૨. નાથવગ્ગો

૧-૪. સેનાસનસુત્તાદિવણ્ણના

૧૧-૧૪. દુતિયસ્સ પઠમે નાતિદૂરન્તિ ગોચરટ્ઠાનતો અડ્ઢગાવુતતો ઓરભાગતાય નાતિદૂરં. નાચ્ચાસન્નન્તિ પચ્છિમેન પમાણેન ગોચરટ્ઠાનતો પઞ્ચધનુસતિકતાય ન અતિઆસન્નં. તાય ચ પન નાતિદૂરનાચ્ચાસન્નતાય ગોચરટ્ઠાનપટિપરિસ્સયાદિરહિતમગ્ગતાય ચ ગમનસ્સ ચ આગમનસ્સ ચ યુત્તરૂપત્તા ગમનાગમનસમ્પન્નં. દિવસભાગે મહાજનસંકિણ્ણતાભાવેન દિવા અપ્પાકિણ્ણં. અભાવત્થો હિ અયં અપ્પ-સદ્દો ‘‘અપ્પિચ્છો’’તિઆદીસુ વિય. રત્તિયં મનુસ્સસદ્દાભાવેન રત્તિં અપ્પસદ્દં. સબ્બદાપિ જનસન્નિપાતનિગ્ઘોસાભાવેન અપ્પનિગ્ઘોસં.

અપ્પકસિરેનાતિ અકસિરેન સુખેનેવ. સીલાદિગુણાનં થિરભાવપ્પત્તિયા થેરા. સુત્તગેય્યાદિ બહુ સુતં એતેસન્તિ બહુસ્સુતા. તમુગ્ગહધારણેન સમ્મદેવ ગરૂનં સન્તિકે આગમિતભાવેન ચ આગતો પરિયત્તિધમ્મસઙ્ખાતો આગમો એતેસન્તિ આગતાગમા. સુત્તાભિધમ્મસઙ્ખાતસ્સ ધમ્મસ્સ ધારણેન ધમ્મધરા. વિનયસ્સ ધારણેન વિનયધરા. તેસં ધમ્મવિનયાનં માતિકાય ધારણેન માતિકાધરા. તત્થ તત્થ ધમ્મપરિપુચ્છાય પરિપુચ્છતિ. અત્થપરિપુચ્છાય પરિપઞ્હતિ વીમંસતિ વિચારેતિ. ઇદં, ભન્તે, કથં, ઇમસ્સ કો અત્થોતિ પરિપુચ્છાપરિપઞ્હાકારદસ્સનં. અવિવટઞ્ચેવ પાળિયા અત્થં પદેસન્તરપાળિદસ્સનેન આગમતો વિવરન્તિ. અનુત્તાનીકતઞ્ચ યુત્તિવિભાવનેન ઉત્તાનિં કરોન્તિ. કઙ્ખાઠાનિયેસુ ધમ્મેસુ સંસયુપ્પત્તિયા હેતુતાય ગણ્ઠિટ્ઠાનભૂતેસુ પાળિપ્પદેસેસુ યાથાવતો વિનિચ્છયપ્પદાનેન કઙ્ખં પટિવિનોદેન્તિ.

એત્થ ચ નાતિદૂરં નાચ્ચાસન્નં ગમનાગમનસમ્પન્નન્તિ એકં અઙ્ગં, દિવા અપ્પાકિણ્ણં, રત્તિં અપ્પસદ્દં, અપ્પનિગ્ઘોસન્તિ એકં, અપ્પડંસમકસવાતાતપસરીસપસમ્ફસ્સન્તિ એકં, તસ્મિં ખો પન સેનાસને વિહરન્તસ્સ…પે… પરિક્ખારાતિ એકં, તસ્મિં ખો પન સેનાસને થેરા…પે… કઙ્ખં પટિવિનોદેન્તીતિ એકં. એવં પઞ્ચ અઙ્ગાનિ વેદિતબ્બાનિ. દુતિયાદીનિ ઉત્તાનત્થાનિ.

સેનાસનસુત્તાદિવણ્ણના નિટ્ઠિતા.

