૬. તૂલોનદ્ધસિક્ખાપદવણ્ણના

છટ્ઠે તૂલં ઓનદ્ધમેત્થાતિ તૂલોનદ્ધં, ચિમિલિકં પત્થરિત્વા તૂલં પક્ખિપિત્વા ઉપરિ ચિમિલિકાય ઓનદ્ધન્તિ વુત્તં હોતિ. ઉદ્દાલનકં ભેદનકસદિસમેવ.

સાવત્થિયં છબ્બગ્ગિયે આરબ્ભ તૂલોનદ્ધકારાપનવત્થુસ્મિં પઞ્ઞત્તં, આયોગે કાયબન્ધને અંસબદ્ધકે પત્તત્થવિકાય પરિસ્સાવને બિમ્બોહને, અઞ્ઞેન કતં તૂલોનદ્ધં પટિલભિત્વા ઉદ્દાલેત્વા પરિભુઞ્જન્તસ્સ, ઉમ્મત્તકાદીનઞ્ચ અનાપત્તિ. બિમ્બોહનઞ્ચેત્થ સીસપ્પમાણમેવ વટ્ટતિ, સીસપ્પમાણં નામ યસ્સ વિત્થારતો તીસુ કોણેસુ દ્વિન્નં અન્તરં વિદત્થિચતુરઙ્ગુલં હોતિ, મજ્ઝે મુટ્ઠિરતનં, દીઘતો દિયડ્ઢરતનં વા દ્વિરતનં વા. તૂલોનદ્ધમઞ્ચપીઠતા, અત્તનો અત્થાય કરણં વા કારાપેત્વા વા પટિલાભોતિ ઇમાનેત્થ દ્વે અઙ્ગાનિ. સેસં વુત્તનયેનેવ વેદિતબ્બન્તિ.

તૂલોનદ્ધસિક્ખાપદવણ્ણના નિટ્ઠિતા.