૩. વિકાલગામપ્પવેસનસિક્ખાપદવણ્ણના

તતિયે સન્તં ભિક્ખું અનાપુચ્છાતિ ઇદં ચારિત્તે વુત્તનયમેવ. વિકાલેતિ મજ્ઝન્હિકાતિક્કમતો પટ્ઠાય અન્તોઅરુણે, એતસ્મિં અન્તરે ‘‘વિકાલે ગામપ્પવેસનં આપુચ્છામી’’તિ વા, ‘‘ગામં પવિસિસ્સામી’’તિ વા અનાપુચ્છિત્વા અસતિ તથારૂપે અચ્ચાયિકે કરણીયે પરિક્ખિત્તસ્સ ગામસ્સ પરિક્ખેપં અતિક્કમન્તસ્સ, અપરિક્ખિત્તસ્સ ઉપચારં ઓક્કમન્તસ્સ પઠમપાદે દુક્કટં, દુતિયપાદે પાચિત્તિયં. સચેપિ સમ્બહુલા કેનચિ કમ્મેન ગામં પવિસન્તિ, સબ્બેહિ અઞ્ઞમઞ્ઞં આપુચ્છિતબ્બં. ‘‘તસ્મિં ગામે તં કમ્મં ન સમ્પજ્જતી’’તિ અઞ્ઞં ગામં ગચ્છન્તાનં પુન આપુચ્છનકિચ્ચં નત્થિ. સચે પન ઉસ્સાહં પટિપ્પસ્સમ્ભેત્વા વિહારં ગચ્છન્તા અન્તરા અઞ્ઞં ગામં પવિસિતુકામા હોન્તિ, આપુચ્છિતબ્બમેવ. કુલઘરે વા આસનસાલાયં વા ભત્તકિચ્ચં કત્વા તેલભિક્ખાય વા સપ્પિભિક્ખાય વા ચરિતુકામેન સચે પસ્સે ભિક્ખુ અત્થિ, આપુચ્છિતબ્બો, અસન્તે ‘નત્થી’તિ ગન્તબ્બં. વીથિં ઓતરિત્વા પન ભિક્ખું દિસ્વાપિ આપુચ્છનકિચ્ચં નત્થિ. યો પન ગામમજ્ઝેન મગ્ગો હોતિ, સચે તેન ગચ્છન્તસ્સ ‘‘તેલાદીનં અત્થાય ચરિસ્સામી’’તિ ચિત્તં ઉપ્પજ્જતિ, પસ્સે ભિક્ખું દિસ્વા આપુચ્છિતબ્બં. મગ્ગા અનોક્કમ્મ ચરન્તસ્સ પન આપુચ્છનકિચ્ચં નત્થિ, ઓક્કમન્તસ્સ વુત્તનયેનેવ પાચિત્તિયં.

સાવત્થિયં છબ્બગ્ગિયે આરબ્ભ વિકાલે ગામપ્પવેસનવત્થુસ્મિં પઞ્ઞત્તં, ‘‘સન્તં ભિક્ખુ’’ન્તિ ચ ‘‘અનાપુચ્છા’’તિ ચ ‘‘અઞ્ઞત્ર તથારૂપા અચ્ચાયિકા કરણીયા’’તિ ચ ઇમા પનેત્થ તિસ્સો અનુપઞ્ઞત્તિયો, અસાધારણપઞ્ઞત્તિ, અનાણત્તિકં, તિકપાચિત્તિયં, કાલે વિકાલસઞ્ઞિનો, વેમતિકસ્સ ચ દુક્કટં. કાલસઞ્ઞિનો પન, યો ચ અચ્ચાયિકે વા કરણીયે, સન્તં વા આપુચ્છિત્વા, અસન્તં વા અનાપુચ્છિત્વા પવિસતિ, અન્તરારામભિક્ખુનુપસ્સયતિત્થિયસેય્યપટિક્કમનેસુ વા અઞ્ઞતરં ગચ્છતિ, તસ્સ, ગામેન મગ્ગો હોતિ, તેન ગચ્છતો, આપદાસુ, ઉમ્મત્તકાદીનઞ્ચ અનાપત્તિ. સન્તં ભિક્ખું અનાપુચ્છતા, અનુઞ્ઞાતકારણાભાવો, વિકાલે ગામપ્પવિસનન્તિ ઇમાનેત્થ તીણિ અઙ્ગાનિ. સમુટ્ઠાનાદીનિ કથિનસદિસાનેવ, ઇદં પન કિરિયાકિરિયન્તિ.

વિકાલગામપ્પવેસનસિક્ખાપદવણ્ણના નિટ્ઠિતા.