૬. પઠમસઙ્ઘિકચેતાપનસિક્ખાપદવણ્ણના

છટ્ઠે અઞ્ઞદત્થિકેનાતિ અઞ્ઞસ્સત્થાય દિન્નેન. અઞ્ઞુદ્દિસિકેનાતિ અઞ્ઞં ઉદ્દિસિત્વા દિન્નેન. સઙ્ઘિકેનાતિ સઙ્ઘસ્સ પરિચ્ચત્તેન. પરિક્ખારેનાતિ કપ્પિયભણ્ડેન. અઞ્ઞં ચેતાપેય્યાતિ ‘‘ઇદં નામ પરિભુઞ્જેય્યાથા’’તિ યં ઉદ્દિસિત્વા નિયમેત્વા યો પરિક્ખારો દિન્નો, તતો અઞ્ઞં પરિવત્તાપેય્ય, તસ્સા પયોગે દુક્કટં, પટિલાભેન નિસ્સગ્ગિયં.

સાવત્થિયં સમ્બહુલા ભિક્ખુનિયો આરબ્ભ તાદિસેન પરિક્ખારેન અઞ્ઞં ચેતાપનવત્થુસ્મિં પઞ્ઞત્તં, તિકપાચિત્તિયં, અનઞ્ઞદત્થિકે દ્વિકદુક્કટં. તસ્મિં પન અનઞ્ઞદત્થિકસઞ્ઞાય, સેસકં ઉપનેન્તિયા, ‘‘તુમ્હેહિ એતદત્થાય દિન્નો, અમ્હાકઞ્ચ ઇમિના નામ અત્થો’’તિ સામિકે અપલોકેત્વા ઉપનેન્તિયા, યદા ભિક્ખુનિયો વિહારમ્પિ છડ્ડેત્વા પક્કમન્તિ, એવરૂપાસુ આપદાસુ ઉપનેન્તીનં, ઉમ્મત્તિકાદીનઞ્ચ અનાપત્તિ. સેસં ચતુત્થસદિસમેવાતિ.

પઠમસઙ્ઘિકચેતાપનસિક્ખાપદવણ્ણના નિટ્ઠિતા.