૫-૬. અપ્પમાદસુત્તાદિવણ્ણના

૧૫-૧૬. પઞ્ચમે કારાપકઅપ્પમાદો નામ ‘‘ઇમે અકુસલા ધમ્મા પહાતબ્બા, ઇમે કુસલા ધમ્મા ઉપસમ્પાદેતબ્બા’’તિ તંતંપરિવજ્જેતબ્બવજ્જનસમ્પાદેતબ્બસમ્પાદનવસેન પવત્તો અપ્પમાદો. એસાતિ અપ્પમાદો. લોકિયોવ ન લોકુત્તરો. અયઞ્ચાતિ ચ એસાતિ ચ અપ્પમાદમેવ વદતિ. તેસન્તિ ચાતુભૂમકધમ્માનં. પટિલાભકત્તેનાતિ પટિલાભાપનકત્તેન.

જઙ્ગલાનન્તિ જઙ્ગલચારીનં. જઙ્ગલ-સદ્દો ચેત્થ ખરભાવસામઞ્ઞેન પથવીપરિયાયો, ન અનુપટ્ઠાનવિદૂરદેસવાચી. તેનાહ ‘‘પથવીતલચારીન’’ન્તિ. પદાનં વુચ્ચમાનત્તા ‘‘સપાદકપાણાન’’ન્તિ વિસેસેત્વા વુત્તં. સમોધાનન્તિ અન્તોગધભાવં. તેનાહ ‘‘ઓધાનં પક્ખેપ’’ન્તિ. ‘‘ઉપક્ખેપ’’ન્તિપિ પઠન્તિ, ઉપનેત્વા પક્ખિપિતબ્બન્તિ અત્થો. વસ્સિકાય પુપ્ફં વસ્સિકં યથા ‘‘આમલકિયા ફલં આમલક’’ન્તિ. મહાતલસ્મિન્તિ ઉપરિપાસાદે. છટ્ઠં ઉત્તાનમેવ.

અપ્પમાદસુત્તાદિવણ્ણના નિટ્ઠિતા.

૭-૮. પઠમનાથસુત્તાદિવણ્ણના

૧૭-૧૮. સત્તમે યેહિ સીલાદીહિ સમન્નાગતો ભિક્ખુ ધમ્મસરણતાય ધમ્મેનેવ નાથતિ આસીસતિ અભિભવતીતિ નાથો વુચ્ચતિ, તે તસ્સ નાથભાવકરા ધમ્મા નાથકરણાતિ વુત્તાતિ આહ ‘‘અત્તનો સનાથભાવકરા પતિટ્ઠકરાતિ અત્થો’’તિ. તત્થ અત્તનો પતિટ્ઠકરાતિ યસ્સ નાથભાવકરા, તસ્સ અત્તનો પતિટ્ઠાવિધાયિનો. અપ્પતિટ્ઠો અનાથો, સપ્પતિટ્ઠો સનાથોતિ પતિટ્ઠત્થો નાથ-સદ્દો. કલ્યાણગુણયોગતો કલ્યાણાતિ દસ્સેન્તો ‘‘સીલાદિગુણસમ્પન્ના’’તિ આહ. મિજ્જનલક્ખણા મેત્તા એતસ્સ અત્થીતિ મિત્તો. સો વુત્તનયેન કલ્યાણો અસ્સ અત્થીતિ તસ્સ અત્થિતામત્તં કલ્યાણમિત્તપદેન વુત્તં. અસ્સ તેન સબ્બકાલં અવિજહિતવાસોતિ તં દસ્સેતું ‘‘કલ્યાણસહાયો’’તિ વુત્તન્તિ આહ ‘‘તેવસ્સા’’તિ. તે એવ કલ્યાણમિત્તા અસ્સ ભિક્ખુનો. સહ અયનતોતિ સહ પવત્તનતો. અસમોધાને ચિત્તેન, સમોધાને પન ચિત્તેન ચેવ કાયેન ચ સમ્પવઙ્કો. સુખં વચો એતસ્મિં અનુકૂલગાહિમ્હિ આદરગારવવતિ પુગ્ગલેતિ સુવચો. તેનાહ ‘‘સુખેન વત્તબ્બો’’તિઆદિ. ખમોતિ ખન્તો. તમેવસ્સ ખમભાવં દસ્સેતું ‘‘ગાળ્હેના’’તિઆદિ વુત્તં. વામતોતિ મિચ્છા, અયોનિસો વા ગણ્હાતિ. પટિપ્ફરતીતિ પટાણિકભાવેન તિટ્ઠતિ. પદક્ખિણં ગણ્હાતીતિ સમ્મા, યોનિસો વા ગણ્હાતિ.

