૮. અરહત્તવગ્ગો

૧-૩. દુક્ખસુત્તાદિવણ્ણના

૭૫-૭૭. અટ્ઠમસ્સ પઠમાદીસુ નત્થિ વત્તબ્બં. તતિયે તિવિધં કુહનવત્થુન્તિ પચ્ચયપ્પટિસેવનસામન્તજપ્પનઇરિયાપથપ્પવત્તનસઙ્ખાતં તિવિધં કુહનવત્થું. ઉક્ખિપિત્વાતિ ‘‘મહાકુટુમ્બિકો મહાનાવિકો મહાદાનપતી’’તિઆદિના પગ્ગણ્હિત્વા લપનં. અવક્ખિપિત્વાતિ ‘‘કિં ઇમસ્સ જીવિતં, બીજભોજનો નામાય’’ન્તિ હીળેત્વા લપનં.

દુક્ખસુત્તાદિવણ્ણના નિટ્ઠિતા.

૪. સુખસોમનસ્સસુત્તવણ્ણના

૭૮. ચતુત્થે યથાવુત્તધમ્માદીસુ તસ્સ કિલેસનિમિત્તં દુક્ખં અનવસ્સનન્તિ ‘‘સુખસોમનસ્સબહુલો વિહરતી’’તિ વુત્તં. કાયિકસુખઞ્ચેવ ચેતસિકસોમનસ્સઞ્ચ બહુલં અસ્સાતિ સુખસોમનસ્સબહુલો. યવતિ તેન ફલં મિસ્સિતં વિય હોતીતિ યોનિ, એકન્તિકં કારણં. અસ્સાતિ યથાવુત્તસ્સ ભિક્ખુનો. પરિપુણ્ણન્તિ અવિકલં અનવસેસં.

સુખસોમનસ્સસુત્તવણ્ણના નિટ્ઠિતા.

૫. અધિગમસુત્તવણ્ણના

૭૯. પઞ્ચમે આગચ્છન્તિ એતેન કુસલા વા અકુસલા વાતિ આગમનં, કુસલાકુસલાનં ઉપ્પત્તિકારણં. તત્થ કુસલોતિ આગમનકુસલો. એવં ધમ્મે મનસિકરોતો કુસલા વા અકુસલા વા ધમ્મા અભિવડ્ઢન્તીતિ એવં જાનન્તો. અપગચ્છન્તિ કુસલા વા અકુસલા વા એતેનાતિ અપગમનં. તેસં એવ અનુપ્પત્તિકારણં, તત્થ કુસલોતિ અપગમનકુસલો. એવં ધમ્મે મનસિકરોતો કુસલા વા અકુસલા વા ધમ્મા નાભિવડ્ઢન્તીતિ એવં જાનન્તો. ઉપાયકુસલોતિ ઠાનુપ્પત્તિકપઞ્ઞાસમન્નાગતો. ઇદઞ્ચ અચ્ચાયિકકિચ્ચે વા ભયે વા ઉપ્પન્ને તસ્સ તિકિચ્છનત્થં ઠાનુપ્પત્તિયા કારણજાનનવસેન વેદિતબ્બં.

અધિગમસુત્તવણ્ણના નિટ્ઠિતા.

૬-૭. મહન્તત્તસુત્તાદિવણ્ણના

૮૦-૮૧. છટ્ઠે સમ્પત્તેતિ કિલેસે સમ્પત્તે. સત્તમં ઉત્તાનમેવ.

મહન્તત્તસુત્તાદિવણ્ણના નિટ્ઠિતા.

૮-૧૦. દુતિયનિરયસુત્તાદિવણ્ણના

૮૨-૮૪. અટ્ઠમે કાયપાગબ્ભિયાદીહીતિ આદિ-સદ્દેન વચીપાગબ્ભિયં મનોપાગબ્ભિયઞ્ચ સઙ્ગણ્હાતિ. નવમાદીનિ ઉત્તાનત્થાનેવ.

દુતિયનિરયસુત્તાદિવણ્ણના નિટ્ઠિતા.

અરહત્તવગ્ગવણ્ણના નિટ્ઠિતા.