૨૦. વીસતિમો પરિચ્છેદો

મગ્ગામગ્ગઞાણદસ્સનવિસુદ્ધિનિદ્દેસો

૧૨૬૩. કલાપસમ્મસનેનેવ,

યોગો કરણિયો સિયા;

મગ્ગામગ્ગે તુ ઞાણં ત-

મધિગન્તું પનિચ્છતા.

૧૨૬૪. પચ્ચુપ્પન્નસ્સ ધમ્મસ્સ, નિબ્બત્તિ ઉદયો મતો;

વયો વિપરિણામોતિ, તસ્સેવ સમુદીરિતા.

૧૨૬૫. અનુપસ્સનાપિ ઞાણન્તિ, વરઞાણેન દેસિતં;

સો પનેવં પજાનાતિ, યોગાવચરમાણવો.

૧૨૬૬. ઇમસ્સ નામરૂપસ્સ, પુબ્બે ઉપ્પત્તિતો પન;

નિચયો રાસિ વા નત્થિ, તથા ઉપ્પજ્જતોપિ ચ.

૧૨૬૭. રાસિતો નિચયા વાપિ, નત્થિ આગમનન્તિ ચ;

તથા નિરુજ્ઝમાનસ્સ, ન દિસાગમનન્તિ ચ.

૧૨૬૮. નિરુદ્ધસ્સાપિ એકસ્મિં, ઠાને નત્થિ ચયોતિ ચ;

એત્થ વીણૂપમા વુત્તા, એતસ્સત્થસ્સ દીપને.

૧૨૬૯. ઉદબ્બયમનક્કારમેવં સઙ્ખેપતો પન;

કત્વા તસ્સેવ ઞાણસ્સ, વિભઙ્ગસ્સ વસેન તુ.

૧૨૭૦. ‘‘અવિજ્જાસમુદયા રૂપસમુદયો’’તિ હિ આદિના;

નયેનેકેકખન્ધસ્સ, ઉદયબ્બયદસ્સને.

૧૨૭૧. દસ દસાતિ કત્વાન, વુત્તા પઞ્ઞાસલક્ખણા;

તેસં પન વસેનાપિ, ધમ્મે સમનુપસ્સતિ.

૧૨૭૨. એવં રૂપુદયો હોતિ, એવમસ્સ વયો ઇતિ;

ઉદેતિ એવં રૂપમ્પિ, એવં રૂપં તુ વેતિ ચ.

૧૨૭૩. એવં પચ્ચયતોપેત્થ, ખણતો ઉદયબ્બયં;

પસ્સતો સબ્બધમ્મા ચ, પાકટા હોન્તિ તસ્સ તે.

૧૨૭૪. ઉદકે દણ્ડરાજીવ, આરગ્ગેરિવ સાસપો;

વિજ્જુપ્પાદાવ ધમ્મા તે, પરિત્તટ્ઠાયિનો સિયું.

૧૨૭૫. કદલીસુપિનાલાતચક્કમાયુપમા ઇમે;

અસારા પન નિસ્સારા, હુત્વા ખાયન્તિ યોગિનો.

૧૨૭૬. એવમેત્તાવતા તેન, ઉદયબ્બયદસ્સનં;

લક્ખણાનિ ચ પઞ્ઞાસ, પટિવિજ્ઝ ઠિતં પન.

૧૨૭૭. ઞાણં અધિગતં હોતિ, તરુણં પઠમં પન;

યસ્સ ચાધિગમા યોગી, હોતારદ્ધવિપસ્સકો.

૧૨૭૮. વિપસ્સનાય હેતાય,

કરુણાયાથ યોગિનો;

વિપસ્સકસ્સ જાયન્તે,

ઉપક્લેસા દસેવિમે.

૧૨૭૯. ઓભાસો પીતિ પસ્સદ્ધિ, ઞાણં સદ્ધા સતી સુખં;

ઉપેક્ખા વીરિયં નિકન્તીતિ, ઉપક્લેસા દસેવિમે.

૧૨૮૦. સમ્પત્તપટિવેધસ્સ, સોતાપન્નાદિનોપિ ચ;

તથા વિપ્પટિપન્નસ્સ, ઉપક્લેસા ન જાયરે.

