૬. એળકલોમસિક્ખાપદવણ્ણના

છટ્ઠે અદ્ધાનમગ્ગપ્પટિપન્નસ્સાતિ અદ્ધાનસઙ્ખાતં દીઘમગ્ગં પટિપન્નસ્સ, સબ્બઞ્ચેતં વત્થુમત્તદીપનમેવ, યત્થ કત્થચિ પન ધમ્મેન લભિત્વા ગણ્હતો દોસો નત્થિ. તિયોજનપરમન્તિ ગહિતટ્ઠાનતો તિયોજનપ્પમાણં દેસં. સહત્થાતિ સહત્થેન, અત્તના હરિતબ્બાનીતિ અત્થો. અસન્તે હારકેતિ અસન્તેયેવ અઞ્ઞસ્મિમ્પિ હારકે. સચે પન અત્થિ, તં ગાહેતું વટ્ટતિ. અત્તના પન અન્તમસો વાતાબાધપ્પટિકારત્થં સુત્તકેન અબન્ધિત્વા કણ્ણચ્છિદ્દે પક્ખિત્તાનિપિ આદાય તિયોજનં એકં પાદં અતિક્કામેન્તસ્સ દુક્કટં, દુતિયપાદાતિક્કમે નિસ્સગ્ગિયં પાચિત્તિયં.

સાવત્થિયં અઞ્ઞતરં ભિક્ખું આરબ્ભ તિયોજનાતિક્કમનવત્થુસ્મિં પઞ્ઞત્તં, અસાધારણપઞ્ઞત્તિ, અનાણત્તિકં, તિકપાચિત્તિયં, ઊનકતિયોજને અતિરેકસઞ્ઞિનો વેમતિકસ્સ વા દુક્કટં. તિયોજનં હરણપચ્ચાહરણે, વાસાધિપ્પાયેન ગન્ત્વા તતો પરં હરણે, અચ્છિન્નં વા નિસ્સટ્ઠં વા પટિલભિત્વા હરણે, અઞ્ઞં હરાપને, અન્તમસો સુત્તકેનપિ બદ્ધકતભણ્ડહરણે, ઉમ્મત્તકાદીનઞ્ચ અનાપત્તિ. એળકલોમાનં અકતભણ્ડતા, પઠમપ્પટિલાભો, અત્તના આદાય વા અઞ્ઞસ્સ અજાનન્તસ્સ યાને પક્ખિપિત્વા વા તિયોજનાતિક્કમનં, આહરણપચ્ચાહરણં, અવાસાધિપ્પાયતાતિ ઇમાનેત્થ પઞ્ચ અઙ્ગાનિ. એળકલોમસમુટ્ઠાનં, કિરિયં, નોસઞ્ઞાવિમોક્ખં, અચિત્તકં, પણ્ણત્તિવજ્જં, કાયકમ્મં, તિચિત્તં, તિવેદનન્તિ.

એળકલોમસિક્ખાપદવણ્ણના નિટ્ઠિતા.