૭. સમત્તસુત્તં

૩૯૩. તંયેવ નિદાનં. એકમન્તં નિસિન્નો ખો આયસ્મા સારિપુત્તો આયસ્મન્તં અનુરુદ્ધં એતદવોચ – ‘‘‘અસેખો, અસેખો’તિ, આવુસો અનુરુદ્ધ, વુચ્ચતિ. કિત્તાવતા નુ ખો, આવુસો, અસેખો હોતી’’તિ? ‘‘ચતુન્નં ખો, આવુસો, સતિપટ્ઠાનાનં સમત્તં ભાવિતત્તા અસેખો હોતિ’’.

‘‘કતમેસં ચતુન્નં? ઇધાવુસો, ભિક્ખુ કાયે કાયાનુપસ્સી વિહરતિ આતાપી સમ્પજાનો સતિમા, વિનેય્ય લોકે અભિજ્ઝાદોમનસ્સં; વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરતિ આતાપી સમ્પજાનો સતિમા, વિનેય્ય લોકે અભિજ્ઝાદોમનસ્સં. ઇમેસં ખો, આવુસો, ચતુન્નં સતિપટ્ઠાનાનં સમત્તં ભાવિતત્તા અસેખો હોતી’’તિ. સત્તમં.