૨-૬. દુતિયાદિસમુદ્દનિન્નસુત્તપઞ્ચકં

૧૨૨-૧૨૬. ‘‘સેય્યથાપિ, ભિક્ખવે, યમુના નદી સમુદ્દનિન્ના સમુદ્દપોણા સમુદ્દપબ્ભારા; એવમેવ ખો, ભિક્ખવે, ભિક્ખુ…પે… સેય્યથાપિ, ભિક્ખવે, અચિરવતી નદી સમુદ્દનિન્ના સમુદ્દપોણા સમુદ્દપબ્ભારા; એવમેવ ખો, ભિક્ખવે, ભિક્ખુ…પે… સેય્યથાપિ, ભિક્ખવે, સરભૂ નદી સમુદ્દનિન્ના સમુદ્દપોણા સમુદ્દપબ્ભારા; એવમેવ ખો, ભિક્ખવે, ભિક્ખુ…પે… સેય્યથાપિ, ભિક્ખવે, મહી નદી સમુદ્દનિન્ના સમુદ્દપોણા સમુદ્દપબ્ભારા; એવમેવ ખો, ભિક્ખવે, ભિક્ખુ…પે… સેય્યથાપિ, ભિક્ખવે, યા કાચિમા મહાનદિયો, સેય્યથિદં – ગઙ્ગા, યમુના, અચિરવતી, સરભૂ, મહી, સબ્બા તા સમુદ્દનિન્ના સમુદ્દપોણા સમુદ્દપબ્ભારા; એવમેવ ખો, ભિક્ખવે, ભિક્ખુ અરિયં અટ્ઠઙ્ગિકં મગ્ગં ભાવેન્તો અરિયં અટ્ઠઙ્ગિકં મગ્ગં બહુલીકરોન્તો નિબ્બાનનિન્નો હોતિ નિબ્બાનપોણો નિબ્બાનપબ્ભારો. કથઞ્ચ, ભિક્ખવે, ભિક્ખુ અરિયં અટ્ઠઙ્ગિકં મગ્ગં ભાવેન્તો અરિયં અટ્ઠઙ્ગિકં મગ્ગં બહુલીકરોન્તો નિબ્બાનનિન્નો હોતિ નિબ્બાનપોણો નિબ્બાનપબ્ભારો? ઇધ, ભિક્ખવે, ભિક્ખુ સમ્માદિટ્ઠિં ભાવેતિ અમતોગધં અમતપરાયનં અમતપરિયોસાનં…પે… સમ્માસમાધિં ભાવેતિ અમતોગધં અમતપરાયનં અમતપરિયોસાનં. એવં ખો, ભિક્ખવે, ભિક્ખુ અરિયં અટ્ઠઙ્ગિકં મગ્ગં ભાવેન્તો અરિયં અટ્ઠઙ્ગિકં મગ્ગં બહુલીકરોન્તો નિબ્બાનનિન્નો હોતિ નિબ્બાનપોણો નિબ્બાનપબ્ભારો’’તિ. છટ્ઠં.

(અમતોગધદ્વાદસકી તતિયકી).