૩૩. કાયબન્ધનનિદ્દેસો

કાયબન્ધનન્તિ –

૨૩૫. અકાયબન્ધનો ગામં, દુક્કટં પવિસેય્ય ચે;

બન્ધેય્ય યત્થ સરતિ, તત્થેવાસતિયા ગતો.

૨૩૬. પટ્ટિકા સૂકરન્તન્તિ, દુવિધં કાયબન્ધનં;

દુસ્સપટ્ટો ચ રજ્જુ ચ, એકા તદનુલોમિકા.

૨૩૭. મચ્છકણ્ટકખજ્જૂરી-પત્તા મટ્ઠા ચ પટ્ટિકા;

લબ્ભા દસા ચતસ્સોપિ, અન્તે દિગુણસુત્તકં.

૨૩૮. માલાદિં કક્કટચ્છાદિં, દસ્સેત્વા ગુણસુત્તક;

કોટ્ટિતા કુઞ્જરચ્છાદિં, પટ્ટિકા ન ચ કપ્પતિ.

૨૩૯. ઘટકં મકરમુખાદિં, ન કપ્પન્તિ દસામુખે;

ઉભન્તે ઘટકા લેખા, વિધે અઞ્ઞઞ્ચ ચિત્તકં.

૨૪૦. દેડ્ડુભકઞ્ચ મુરજં, મદ્દવીણં કલાબુકં;

ન કપ્પન્તિ દસાસુ દ્વે, મજ્ઝિમાયેવ કપ્પરે.

૨૪૧. વેળુદન્તવિસાણટ્ઠિકટ્ઠલાખાફલામયા;

સઙ્ખનાભિમયા સુત્તનળલોહમયાપિ ચ;

વિધા કપ્પન્તિ કપ્પિયા, ગણ્ઠિયો ચાપિ તમ્મયાતિ.

પઠમભાણવારં નિટ્ઠિતં.