ઉચ્ચાવચાનીતિ વિપુલખુદ્દકાનિ. તત્રુપગમનિયાયાતિ તત્ર તત્ર મહન્તે ખુદ્દકે ચ કમ્મે સાધનવસેન ઉપાયેન ઉપગચ્છન્તિયા, તસ્સ તસ્સ કમ્મસ્સ નિપ્ફાદને સમત્થાયાતિ અત્થો. તત્રુપાયાયાતિ વા તત્ર તત્ર કમ્મે સાધેતબ્બે ઉપાયભૂતાય.

ધમ્મે અસ્સ કામોતિ ધમ્મકામોતિ બ્યધિકરણાનમ્પિ બાહિરત્થો સમાસો હોતીતિ કત્વા વુત્તં. કામેતબ્બતો વા પિયાયિતબ્બતો કામો, ધમ્મો. ધમ્મો કામો અસ્સાતિ ધમ્મકામો. ધમ્મોતિ પરિયત્તિધમ્મો અધિપ્પેતોતિ આહ ‘‘તેપિટકં બુદ્ધવચનં પિયાયતીતિ અત્થો’’તિ. સમુદાહરણં કથનં સમુદાહારો, પિયો સમુદાહારો એતસ્સાતિ પિયસમુદાહારો. સયઞ્ચાતિ એત્થ ચ-સદ્દેન ‘‘સક્કચ્ચ’’ન્તિ પદં અનુકડ્ઢતિ. તેન સયઞ્ચ સક્કચ્ચં દેસેતુકામો હોતીતિ યોજના. અભિધમ્મો સત્ત પકરણાનિ ‘‘અધિકો અભિવિસિટ્ઠો ચ પરિયત્તિધમ્મો’’તિ કત્વા. વિનયો ઉભતોવિભઙ્ગા વિનયનતો કાયવાચાનં. અભિવિનયો ખન્ધકપરિવારા વિસેસતો આભિસમાચારિકધમ્મકિત્તનતો. આભિસમાચારિકધમ્મપારિપૂરિવસેનેવ હિ આદિબ્રહ્મચરિયકધમ્મપારિપૂરી. ધમ્મો એવ પિટકદ્વયસ્સપિ પરિયત્તિધમ્મભાવતો. મગ્ગફલાનિ અભિધમ્મો ‘‘નિબ્બાનધમ્મસ્સ અભિમુખો’’તિ કત્વા. કિલેસવૂપસમકરણં પુબ્બભાગિયા તિસ્સો સિક્ખા સઙ્ખેપતો વિવટ્ટનિસ્સિતો સમથો વિપસ્સના ચ. ઉળારપામોજ્જોતિ બલવપામોજ્જો. કારણત્થેતિ નિમિત્તત્થે. કુસલધમ્મનિમિત્તં હિસ્સ વીરિયારમ્ભો. તેનાહ ‘‘તેસં અધિગમત્થાયા’’તિ. કુસલેસુ ધમ્મેસૂતિ વા નિપ્ફાદેતબ્બે ભુમ્મં યથા ‘‘ચેતસો અવૂપસમે અયોનિસોમનસિકારપદટ્ઠાન’’ન્તિ. અટ્ઠમે નત્થિ વત્તબ્બં.

પઠમનાથસુત્તાદિવણ્ણના નિટ્ઠિતા.

૯. પઠમઅરિયાવાસસુત્તવણ્ણના

૧૯. નવમે અરિયાનં એવ આવાસાતિ અરિયાવાસા અનરિયાનં તાદિસાનં અસમ્ભવતો. અરિયાતિ ચેત્થ ઉક્કટ્ઠનિદ્દેસેન ખીણાસવા ગહિતા. તે ચ યસ્મા તેહિ સબ્બકાલં અવિજહિતવાસા એવ, તસ્મા વુત્તં ‘‘તે આવસિંસુ આવસન્તિ આવસિસ્સન્તી’’તિ. તત્થ આવસિંસૂતિ નિસ્સાય આવસિંસુ. પઞ્ચઙ્ગવિપ્પહીનતાદયો હિ અરિયાનં અપસ્સયા. તેસુ પઞ્ચઙ્ગવિપ્પહાનપચ્ચેકસચ્ચપનોદનએસનાઓસટ્ઠાનિ, ‘‘સઙ્ખાયેકં પટિસેવતિ, અધિવાસેતિ પરિવજ્જેતિ વિનોદેતી’’તિ (દી. નિ. ૩.૩૦૮; મ. નિ. ૨.૧૬૮; અ. નિ. ૧૦.૨૦) વુત્તેસુ અપસ્સેનેસુ વિનોદનઞ્ચ મગ્ગકિચ્ચાનેવ, ઇતરે મગ્ગેન ચ સમિજ્ઝન્તીતિ.

