૩. બલવગ્ગો

૧. વિસારદસુત્તં

૩૦૪. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં – ઇમાનિ ખો, ભિક્ખવે, પઞ્ચ માતુગામસ્સ બલાનિ. ઇમેહિ ખો, ભિક્ખવે, પઞ્ચહિ બલેહિ સમન્નાગતો માતુગામો વિસારદો અગારં અજ્ઝાવસતી’’તિ. પઠમં.

૨. પસય્હસુત્તં

૩૦૫. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં – ઇમાનિ ખો, ભિક્ખવે, પઞ્ચ માતુગામસ્સ બલાનિ. ઇમેહિ ખો, ભિક્ખવે, પઞ્ચહિ બલેહિ સમન્નાગતો માતુગામો સામિકં પસય્હ અગારં અજ્ઝાવસતી’’તિ. દુતિયં.

૩. અભિભુય્યસુત્તં

૩૦૬. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં – ઇમાનિ ખો, ભિક્ખવે, પઞ્ચ માતુગામસ્સ બલાનિ. ઇમેહિ ખો, ભિક્ખવે, પઞ્ચહિ બલેહિ સમન્નાગતો માતુગામો સામિકં અભિભુય્ય વત્તતી’’તિ. તતિયં.

૪. એકસુત્તં

૩૦૭. ‘‘એકેન ચ ખો, ભિક્ખવે, બલેન સમન્નાગતો પુરિસો માતુગામં અભિભુય્ય વત્તતિ. કતમેન એકેન બલેન? ઇસ્સરિયબલેન અભિભૂતં માતુગામં નેવ રૂપબલં તાયતિ, ન ભોગબલં તાયતિ, ન ઞાતિબલં તાયતિ, ન પુત્તબલં તાયતિ, ન સીલબલં તાયતી’’તિ. ચતુત્થં.

૫. અઙ્ગસુત્તં

૩૦૮. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં. રૂપબલેન ચ, ભિક્ખવે, માતુગામો સમન્નાગતો હોતિ, ન ચ ભોગબલેન – એવં સો તેનઙ્ગેન અપરિપૂરો હોતિ. યતો ચ ખો, ભિક્ખવે, માતુગામો રૂપબલેન ચ સમન્નાગતો હોતિ, ભોગબલેન ચ – એવં સો તેનઙ્ગેન પરિપૂરો હોતિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ન ચ ઞાતિબલેન – એવં સો તેનઙ્ગેન અપરિપૂરો હોતિ. યતો ચ ખો, ભિક્ખવે, માતુગામો રૂપબલેન ચ સમન્નાગતો હોતિ, ભોગબલેન ચ, ઞાતિબલેન ચ – એવં સો તેનઙ્ગેન પરિપૂરો હોતિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ઞાતિબલેન ચ, ન ચ પુત્તબલેન – એવં સો તેનઙ્ગેન અપરિપૂરો હોતિ. યતો ચ ખો, ભિક્ખવે, માતુગામો રૂપબલેન ચ સમન્નાગતો હોતિ, ભોગબલેન ચ, ઞાતિબલેન ચ, પુત્તબલેન ચ – એવં સો તેનઙ્ગેન પરિપૂરો હોતિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ઞાતિબલેન ચ, પુત્તબલેન ચ, ન ચ સીલબલેન – એવં સો તેનઙ્ગેન અપરિપૂરો હોતિ. યતો ચ ખો, ભિક્ખવે, માતુગામો રૂપબલેન ચ સમન્નાગતો હોતિ, ભોગબલેન ચ, ઞાતિબલેન ચ, પુત્તબલેન ચ, સીલબલેન ચ – એવં સો તેનઙ્ગેન પરિપૂરો હોતિ. ઇમાનિ ખો, ભિક્ખવે, પઞ્ચ માતુગામસ્સ બલાની’’તિ. પઞ્ચમં.

