૧. ઉસ્સયવાદિકાસિક્ખાપદવણ્ણના

સઙ્ઘાદિસેસેસુ પઠમે ઉસ્સયવાદિકાતિ માનુસ્સયવસેન કોધુસ્સયવસેન અડ્ડકરણત્થાય વિનિચ્છયમહામત્તાનં સન્તિકે વિવદમાના. ગહપતિના વાતિઆદીહિ ઠપેત્વા પઞ્ચ સહધમ્મિકે અવસેસા ગહટ્ઠપબ્બજિતા સઙ્ગહિતા. અયં ભિક્ખુની પઠમાપત્તિકન્તિ આદિમ્હિ પઠમં આપત્તિ એતસ્સાતિ પઠમાપત્તિકો, વીતિક્કમક્ખણેયેવ આપજ્જિતબ્બોતિ અત્થો, તં પઠમાપત્તિકં. આપન્નાતિ અડ્ડપરિયોસાને આપન્ના. ભિક્ખુનિં સઙ્ઘતો નિસ્સારેતીતિ નિસ્સારણીયો, તં નિસ્સારણીયં. સઙ્ઘાદિસેસન્તિ એવંનામકં.

સાવત્થિયં થુલ્લનન્દં આરબ્ભ ઉસ્સયવાદિકવત્થુસ્મિં પઞ્ઞત્તં, સાણત્તિકં, ‘‘અડ્ડં કરિસ્સામી’’તિ યંકિઞ્ચિ દુતિયિકં વા સક્ખિં વા સહાયં વા પરિયેસન્તિયા પરિયેસને દુક્કટં, યત્થ ઠિતાય ‘‘અડ્ડં કાતું ગચ્છામી’’તિ ચિત્તં ઉપ્પજ્જતિ, તતો પટ્ઠાય ગચ્છન્તિયા પદે પદે દુક્કટં, યત્થકત્થચિ અન્તમસો ભિક્ખુનુપસ્સયં આગતેપિ વોહારિકે દિસ્વા અત્તનો કથં આરોચેન્તિયા દુક્કટં. ઇતરેન અત્તનો કથાય આરોચિતાય ભિક્ખુનિયા થુલ્લચ્ચયં, પઠમં ઇતરેન પચ્છા ભિક્ખુનિયા આરોચનેપિ એસેવ નયો. સચે પન ભિક્ખુની તં વદતિ ‘‘મમ ચ તવ ચ કથં ત્વંયેવ આરોચેહી’’તિ, સો અત્તનો વા કથં પઠમં આરોચેતુ, તસ્સા વા, પઠમારોચને ભિક્ખુનિયા દુક્કટં, દુતિયે થુલ્લચ્ચયં, તેન એવં વુત્તાય ભિક્ખુનિયા આરોચનેપિ એસેવ નયો. સચે પન ભિક્ખુની અઞ્ઞેન કથાપેતિ, તત્રાપિ એસેવ નયો. યથા વા તથા વા હિ આરોચિયમાને પઠમારોચને ભિક્ખુનિયા દુક્કટં, દુતિયે થુલ્લચ્ચયં. ઉભિન્નં પન કથં સુત્વા વોહારિકેહિ વિનિચ્છયે કતે અડ્ડપરિયોસાનં નામ હોતિ, તસ્મિં અડ્ડપરિયોસાને ભિક્ખુનિયા જયેપિ પરાજયેપિ સઙ્ઘાદિસેસો.

યા પન પચ્ચત્થિકમનુસ્સેહિ દૂતં વા પહિણિત્વા, સયં વા આગન્ત્વા ‘‘એહિ, અય્યે’’તિ આકડ્ઢિયમાના ગચ્છતિ, યા વા ઉપસ્સયે અઞ્ઞેહિ કતં અનાચારં અનોદિસ્સ આચિક્ખન્તી રક્ખં યાચતિ, યાય ચ કિઞ્ચિ અવુત્તા વોહારિકા અઞ્ઞતો સુત્વા સયમેવ અડ્ડં પરિયોસાપેન્તિ, તસ્સા, ઉમ્મત્તિકાદીનઞ્ચ અનાપત્તિ. અઞ્ઞેહિ અનાકડ્ઢિતાય અડ્ડકરણં, અડ્ડપરિયોસાનન્તિ ઇમાનેત્થ દ્વે અઙ્ગાનિ. સમુટ્ઠાનાદીનિ પઠમકથિનસદિસાનિ, ઇદં પન કિરિયમેવાતિ.

ઉસ્સયવાદિકાસિક્ખાપદવણ્ણના નિટ્ઠિતા.