૧૨૮૧. સમ્માવ પટિપન્નસ્સ, યુત્તયોગસ્સ ભિક્ખુનો;

સદા વિપસ્સકસ્સેવ, ઉપ્પજ્જન્તિ કિરસ્સુ તે.

૧૨૮૨. વિપસ્સનાય ઓભાસો, ઓભાસોતિ પવુચ્ચતિ;

તસ્મિં પન સમુપ્પન્ને, યોગાવચરભિક્ખુ સો.

૧૨૮૩. મગ્ગપ્પત્તો ફલપ્પત્તો, અહમસ્મીતિ ગણ્હતિ;

અમગ્ગંયેવ મગ્ગોતિ, તસ્સેવં પન ગણ્હતો.

૧૨૮૪. એવં વિપસ્સનાવીથિ,

ઓક્કન્તા નામ હોતિ સા;

ઓભાસમેવ સો ભિક્ખુ,

અસ્સાદેન્તો નિસીદતિ.

૧૨૮૫. પીતિ વિપ્પસ્સનાપીતિ, તસ્સ તસ્મિં ખણે પન;

તદા પઞ્ચવિધા પીતિ, જાયન્તે ખુદ્દિકાદિકા.

૧૨૮૬. વિપસ્સનાય પસ્સદ્ધિ, પસ્સદ્ધીતિ પવુચ્ચતિ;

યોગિનો કાયચિત્તાનિ, પસ્સદ્ધાનેવ હોન્તિ હિ.

૧૨૮૭. લહૂનિ ચ મુદૂનેવ, કમ્મઞ્ઞાનેવ હોન્તિ હિ;

પસ્સદ્ધાદીહિ સો ભિક્ખુ, અનુગ્ગહિતમાનસો.

૧૨૮૮. અમાનુસિં રતિં નામ,

અનુભોતિ અનુત્તરં;

યં સન્ધાય ચ ગાથાયો,

ભાસિતા હિ મહેસિના.

૧૨૮૯. ‘‘સુઞ્ઞાગારં પવિટ્ઠસ્સ, સન્તચિત્તસ્સ ભિક્ખુનો;

અમાનુસી રતિ હોતિ, સમ્મા ધમ્મં વિપસ્સતો.

૧૨૯૦. ‘‘યતો યતો સમ્મસતિ, ખન્ધાનં ઉદયબ્બયં;

લભતી પીતિપામોજ્જં, અમતં તં વિજાનત’’ન્તિ.

૧૨૯૧. ઞાણાદયો ઉપક્લેસા, ઞેય્યા વુત્તનયેનિધ;

એતે દસ ઉપક્લેસા, વજ્જનીયાવ યોગિના.

૧૨૯૨. એત્થોભાસાદયો ધમ્મા,

ઉપક્લેસસ્સ વત્થુતો;

ઉપક્લેસાતિ નિદ્દિટ્ઠા,

ઉપક્લેસનિકન્તિ તુ.

૧૨૯૩. તં તમાવજ્જમાનસ્સ, ભાવના પરિહાયતિ;

અસત્તે સત્તસઞ્ઞી ચ, હોતિ અપ્પસ્સુતો નરો.

૧૨૯૪. સબ્બોભાસાદયો ધમ્મે, ન મગ્ગોતિ વિચારયં;

મગ્ગો વિપસ્સનાઞાણં, ઇચ્ચેવં પન પણ્ડિતો.

૧૨૯૫. વવત્થપેતિ મગ્ગઞ્ચ, અમગ્ગઞ્ચેવ ચેતસા;

તસ્સ ચેવં અયં મગ્ગો, નાયં મગ્ગોતિ યોગિનો.

૧૨૯૬. મગ્ગામગ્ગઞ્ચ વિઞ્ઞાય, ઠિતઞાણમિદં પન;

મગ્ગામગ્ગેસુઞાણન્તિ, ભૂરિઞાણેન દેસિતં.

૧૨૯૭. મગ્ગામગ્ગઞાણદસ્સનેસુ કોવિદા,

સારાસારવેદિનો સમાહિતાહિતા;

મગ્ગામગ્ગઞાણદસ્સનન્તિ તં ઇદં,

બુદ્ધા બુદ્ધસાવકા વદન્તિ વાદિનો.

ઇતિ અભિધમ્માવતારે મગ્ગામગ્ગઞાણદસ્સનવિસુદ્ધિનિદ્દેસો

નામ વીસતિમો પરિચ્છેદો.