પઠમઅરિયાવાસસુત્તવણ્ણના નિટ્ઠિતા.

૧૦. દુતિયઅરિયાવાસસુત્તવણ્ણના

૨૦. દસમે કસ્મા પન ભગવા કુરુસુ વિહરન્તો ઇમં સુત્તં અભાસીતિ આહ ‘‘યસ્મા’’તિઆદિ. કુરુરટ્ઠં કિર તદા તન્નિવાસિસત્તાનં યોનિસોમનસિકારવન્તતાદિના યેભુય્યેન સુપ્પટિપન્નતાય પુબ્બે ચ કતપુઞ્ઞતાબલેન વા તદા ઉતુઆદિસમ્પત્તિયુત્તમેવ અહોસિ. કેચિ પન ‘‘પુબ્બે પવત્તકુરુવત્તધમ્માનુટ્ઠાનવાસનાય ઉત્તરકુરુ વિય યેભુય્યેન ઉતુઆદિસમ્પન્નમેવ હોતિ. ભગવતો કાલે સાતિસયં ઉતુસપ્પાયાદિયુત્તં રટ્ઠં અહોસી’’તિ વદન્તિ. તત્થ ભિક્ખૂ ભિક્ખુનિયો ઉપાસકા ઉપાસિકાયો ઉતુપચ્ચયાદિસમ્પન્નત્તા તસ્સ રટ્ઠસ્સ સપ્પાયઉતુપચ્ચયસેવનેન નિચ્ચં કલ્લસરીરા કલ્લચિત્તા ચ હોન્તિ. તે ચિત્તસરીરકલ્લતાય અનુગ્ગહિતપઞ્ઞાબલા ગમ્ભીરકથં પટિગ્ગહેતું સમત્થા પટિચ્ચસમુપ્પાદનિસ્સિતાનં ગમ્ભીરપઞ્ઞાનઞ્ચ કારકા હોન્તિ. તેનાહ ‘‘કુરુરટ્ઠવાસિનો ભિક્ખૂ ગમ્ભીરપઞ્ઞાકારકા’’તિઆદિ.

યુત્તપ્પયુત્તાતિ સતિપટ્ઠાનભાવનાય યુત્તા ચેવ પયુત્તા ચ. તસ્મિઞ્હિ (દી. નિ. અટ્ઠ. ૨.૩૭૩; મ. નિ. અટ્ઠ. ૧.૧૦૬) જનપદે ચતસ્સો પરિસા પકતિયાવ સતિપટ્ઠાનભાવનાનુયોગમનુયુત્તા વિહરન્તિ, અન્તમસો દાસકમ્મકરપરિજનાપિ સતિપટ્ઠાનપ્પટિસંયુત્તમેવ કથં કથેન્તિ. ઉદકતિત્થસુત્તકન્તનટ્ઠાનાદીસુપિ નિરત્થકકથા નામ નપ્પવત્તતિ. સચે કાચિ ઇત્થી, ‘‘અમ્મ, ત્વં કતરં સતિપટ્ઠાનભાવનં મનસિ કરોસી’’તિ પુચ્છિતા ‘‘ન કિઞ્ચી’’તિ વદતિ, તં ગરહન્તિ ‘‘ધીરત્થુ તવ જીવિતં, જીવમાનાપિ ત્વં મતસદિસા’’તિ. અથ નં ‘‘મા દાનિ પુન એવમકાસી’’તિ ઓવદિત્વા અઞ્ઞતરં સતિપટ્ઠાનં ઉગ્ગણ્હાપેન્તિ. યા પન ‘‘અહં અસુકં સતિપટ્ઠાનં નામ મનસિ કરોમી’’તિ વદતિ, તસ્સા ‘‘સાધુ સાધૂ’’તિ સાધુકારં દત્વા ‘‘તવ જીવિતં સુજીવિતં, ત્વં નામ મનુસ્સત્તં પત્તા, તવત્થાય સમ્માસમ્બુદ્ધો ઉપ્પન્નો’’તિઆદીહિ પસંસન્તિ. ન કેવલઞ્ચેત્થ મનુસ્સજાતિકાયેવ સતિપટ્ઠાનમનસિકારયુત્તા, તે નિસ્સાય વિહરન્તા તિરચ્છાનગતાપિ.

