૭. મહાકપ્પિનસુત્તં

૯૮૩. સાવત્થિનિદાનં. તેન ખો પન સમયેન આયસ્મા મહાકપ્પિનો ભગવતો અવિદૂરે નિસિન્નો હોતિ પલ્લઙ્કં આભુજિત્વા ઉજું કાયં પણિધાય પરિમુખં સતિં ઉપટ્ઠપેત્વા. અદ્દસા ખો ભગવા આયસ્મન્તં મહાકપ્પિનં અવિદૂરે નિસિન્નં પલ્લઙ્કં આભુજિત્વા ઉજું કાયં પણિધાય પરિમુખં સતિં ઉપટ્ઠપેત્વા. દિસ્વાન ભિક્ખૂ આમન્તેસિ –

‘‘પસ્સથ નો તુમ્હે, ભિક્ખવે, એતસ્સ ભિક્ખુનો કાયસ્સ ઇઞ્જિતત્તં વા ફન્દિતત્તં વા’’તિ? ‘‘યદાપિ મયં, ભન્તે, તં આયસ્મન્તં પસ્સામ સઙ્ઘમજ્ઝે વા નિસિન્નં એકં વા રહો નિસિન્નં, તદાપિ મયં તસ્સ આયસ્મતો ન પસ્સામ કાયસ્સ ઇઞ્જિતત્તં વા ફન્દિતત્તં વા’’તિ.

‘‘યસ્સ, ભિક્ખવે, સમાધિસ્સ ભાવિતત્તા બહુલીકતત્તા નેવ કાયસ્સ ઇઞ્જિતત્તં વા હોતિ ફન્દિતત્તં વા, ન ચિત્તસ્સ ઇઞ્જિતત્તં વા હોતિ ફન્દિતત્તં વા, તસ્સ સો, ભિક્ખવે, ભિક્ખુ સમાધિસ્સ નિકામલાભી અકિચ્છલાભી અકસિરલાભી. કતમસ્સ ચ, ભિક્ખવે, સમાધિસ્સ ભાવિતત્તા બહુલીકતત્તા નેવ કાયસ્સ ઇઞ્જિતત્તં વા હોતિ ફન્દિતત્તં વા, ન ચિત્તસ્સ ઇઞ્જિતત્તં વા હોતિ ફન્દિતત્તં વા?

‘‘આનાપાનસ્સતિસમાધિસ્સ, ભિક્ખવે, ભાવિતત્તા બહુલીકતત્તા નેવ કાયસ્સ ઇઞ્જિતત્તં વા હોતિ ફન્દિતત્તં વા, ન ચિત્તસ્સ ઇઞ્જિતત્તં વા હોતિ ફન્દિતત્તં વા. કથં ભાવિતે ચ, ભિક્ખવે, આનાપાનસ્સતિસમાધિમ્હિ કથં બહુલીકતે નેવ કાયસ્સ ઇઞ્જિતત્તં વા હોતિ ફન્દિતત્તં વા, ન ચિત્તસ્સ ઇઞ્જિતત્તં વા હોતિ ફન્દિતત્તં વા?

‘‘ઇધ, ભિક્ખવે, ભિક્ખુ અરઞ્ઞગતો વા રુક્ખમૂલગતો વા સુઞ્ઞાગારગતો વા નિસીદતિ પલ્લઙ્કં આભુજિત્વા ઉજું કાયં પણિધાય પરિમુખં સતિં ઉપટ્ઠપેત્વા. સો સતોવ અસ્સસતિ, સતોવ પસ્સસતિ…પે… ‘પટિનિસ્સગ્ગાનુપસ્સી અસ્સસિસ્સામી’તિ સિક્ખતિ, ‘પટિનિસ્સગ્ગાનુપસ્સી પસ્સસિસ્સામી’તિ સિક્ખતિ. એવં ભાવિતે ચ ખો, ભિક્ખવે, આનાપાનસ્સતિસમાધિમ્હિ એવં બહુલીકતે નેવ કાયસ્સ ઇઞ્જિતત્તં વા હોતિ ફન્દિતત્તં વા, ન ચિત્તસ્સ ઇઞ્જિતત્તં વા હોતિ ફન્દિતત્તં વા’’તિ. સત્તમં.