સાધારણપારાજિકં

૧…પે…૪. મેથુનધમ્મસિક્ખાપદવણ્ણના

તત્થ સુણાતુ મેતિઆદીનં ભિક્ખુપાતિમોક્ખવણ્ણનાયં વુત્તનયેનેવ અત્થો વેદિતબ્બો. કેવલઞ્હિ, ભન્તે, અય્યેતિઆદિવસેન તસ્મિઞ્ચ ઇધ ચ અભિલાપમત્તમેવ લિઙ્ગભેદમત્તઞ્ચ વિસેસો. યસ્મા ચ ભિક્ખુનિયા સિક્ખાપચ્ચક્ખાનં નામ નત્થિ, તસ્મા ભિક્ખુનીનં ‘‘સિક્ખાસાજીવસમાપન્ના સિક્ખં અપચ્ચક્ખાય દુબ્બલ્યં અનાવિકત્વા’’તિ અવત્વા યા પન ભિક્ખુની છન્દસો મેથુનં ધમ્મં પટિસેવેય્યાતિ વુત્તં. તત્થ છન્દસોતિ મેથુનરાગપ્પટિસંયુત્તેન છન્દેન ચેવ રુચિયા ચ. છન્દે પન અસતિ બલક્કારેન પધંસિતાય અનાપત્તિ, તસ્મા યા પરિપુણ્ણૂપસમ્પદા ભિક્ખુની મનુસ્સામનુસ્સતિરચ્છાનજાતીસુ પુરિસઉભતોબ્યઞ્જનકપણ્ડકાનં યસ્સ કસ્સચિ સજીવસ્સ વા નિજ્જીવસ્સ વા સન્થતસ્સ વા અસન્થતસ્સ વા અક્ખાયિતસ્સ વા યેભુય્યેન અક્ખાયિતસ્સ વા અઙ્ગજાતસ્સ અત્તનો વચ્ચમગ્ગપસ્સાવમગ્ગમુખેસુ તીસુ યત્થકત્થચિ સન્થતે વા અસન્થતે વા પકતિવાતેન અસંફુટ્ઠે અલ્લોકાસે અન્તમસો તિલફલમત્તમ્પિ પદેસં છન્દસો પવેસેતિ, પરેન વા પવેસિયમાના પવેસનપવિટ્ઠટ્ઠિતઉદ્ધરણેસુ યંકિઞ્ચિ સાદિયતિ, અયં પારાજિકા હોતિ. સેસમેત્થ ઇતો પરેસુ ચ સાધારણસિક્ખાપદેસુ વુત્તનયાનુસારેનેવ વેદિતબ્બં.