(૧૧) ૧. સમણસઞ્ઞાવગ્ગો

૧-૧૨. સમણસઞ્ઞાસુત્તાદિવણ્ણના

૧૦૧-૧૧૨. તતિયસ્સ પઠમાદીનિ ઉત્તાનાનિ. છટ્ઠે નિજ્જરકારણાનીતિ પજહનકારણાનિ. ઇમસ્મિં મગ્ગો કથીયતીતિ કત્વા ‘‘અયં હેટ્ઠા…પે… પુન ગહિતા’’તિ વુત્તં. કિઞ્ચાપિ નિજ્જિણ્ણા મિચ્છાદિટ્ઠીતિ આનેત્વા સમ્બન્ધિતબ્બં. યથા મિચ્છાદિટ્ઠિ વિપસ્સનાય નિજ્જિણ્ણાપિ ન સમુચ્છિન્નાતિ સમુચ્છેદપ્પહાનદસ્સનત્થં પુન ગહિતા, એવં મિચ્છાસઙ્કપ્પાદયોપિ વિપસ્સનાય પહીનાપિ અસમુચ્છિન્નતાય ઇધ પુન ગહિતાતિ અયમત્થો ‘‘મિચ્છાસઙ્કપ્પસ્સા’’તિઆદીસુ સબ્બપદેસુ વત્તબ્બોતિ દસ્સેતિ ‘‘એવં સબ્બપદેસુ યોજેતબ્બો’’તિ ઇમિના. એત્થ ચાતિ ‘‘સમ્માવિમુત્તિપચ્ચયા ચ અનેકે કુસલા ધમ્મા ભાવનાપારિપૂરિં ગચ્છન્તી’’તિ એતસ્મિં પાળિપદે. એત્થ ચ સમુચ્છેદવસેન ચ પટિપ્પસ્સદ્ધિવસેન ચ પટિપક્ખધમ્માનં સમ્મદેવ વિમુચ્ચનં સમ્માવિમુત્તિ. તપ્પચ્ચયા ચ મગ્ગફલેસુ અટ્ઠ ઇન્દ્રિયાનિ ભાવનાપારિપૂરિં ઉપગચ્છન્તીતિ મગ્ગસમ્પયુત્તાનિપિ સદ્ધાદીનિ ઇન્દ્રિયાનિ ઉદ્ધટાનિ. મગ્ગવસેન હિ ફલેસુ ભાવનાપારિપૂરી નામાતિ. અભિનન્દનટ્ઠેનાતિ અતિવિય સિનેહનટ્ઠેન. ઇદઞ્હિ સોમનસ્સિન્દ્રિયં ઉક્કંસગતસાતસભાવતો સમ્પયુત્તધમ્મે સિનેહન્તં તેમેન્તં વિય પવત્તતિ. પવત્તસન્તતિઆધિપતેય્યટ્ઠેનાતિ વિપાકસન્તાનસ્સ જીવને અધિપતિભાવેન. એવન્તિઆદિ વુત્તસ્સેવ અત્થસ્સ નિગમનં. સત્તમાદીનિ ઉત્તાનત્થાનિ.

સમણસઞ્ઞાસુત્તાદિવણ્ણના નિટ્ઠિતા.

સમણસઞ્ઞાવગ્ગવણ્ણના નિટ્ઠિતા.