં, વદે ભિક્ખૂન કપ્પિયં;

યં આહરતિ સો તેન, પરિવત્તેત્વાન કપ્પિયં.

૩૮૯. લબ્ભં ઠપેત્વા દ્વેપેતે, સેસેહિ પરિભુઞ્જિતું;

તતો અઞ્ઞેન લદ્ધોપિ, ભાગો તેસં ન કપ્પતિ.

૩૯૦. રુક્ખચ્છાયાપ્યન્તમસો, તન્નિબ્બત્તા ન કપ્પતિ;

નિસ્સટ્ઠં પટિલદ્ધમ્પિ, આદિતો સન્થતત્તયં.

૩૯૧. નો ચે લભેથ એવં સો, ઇમં છડ્ડેહિ સંસિયો;

એવમ્પિ ભિક્ખુ છડ્ડેય્ય, નો ચે લભેથ સમ્મતો.

૩૯૨. એતાનિ દુતિયો પત્તો, સઙ્ઘે સેસાનિ લબ્ભરે;

સઙ્ઘેકસ્મિં ગણે વત્તું, લબ્ભં ભાસન્તરેનપિ.

૩૯૩. (ક) અહં, ભન્તે, નાનપ્પકારકં કયવિક્કયં સમાપજ્જિં, ઇદં મે, ભન્તે, નિસ્સગ્ગિયં.

(ખ) અયં મે, ભન્તે, પત્તો દસાહાતિક્કન્તો નિસ્સગ્ગિયો.

(ગ) અયં મે, ભન્તે, પત્તો ઊનપઞ્ચબન્ધનેન પત્તેન ચેતાપિતો નિસ્સગ્ગિયો, ઇમાહં સઙ્ઘસ્સ નિસ્સજ્જામીતિ.

૩૯૪. નિસ્સજ્જિત્વાન દેસેય્ય, આપત્તિં પત્તગાહકં;

સમ્મન્નિત્વાન સઙ્ઘસ્સ, પત્તન્તં તસ્સ દાપયે.

૩૯૫. (ક) ઇદં મે, ભન્તે, ભેસજ્જં સત્તાહાતિક્કન્તં નિસ્સગ્ગિયં.

(ખ) ઇદં મે, ભન્તે, વસ્સિકસાટિકચીવરં અતિરેકમાસે સેસે ગિમ્હાને પરિયિટ્ઠં, અતિરેકડ્ઢમાસે સેસે ગિમ્હાને કત્વા પરિદહિતં નિસ્સગ્ગિયં.

(ગ) ઇદં મે, ભન્તે, ચીવરં ભિક્ખુસ્સ સામં દત્વા અચ્છિન્નં નિસ્સગ્ગિયં.

(ઘ) ઇદં મે, ભન્તે, ચીવરં સામં સુત્તં વિઞ્ઞાપેત્વા તન્તવાયેહિ વાયાપિતં નિસ્સગ્ગિયં.

(ઙ) ઇદં મે, ભન્તે, ચીવરં પુબ્બે અપ્પવારિતો અઞ્ઞાતકસ્સ ગહપતિકસ્સ તન્તવાયે ઉપસઙ્કમિત્વા વિકપ્પં આપન્નં નિસ્સગ્ગિયં.

(ચ) ઇદં મે, ભન્તે, અચ્ચેકચીવરં ચીવરકાલસમયં અતિક્કામિતં નિસ્સગ્ગિયં.

(છ) ઇદં મે, ભન્તે, ચીવરં અતિરેકછારત્તં વિપ્પવુત્થં અઞ્ઞત્ર ભિક્ખુસમ્મુતિયા નિસ્સગ્ગિયં.

(જ) ઇદં મે, ભન્તે, જાનં સઙ્ઘિકં લાભં પરિણતં અત્તનો પરિણામિતં નિસ્સગ્ગિયં, ઇમાહં આયસ્મતો નિસ્સજ્જામીતિ.

૩૯૬. સેસં સબ્બં યથાયોગં, આદિમ્હિ વિય યોજયે.

૩૯૭. (ક) અહં, ભન્તે, એકં પાચિત્તિયાપત્તિં આપજ્જિં. દ્વે સમ્બહુલા પાચિત્તિયાપત્તિયો આપજ્જિં.

(ખ) ગારય્હં, ભન્તે, ધમ્મં આપજ્જિં અસપ્પાયં પાટિદેસનીયં, તં પટિદેસેમીતિ. તેન ‘‘પસ્સસિ, આવુસો, તં ધમ્મ’’ન્તિ વત્તબ્બં.

(ગ) અહં, ભન્તે, એકં દુક્કટાપત્તિં આપજ્જિં. દ્વે સમ્બહુલા દુક્કટાપત્તિયો આપજ્જિં.

(ઘ) અહં, ભન્તે, એકં દુબ્ભાસિતાપત્તિં આપજ્જિં. દ્વે સમ્બહુલા દુબ્ભાસિતાપત્તિયો આપજ્જિં. તા તુમ્હમૂલે પટિદેસેમીતિ.

(ઙ) ‘‘અહં, ભન્તે, દ્વે નાનાવત્થુકા થુલ્લચ્ચયાપત્તિયો આપજ્જિં. સમ્બહુલા નાનાવત્થુકા થુલ્લચ્ચયાપત્તિયો આપજ્જિં, તા તુમ્હમૂલે પટિદેસેમી’’તિ વત્વા તેન ‘‘પસ્સસિ, આવુસો, તા આપત્તિયો’’તિ વુત્તે ‘‘આમ, ભન્તે, પસ્સામી’’તિ વત્વા પુન તેન ‘‘આયતિં, આવુસો, સંવરેય્યાસી’’તિ વુત્તે ‘‘સાધુ સુટ્ઠુ, ભન્તે, સંવરિસ્સામી’’તિ વત્તબ્બં.

૩૯૮. અદેસનાગામિનિયં, અનાપત્તિઞ્ચ દેસિતં;

નાના સંવાસનિસ્સીમટ્ઠિતાનં ચતુપઞ્ચહિ;

મનસા પકતત્તાનં, નાનેકાતિ ન દેસયેતિ.