૩૧. વિકપ્પનાનિદ્દેસો

વિકપ્પના ચેવાતિ –

૨૨૧. સમ્મુખા પરમ્મુખાતિ, દુવે વુત્તા વિકપ્પના;

સમ્મુખાય વિકપ્પેન્તો, બ્યત્તસ્સેકસ્સ સન્તિકે;

‘‘ઇમં ચીવરં તુય્હં, વિકપ્પેમી’’તિ ભાસયે.

૨૨૨. એત્તાવતા નિધેતુંવ, કપ્પતી ન ચ કપ્પતિ;

પરિભોગાદિકં તેન, અપ્પચ્ચુદ્ધટભાવતો.

૨૨૩. ‘‘મય્હં સન્તકં પરિભુઞ્જ વા વિસ્સજ્જેહિ વા યથાપચ્ચયં વા કરોહી’’તિ –

તેન પચ્ચુદ્ધટેયેવ, પરિભોગાદિ કપ્પતિ.

૨૨૪. અપરા સમ્મુખાવેકા, ભિક્ખુસ્સેકસ્સ સન્તિકે;

ગહેત્વા નામમેકસ્સ, પઞ્ચન્નં સહધમ્મિનં.

૨૨૫. ‘‘ઇમં ચીવરં તિસ્સસ્સ ભિક્ખુનો, તિસ્સાય ભિક્ખુનિયા, તિસ્સસ્સ સામણેરસ્સ, તિસ્સાય સામણેરિયા, તિસ્સાય સિક્ખમાનાય વિકપ્પેમી’’તિ વત્તબ્બં.

તેન ભિક્ખુના ‘‘તિસ્સસ્સ ભિક્ખુનો, તિસ્સાય ભિક્ખુનિયા, તિસ્સસ્સ સામણેરસ્સ, તિસ્સાય સામણેરિયા, તિસ્સાય સિક્ખમાનાય સન્તકં પરિભુઞ્જ વા વિસ્સજ્જેહિ વા યથાપચ્ચયં વા કરોહી’’તિ વત્તબ્બં.

૨૨૬. પરમ્મુખાવિકપ્પને-કસ્સન્તિકેવમીરયે;

‘‘ઇમં ચીવરં તુય્હં વિકપ્પનત્થાય દમ્મી’’તિ.

૨૨૭. તેન વત્તબ્બો ‘‘કો તે મિત્તો વા સન્દિટ્ઠો વા’’તિ. ઇતરેન ચેવં વત્તબ્બં ‘‘તિસ્સો ભિક્ખૂ’’તિ વા ‘‘તિસ્સા ભિક્ખુની’’તિ વા ‘‘તિસ્સો સામણેરો’’તિ વા ‘‘તિસ્સા સામણેરી’’તિ વા ‘‘તિસ્સા સિક્ખમાના’’તિ વા.

પુન તેન ‘‘અહં તિસ્સસ્સ તિસ્સાય વા દમ્મી’’તિ વિકપ્પેત્વા તેનેવ ‘‘તિસ્સસ્સ ભિક્ખુનો, તિસ્સાય ભિક્ખુનિયા, તિસ્સસ્સ સામણેરસ્સ, તિસ્સાય સામણેરિયા, તિસ્સાય સિક્ખમાનાય સન્તકં પરિભુઞ્જ વા વિસ્સજ્જેહિ વા યથાપચ્ચયં વા કરોહી’’તિ પચ્ચુદ્ધરિતબ્બં.

૨૨૮. દૂરસન્તિકત્તેકત્તબહુભાવં વિજાનિય;

‘‘એતં ઇમ’’ન્તિ ‘‘એતાનિ, ઇમાની’’તેત્થ યોજયે.

૨૨૯. દસાહં માસમેકં વા, પઞ્ચ વા કથિનત્થતે;

પારિપૂરત્થમૂનસ્સ, પચ્ચાસા સતિ માસકં;

નુપ્પાદયતિ નિસ્સગ્ગિં, નાધિટ્ઠિતવિકપ્પિતન્તિ.