તત્રિદં વત્થુ – એકો કિર નટકો સુવપોતકં ગહેત્વા સિક્ખાપેન્તો વિચરતિ. સો ભિક્ખુનિઉપસ્સયં ઉપનિસ્સાય વસિત્વા ગમનકાલે સુવપોતકં પમુસ્સિત્વા ગતો. તં સામણેરિયો ગહેત્વા પટિજગ્ગિંસુ, ‘‘બુદ્ધરક્ખિતો’’તિ ચસ્સ નામં અકંસુ. તં એકદિવસં પુરતો નિસિન્નં દિસ્વા મહાથેરી આહ ‘‘બુદ્ધરક્ખિતા’’તિ. કિં, અય્યોતિ. અત્થિ તે કોચિ ભાવનામનસિકારોતિ? નત્થય્યેતિ. આવુસો, પબ્બજિતાનં સન્તિકે વસન્તેન નામ વિસ્સટ્ઠઅત્તભાવેન ભવિતું ન વટ્ટતિ, કોચિદેવ મનસિકારો ઇચ્છિતબ્બો, ત્વં પન અઞ્ઞં ન સક્ખિસ્સસિ, ‘‘અટ્ઠિ અટ્ઠી’’તિ સજ્ઝાયં કરોહીતિ. સો થેરિયા ઓવાદે ઠત્વા ‘‘અટ્ઠિ અટ્ઠી’’તિ સજ્ઝાયન્તો ચરતિ.

તં એકદિવસં પાતોવ તોરણગ્ગે નિસીદિત્વા બાલાતપં તપમાનં એકો સકુણો નખપઞ્જરેન અગ્ગહેસિ. સો ‘‘કિરિ કિરી’’તિ સદ્દમકાસિ. સામણેરિયો સુત્વા, ‘‘અય્યે, બુદ્ધરક્ખિતો સકુણેન ગહિતો, મોચેમ ન’’ન્તિ લેડ્ડુઆદીનિ ગહેત્વા અનુબન્ધિત્વા મોચેસું. તં આનેત્વા પુરતો ઠપિતં થેરી આહ, ‘‘બુદ્ધરક્ખિત, સકુણેન ગહિતકાલે કિં ચિન્તેસી’’તિ. અય્યે, ન અઞ્ઞં ચિન્તેસિં, ‘‘અટ્ઠિપુઞ્જોવ અટ્ઠિપુઞ્જં ગહેત્વા ગચ્છતિ, કતરસ્મિં ઠાને વિપ્પકિરિસ્સતી’’તિ એવં, અય્યે, અટ્ઠિપુઞ્જમેવ ચિન્તેસિન્તિ. સાધુ સાધુ, બુદ્ધરક્ખિત, અનાગતે ભવક્ખયસ્સ તે પચ્ચયો ભવિસ્સતીતિ. એવં તત્થ તિરચ્છાનગતાપિ સતિપટ્ઠાનમનસિકારયુત્તા.

દીઘનિકાયાદીસુ મહાનિદાનાદીનીતિ દીઘનિકાયે મહાનિદાનં (દી. નિ. ૨.૯૫ આદયો) સતિપટ્ઠાનં (દી. નિ. ૨.૩૭૨ આદયો) મજ્ઝિમનિકાયે સતિપટ્ઠાનં (મ. નિ. ૧.૧૦૫ આદયો) સારોપમં (મ. નિ. ૧.૩૦૭ આદયો) રુક્ખોપમં રટ્ઠપાલં માગણ્ડિયં આનેઞ્જસપ્પાયન્તિ (મ. નિ. ૩.૬૬ આદયો) એવમાદીનિ.

