૧૮. અટ્ઠારસમો પરિચ્છેદો

દિટ્ઠિવિસુદ્ધિનિદ્દેસવણ્ણના

૧૧૭૫. યા સઞ્જાનનમત્તંવ, સઞ્ઞા નીલાદિતો પનાતિ સા સઞ્ઞા નીલાદિવસેન સઞ્જાનનમત્તંવ કરોતિ. લક્ખણપ્પટિવેધન્તિ અનિચ્ચાદિલક્ખણપટિબુજ્ઝનં.

૧૧૭૭. તં વિઞ્ઞાણં ઉસ્સક્કિત્વા ઉદ્ધં સક્કં કત્વા સત્તે મગ્ગં પાપેતું ન સક્કોતિ.

૧૧૭૮-૯. સબ્બેસં પન ધમ્માનં સભાવપટિવેધનં અવિપરીતવસેન પટિબુજ્ઝનં પઞ્ઞાય લક્ખણં.

૧૧૮૦. સમાધિ આસન્નકારણં એતાયાતિ સમાધાસન્નકારણા.

૧૧૮૧. લક્ખણેનેકધાતિ સબ્બધમ્મં પટિબુજ્ઝનલક્ખણેન પઞ્ઞાવ એકધા વુત્તા.

૧૧૮૩. ભૂરિપઞ્ઞેનાતિ ભૂતે અત્થે અવિપરીતે અત્થે રમતીતિ ભૂરિ, ભૂરિ પઞ્ઞા એતસ્સાતિ ભૂરિપઞ્ઞો, તેન.

૧૧૮૬-૯૧. તીસુ અત્થધમ્મનિરુત્તીસુ ચ ઞાણેસુ અત્થધમ્મનિરુત્તીસુ જાતેસુ ઞાણેસુ ચ ઞાણં. યં કિઞ્ચિ પચ્ચયુપ્પન્નં ફલં ધમ્મજાતં. ભાસિતત્થોતિ પાળિયા અત્થો. એતે પઞ્ચ ધમ્મા અત્થસઞ્ઞિતા અત્થનામકા. ફલનિબ્બત્તકો હેતૂતિ જનનકો પચ્ચયો. ભાસિતન્તિ પાળિ. ધમ્મસઞ્ઞિતાતિ ધમ્મનામકા. સભાવનિરુત્તીતિ અવિપરીતવોહારો. પરિયત્તીતિ સિક્ખનં. સવનાધિગમેહિ પુબ્બયોગેન પુબ્બે પવત્તનાય.

૧૧૯૨. ભૂમિભૂતેસૂતિ વિપસ્સનાય ભૂમિભૂતેસુ.

૧૧૯૪. જનનાદિતોતિ જાતિઆદિતો ભીતેન પઞ્ઞા ભાવેતબ્બા.

૧૨૦૩. એકાસીતિયા ચિત્તેનાતિ લોકુત્તરચિત્તવજ્જિતેન વિપસ્સનાભૂમિભૂતેન એકાસીતિયા ચિત્તેન.

૧૨૦૮. સત્તસમ્મોહઘાતત્થન્તિ સત્તોતિ સમ્મોહસ્સ વિનાસિતત્થં.

૧૨૧૧. નિરીહકન્તિ ઈહવિરહિતં બ્યાપારવિરહિતં, દારુરજ્જુસમાયોગે.

૧૨૧૫. ઉભો ભિજ્જન્તિ પચ્ચયાતિ અઞ્ઞમઞ્ઞપચ્ચયકારણા.

૧૨૨૫. અન્તદ્વયન્તિ કામસુખલ્લિકાનુયોગઅત્તકિલમથાનુયોગદ્વયં. ભાવયેતિ દિટ્ઠિવિસુદ્ધિં વડ્ઢેય્ય.

ઇતિ અભિધમ્માવતારટીકાય

દિટ્ઠિવિસુદ્ધિનિદ્દેસવણ્ણના નિટ્ઠિતા.

અટ્ઠારસમો પરિચ્છેદો.