૫-૪૨. સઙ્ગારવસુત્તાદિવણ્ણના

૧૧૭-૧૫૪. પઞ્ચમે અપ્પકાતિ થોકા, ન બહૂ. અથાયં ઇતરા પજાતિ યા પનાયં અવસેસા પજા સક્કાયદિટ્ઠિતીરમેવ અનુધાવતિ, અયમેવ બહુતરાતિ અત્થો. સમ્મદક્ખાતેતિ સમ્મા અક્ખાતે સુકથિતે. ધમ્મેતિ તવ દેસનાધમ્મે. ધમ્માનુવત્તિનોતિ તં ધમ્મં સુત્વા તદનુચ્છવિકં પટિપદં પૂરેત્વા મગ્ગફલસચ્છિકરણેન ધમ્માનુવત્તિનો. મચ્ચુનો ઠાનભૂતન્તિ કિલેસમારસઙ્ખાતસ્સ મચ્ચુનો નિવાસટ્ઠાનભૂતં. સુદુત્તરં તરિત્વા પારમેસ્સન્તીતિ યે જના ધમ્માનુવત્તિનો, તે એતં સુદુત્તરં દુરતિક્કમં મારધેય્યં તરિત્વા અતિક્કમિત્વા નિબ્બાનપારં ગમિસ્સન્તિ.

કણ્હં ધમ્મં વિપ્પહાયાતિ કાયદુચ્ચરિતાદિભેદં અકુસલં ધમ્મં જહિત્વા. સુક્કં ભાવેથાતિ પણ્ડિતો ભિક્ખુ અભિનિક્ખમનતો પટ્ઠાય યાવ અરહત્તમગ્ગા કાયસુચરિતાદિભેદં સુક્કં ધમ્મં ભાવેય્ય. ઓકા અનોકમાગમ્માતિ ઓકં વુચ્ચતિ આલયો, અનોકં વુચ્ચતિ અનાલયો. આલયતો નિક્ખમિત્વા અનાલયસઙ્ખાતં નિબ્બાનં પટિચ્ચ આરબ્ભ.

તત્રાભિરતિમિચ્છેય્યાતિ યસ્મિં અનાલયસઙ્ખાતે વિવેકે નિબ્બાને ઇમેહિ સત્તેહિ દુરભિરમં, તત્રાભિરતિમિચ્છેય્ય. દુવિધેપિ કામેતિ વત્થુકામકિલેસકામે. ચિત્તક્લેસેહીતિ પઞ્ચહિ નીવરણેહિ અત્તાનં પરિયોદપેય્ય વોદાપેય્ય, પરિસોધેય્યાતિ અત્થો.

સમ્બોધિયઙ્ગેસૂતિ સમ્બોજ્ઝઙ્ગેસુ. સમ્મા ચિત્તં સુભાવિતન્તિ સમ્મા હેતુના નયેન ચિત્તં સુટ્ઠુ ભાવિતં વડ્ઢિતં. જુતિમન્તોતિ આનુભાવવન્તો, અરહત્તમગ્ગઞાણજુતિયા ખન્ધાદિભેદે ધમ્મે જોતેત્વા ઠિતાતિ અત્થો. તે લોકે પરિનિબ્બુતાતિ તે ઇમસ્મિં ખન્ધાદિલોકે પરિનિબ્બુતા નામ અરહત્તપ્પત્તિતો પટ્ઠાય કિલેસવટ્ટસ્સ ખેપિતત્તા સઉપાદિસેસેન, ચરિમચિત્તનિરોધેન ખન્ધવટ્ટસ્સ ખેપિતત્તા અનુપાદિસેસેન ચાતિ દ્વીહિ પરિનિબ્બાનેહિ પરિનિબ્બુતા, અનુપાદાનો વિય પદીપો અપણ્ણત્તિકભાવં ગતાતિ અત્થો.

ઇતો પરં યાવ તતિયો પણ્ણાસકો, તાવ ઉત્તાનત્થમેવ.

સઙ્ગારવસુત્તાદિવણ્ણના નિટ્ઠિતા.

તતિયપણ્ણાસકં નિટ્ઠિતં.