૧-૮. પઠમવિનયધરસુત્તાદિવણ્ણના

૭૫-૮૨. અટ્ઠમસ્સ પઠમં દુતિયઞ્ચ ઉત્તાનત્થમેવ. તતિયે વિનયલક્ખણે પતિટ્ઠિતો લજ્જિભાવેન વિનયલક્ખણે ઠિતો હોતિ. અલજ્જી (પારા. અટ્ઠ. ૧.૪૫) હિ બહુસ્સુતોપિ સમાનો લાભગરુકતાય તન્તિં વિસંવાદેત્વા ઉદ્ધમ્મં ઉબ્બિનયં સત્થુસાસનં દીપેત્વા સાસને મહન્તં ઉપદ્દવં કરોતિ, સઙ્ઘભેદમ્પિ સઙ્ઘરાજિમ્પિ ઉપ્પાદેતિ. લજ્જી પન કુક્કુચ્ચકો સિક્ખાકામો જીવિતહેતુપિ તન્તિં અવિસંવાદેત્વા ધમ્મમેવ વિનયમેવ ચ દીપેતિ, સત્થુસાસનં ગરું કત્વા ઠપેતિ. એવં યો લજ્જી, સો વિનયં અજહન્તો અવોક્કમન્તોવ લજ્જિભાવેન વિનયલક્ખણે ઠિતો હોતિ પતિટ્ઠિતો.

અસંહીરોતિ એત્થ સંહીરો નામ યો પાળિયં વા અટ્ઠકથાયં વા હેટ્ઠા વા ઉપરિતો વા પદપટિપાટિયા વા પુચ્છિયમાનો વિત્થુનતિ વિપ્ફન્દતિ, સણ્ઠાતું ન સક્કોતિ, યં યં પરેન વુચ્ચતિ, તં તં અનુજાનાતિ, સકવાદં છડ્ડેત્વા પરવાદં ગણ્હાતિ. યો પન પાળિયં વા અટ્ઠકથાયં વા હેટ્ઠુપરિયવસેન વા પદપટિપાટિયા વા પુચ્છિયમાનો ન વિત્થુનતિ ન વિપ્ફન્દતિ, એકેકલોમં સણ્ડાસેન ગણ્હન્તો વિય ‘‘એવં મયં વદામ, એવં નો આચરિયા વદન્તી’’તિ વિસ્સજ્જેતિ. યમ્હિ પાળિ ચ પાળિવિનિચ્છયો ચ સુવણ્ણભાજને પક્ખિત્તસીહવસા વિય પરિક્ખયં પરિયાદાનં અગચ્છન્તો તિટ્ઠતિ, અયં વુચ્ચતિ અસંહીરો. યસ્મા પન એવરૂપો યં યં પરેન વુચ્ચતિ, તં તં નાનુજાનાતિ, અત્તના સુવિનિચ્છિનિતં કત્વા ગહિતં અવિપરીતમત્થં ન વિસ્સજ્જેતિ, તસ્મા વુત્તં ‘‘ન સક્કોતિ ગહિતગ્ગહણં વિસ્સજ્જાપેતુ’’ન્તિ. ચતુત્થાદીનિ સુવિઞ્ઞેય્યાનિ.

પઠમવિનયધરસુત્તાદિવણ્ણના નિટ્ઠિતા.