(૨૨) ૨. અક્કોસકવગ્ગો

૧-૨. અક્કોસકસુત્તાદિવણ્ણના

૨૧૧-૨. દુતિયસ્સ પઠમે દસહિ અક્કોસવત્થૂહિ અક્કોસકોતિ ‘‘બાલોસિ, મૂળ્હોસિ, ઓટ્ઠોસિ, ગોણોસિ, ગદ્રભોસી’’તિઆદિના દસહિ અક્કોસવત્થૂહિ અક્કોસકો. ‘‘હોતુ, મુણ્ડકસમણ, અદણ્ડો અહન્તિ કરોસિ, ઇદાનિ તે રાજકુલં ગન્ત્વા દણ્ડં આરોપેસ્સામી’’તિઆદીનિ વદન્તો પરિભાસકો નામાતિ આહ ‘‘ભયદસ્સનેન પરિભાસકો’’તિ. લોકુત્તરધમ્મા અપાયમગ્ગસ્સ પરિપન્થભાવતો પરિપન્થો નામાતિ આહ ‘‘લોકુત્તરપરિપન્થસ્સ છિન્નત્તા’’તિ, લોકુત્તરસઙ્ખાતસ્સ અપાયમગ્ગપરિપન્થસ્સ છિન્નત્તાતિ અત્થો. દુતિયે નત્થિ વત્તબ્બં.

અક્કોસકસુત્તાદિવણ્ણના નિટ્ઠિતા.

૩-૧૦. સીલસુત્તાદિવણ્ણના

૨૧૩-૨૨૦. તતિયે (દી. નિ. ટી. ૨.૧૪૯) દુસ્સીલોતિ એત્થ દુ-સદ્દો અભાવત્થો ‘‘દુપ્પઞ્ઞો’’તિઆદીસુ (મ. નિ. ૧.૪૪૯) વિય, ન ગરહણત્થોતિ આહ ‘‘અસીલો નિસ્સીલો’’તિ. ભિન્નસંવરોતિ એત્થ સમાદિન્નસીલો કેનચિ કારણેન સીલભેદં પત્તો, સો તાવ ભિન્નસંવરો હોતુ. યો પન સબ્બેન સબ્બં અસમાદિન્નસીલો આચારહીનો, સો કથં ભિન્નસંવરો નામ હોતીતિ? સોપિ સાધુસમાચારસ્સ પરિહરણીયસ્સ ભેદિતત્તા ભિન્નસંવરો એવ નામ. વિનટ્ઠસંવરો સંવરરહિતોતિ હિ વુત્તં હોતિ. તં તં સિપ્પટ્ઠાનં. માઘાતકાલેતિ ‘‘મા ઘાતેથ પાણીન’’ન્તિ એવં માઘાતઘોસનં ઘોસિતદિવસે. અબ્ભુગ્ગચ્છતિ પાપકો કિત્તિસદ્દો. અજ્ઝાસયેન મઙ્કુ હોતિયેવ વિપ્પટિસારિભાવતો.

તસ્સાતિ દુસ્સીલસ્સ. સમાદાય વત્તિતટ્ઠાનન્તિ ઉટ્ઠાય સમુટ્ઠાય કતકારણં. આપાથં આગચ્છતીતિ તં મનસો ઉપટ્ઠાતિ. ઉમ્મીલેત્વા ઇધલોકન્તિ ઉમ્મીલનકાલે અત્તનો પુત્તદારાદિવસેન ઇધલોકં પસ્સતિ. નિમીલેત્વા પરલોકન્તિ નિમીલનકાલે ગતિનિમિત્તુપટ્ઠાનવસેન પરલોકં પસ્સતિ. તેનાહ ‘‘ચત્તારો અપાયા’’તિઆદિ. પઞ્ચમપદન્તિ ‘‘કાયસ્સ ભેદા’’તિઆદિના વુત્તો પઞ્ચમો આદીનવકોટ્ઠાસો. વુત્તવિપરિયાયેનાતિ વુત્તત્થાય આદીનવકથાય વિપરિયાયેન ‘‘અપ્પમત્તો તં તં કસિવણિજ્જાદિં યથાકાલં સમ્પાદેતું સક્કોતી’’તિઆદિના. પાસંસં સીલમસ્સ અત્થીતિ સીલવા. સીલસમ્પન્નોતિ સીલેન સમન્નાગતો સમ્પન્નસીલોતિ એવમાદિકં પન અત્થવચનં સુકરન્તિ અનામટ્ઠં. ચતુત્થાદીનિ ઉત્તાનત્થાનેવ.

સીલસુત્તાદિવણ્ણના નિટ્ઠિતા.

અક્કોસકવગ્ગવણ્ણના નિટ્ઠિતા.