૫. ભોજનપ્પટિગ્ગહણપઠમસિક્ખાપદવણ્ણના

પઞ્ચમે અવસ્સુતાતિ છન્દરાગેન તિન્તા. અવસ્સુતસ્સાતિ તાદિસસ્સેવ. ખાદેય્ય વા ભુઞ્જેય્ય વાતિ એત્થ પટિગ્ગહણે થુલ્લચ્ચયં, અજ્ઝોહારે અજ્ઝોહારે સઙ્ઘાદિસેસો.

સાવત્થિયં સુન્દરીનન્દં આરબ્ભ અવસ્સુતાય અવસ્સુતસ્સ હત્થતો આમિસપ્પટિગ્ગહણવત્થુસ્મિં પઞ્ઞત્તં, એકતોઅવસ્સુતે પટિગ્ગહણે દુક્કટં, અજ્ઝોહારે અજ્ઝોહારે થુલ્લચ્ચયં, યક્ખપેતપણ્ડકતિરચ્છાનગતમનુસ્સવિગ્ગહાનં હત્થતો ઉભતોઅવસ્સુતેપિ સતિ એસેવ નયો. તત્થ પન એકતોઅવસ્સુતે સતિ દુક્કટં, સબ્બત્થ ઉદકદન્તપોનગ્ગહણેપિ પરિભોગેપિ દુક્કટમેવ. ઉભોસુ અનવસ્સુતેસુ, ‘‘અનવસ્સુતો’’તિ વા ઞત્વા ગણ્હન્તિયા, ઉમ્મત્તિકાદીનઞ્ચ અનાપત્તિ. ઉદકદન્તપોનતો અઞ્ઞં અજ્ઝોહરણીયં, ઉભતોઅવસ્સુતતા, સહત્થા ગહણં, અજ્ઝોહરણન્તિ ઇમાનેત્થ ચત્તારિ અઙ્ગાનિ. સમુટ્ઠાનાદીનિ પઠમપારાજિકસદિસાનીતિ.

ભોજનપ્પટિગ્ગહણપઠમસિક્ખાપદવણ્ણના નિટ્ઠિતા.