ઞાણાદયોતિ ઞાણઞ્ચેવ તંસમ્પયુત્તધમ્મા ચ. તેનાહ ‘‘ઞાણન્તિ વુત્તે’’તિઆદિ. ઞાણસમ્પયુત્તચિત્તાનિ લબ્ભન્તિ તેહિ વિના સમ્પજાનતાય અસમ્ભવતો. મહાચિત્તાનીતિ અટ્ઠપિ મહાકિરિયચિત્તાનિ લબ્ભન્તિ ‘‘સતતવિહારા’’તિ વચનતો ઞાણુપ્પત્તિપચ્ચયરહિતકાલેપિ પવત્તિજોતનતો. દસ ચિત્તાનીતિ અટ્ઠ મહાકિરિયચિત્તાનિ હસિતુપ્પાદવોટ્ઠબ્બનચિત્તેહિ સદ્ધિં દસ ચિત્તાનિ લબ્ભન્તિ. અરજ્જનાદુસ્સનવસેન પવત્તિ તેસમ્પિ સાધારણાતિ. ‘‘ઉપેક્ખકો વિહરતી’’તિ વચનતો છળઙ્ગુપેક્ખાવસેન આગતાનં ઇમેસં સતતવિહારાનં સોમનસ્સં કથં લબ્ભતીતિ આહ ‘‘આસેવનવસેન લબ્ભતી’’તિ. કિઞ્ચાપિ ખીણાસવો ઇટ્ઠાનિટ્ઠેપિ આરમ્મણે મજ્ઝત્તો વિય બહુલં ઉપેક્ખકો વિહરતિ અત્તનો પરિસુદ્ધપકતિભાવાવિજહનતો. કદાચિ પન તથા ચેતોભિસઙ્ખારાભાવે યં તં સભાવતો ઇટ્ઠં આરમ્મણં, તત્થ યાથાવસભાવગ્ગહણવસેનપિ અરહતો ચિત્તં સોમનસ્સસહગતં હુત્વા પવત્તતેવ, તઞ્ચ ખો પુબ્બાસેવનવસેન. તેન વુત્તં ‘‘આસેવનવસેન લબ્ભતી’’તિ. આરક્ખકિચ્ચં સાધેતિ સતિવેપુલ્લપ્પત્તત્તા. ચરતોતિઆદિના નિચ્ચસમાદાનં દસ્સેતિ, તં વિક્ખેપાભાવેન દટ્ઠબ્બં.

પબ્બજ્જૂપગતાતિ યં કિઞ્ચિ પબ્બજ્જં ઉપગતા, ન સમિતપાપા. ભોવાદિનોતિ જાતિમત્તબ્રાહ્મણે વદતિ. પાટેક્કસચ્ચાનીતિ તેહિ તેહિ દિટ્ઠિગતિકેહિ પાટિયેક્કં ગહિતાનિ ‘‘ઇદમેવ સચ્ચ’’ન્તિ અભિનિવિટ્ઠાનિ દિટ્ઠિસચ્ચાદીનિ. તાનિપિ હિ ‘‘ઇદમેવ સચ્ચ’’ન્તિ ગહણં ઉપાદાય ‘‘સચ્ચાની’’તિ વોહરીયન્તિ. તેનાહ ‘‘ઇદમેવા’’તિઆદિ. નીહટાનીતિ અત્તનો સન્તાનતો નીહરિતાનિ અપનીતાનિ. ગહિતગ્ગહણસ્સાતિ અરિયમગ્ગાધિગમતો પુબ્બે ગહિતસ્સ દિટ્ઠિગ્ગાહસ્સ. વિસ્સટ્ઠભાવવેવચનાનીતિ અરિયમગ્ગેન સબ્બસો પરિચ્ચાગભાવસ્સ અધિવચનાનિ.

નત્થિ એતાસં વયો વેકલ્લન્તિ અવયાતિ આહ ‘‘અનૂના’’તિ, અનવસેસોતિ અત્થો. એસનાતિ કામેસનાદયો. મગ્ગસ્સ કિચ્ચનિપ્ફત્તિ કથિતા રાગાદીનં પહીનભાવદીપનતો. પચ્ચવેક્ખણફલં કથિતન્તિ પચ્ચવેક્ખણમુખેન અરિયફલં કથિતં. અધિગતે હિ અગ્ગફલે સબ્બસો રાગાદીનં અનુપ્પાદધમ્મતં પજાનાતિ, તઞ્ચ પજાનનં પચ્ચવેક્ખણઞાણન્તિ.

દુતિયઅરિયાવાસસુત્તવણ્ણના નિટ્ઠિતા.

નાથવગ્ગવણ્ણના નિટ્ઠિતા.