૪-૫. સત્તાવાસસુત્તાદિવણ્ણના

૨૪-૨૫. ચતુત્થે સત્તા આવસન્તિ એતેસૂતિ સત્તાવાસા, નાનત્તસઞ્ઞિઆદિભેદા સત્તનિકાયા. યસ્મા તે તે સત્તનિવાસા તપ્પરિયાપન્નાનં સત્તાનં તાય એવ તપ્પરિયાપન્નતાય આધારો વિય વત્તબ્બતં અરહન્તિ. સમુદાયાચારો હિ અવયવસ્સ યથા ‘‘રુક્ખે સાખા’’તિ, તસ્મા ‘‘સત્તાનં આવાસા, વસનટ્ઠાનાનીતિ અત્થો’’તિ વુત્તં. સુદ્ધાવાસાપિ સત્તાવાસોવ ‘‘ન સો, ભિક્ખવે, સત્તાવાસો સુલભરૂપો, યો મયા અનાવુત્થપુબ્બો ઇમિના દીઘેન અદ્ધુના અઞ્ઞત્ર સુદ્ધાવાસેહિ દેવેહી’’તિ (દી. નિ. ૨.૯૧) વચનતો. યદિ એવં તે કસ્મા ઇધ ન ગહિતાતિ તત્થ કારણમાહ ‘‘અસબ્બકાલિકત્તા’’તિઆદિ. વેહપ્ફલા પન ચતુત્થેયેવ સત્તાવાસે ભજન્તીતિ દટ્ઠબ્બં. પઞ્ચમં ઉત્તાનમેવ.

સત્તાવાસસુત્તાદિવણ્ણના નિટ્ઠિતા.