૬. નાસેન્તિસુત્તં

૩૦૯. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં. રૂપબલેન ચ, ભિક્ખવે, માતુગામો સમન્નાગતો હોતિ, ન ચ સીલબલેન, નાસેન્તેવ નં, કુલે ન વાસેન્તિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ન ચ સીલબલેન, નાસેન્તેવ નં, કુલે ન વાસેન્તિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ઞાતિબલેન ચ, ન ચ સીલબલેન, નાસેન્તેવ નં, કુલે ન વાસેન્તિ. રૂપબલેન ચ, ભિક્ખવે, માતુગામો સમન્નાગતો હોતિ, ભોગબલેન ચ, ઞાતિબલેન ચ, પુત્તબલેન ચ, ન ચ સીલબલેન, નાસેન્તેવ નં, કુલે ન વાસેન્તિ. સીલબલેન ચ, ભિક્ખવે, માતુગામો સમન્નાગતો હોતિ, ન ચ રૂપબલેન, વાસેન્તેવ નં, કુલે ન નાસેન્તિ. સીલબલેન ચ, ભિક્ખવે, માતુગામો સમન્નાગતો હોતિ, ન ચ ભોગબલેન, વાસેન્તેવ નં, કુલે ન નાસેન્તિ. સીલબલેન ચ, ભિક્ખવે, માતુગામો સમન્નાગતો હોતિ, ન ચ ઞાતિબલેન, વાસેન્તેવ નં, કુલે ન નાસેન્તિ. સીલબલેન ચ, ભિક્ખવે, માતુગામો સમન્નાગતો હોતિ, ન ચ પુત્તબલેન, વાસેન્તેવ નં, કુલે ન નાસેન્તિ. ઇમાનિ ખો, ભિક્ખવે, પઞ્ચ માતુગામસ્સ બલાની’’તિ. છટ્ઠં.

૭. હેતુસુત્તં

૩૧૦. ‘‘પઞ્ચિમાનિ, ભિક્ખવે, માતુગામસ્સ બલાનિ. કતમાનિ પઞ્ચ? રૂપબલં, ભોગબલં, ઞાતિબલં, પુત્તબલં, સીલબલં. ન, ભિક્ખવે, માતુગામો રૂપબલહેતુ વા ભોગબલહેતુ વા ઞાતિબલહેતુ વા પુત્તબલહેતુ વા કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. સીલબલહેતુ ખો, ભિક્ખવે, માતુગામો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ. ઇમાનિ ખો, ભિક્ખવે, પઞ્ચ માતુગામસ્સ બલાની’’તિ. સત્તમં.

૮. ઠાનસુત્તં

૩૧૧. ‘‘પઞ્ચિમાનિ, ભિક્ખવે, ઠાનાનિ દુલ્લભાનિ અકતપુઞ્ઞેન માતુગામેન. કતમાનિ પઞ્ચ? પતિરૂપે કુલે જાયેય્યન્તિ – ઇદં, ભિક્ખવે, પઠમં ઠાનં દુલ્લભં અકતપુઞ્ઞેન માતુગામેન. પતિરૂપે કુલે જાયિત્વા પતિરૂપં કુલં ગચ્છેય્યન્તિ – ઇદં, ભિક્ખવે, દુતિયં ઠાનં દુલ્લભં અકતપુઞ્ઞેન માતુગામેન. પતિરૂપે કુલે જાયિત્વા, પતિરૂપં કુલં ગન્ત્વા, અસપત્તિ અગારં અજ્ઝાવસેય્યન્તિ – ઇદં, ભિક્ખવે, તતિયં ઠાનં દુલ્લભં અકતપુઞ્ઞેન માતુગામેન. પતિરૂપે કુલે જાયિત્વા, પતિરૂપં કુલં ગન્ત્વા, અસપત્તિ અગારં અજ્ઝાવસન્તી પુત્તવતી અસ્સન્તિ – ઇદં, ભિક્ખવે, ચતુત્થં ઠાનં દુલ્લભં અકતપુઞ્ઞેન માતુગામેન. પતિરૂપે કુલે જાયિત્વા, પતિરૂપં કુલં ગન્ત્વા, અસપત્તિ અગારં અજ્ઝાવસન્તી પુત્તવતી સમાના સામિકં અભિભુય્ય વત્તેય્યન્તિ – ઇદં, ભિક્ખવે, પઞ્ચમં ઠાનં દુલ્લભં અકતપુઞ્ઞેન માતુગામેન. ઇમાનિ ખો, ભિક્ખવે, પઞ્ચ ઠાનાનિ દુલ્લભાનિ અકતપુઞ્ઞેન માતુગામેનાતિ.

‘‘પઞ્ચિમાનિ, ભિક્ખવે, ઠાનાનિ સુલભાનિ કતપુઞ્ઞેન માતુગામેન. કતમાનિ પઞ્ચ? પતિરૂપે કુલે જાયેય્યન્તિ – ઇદં, ભિક્ખવે, પઠમં ઠાનં સુલભં કતપુઞ્ઞેન માતુગામેન. પતિરૂપે કુલે જાયિત્વા પતિરૂપં કુલં ગચ્છેય્યન્તિ – ઇદં, ભિક્ખવે, દુતિયં ઠાનં સુલભં કતપુઞ્ઞેન માતુગામેન. પતિરૂપે કુલે જાયિત્વા પતિરૂપં કુલં ગન્ત્વા અસપત્તિ અગારં અજ્ઝાવસેય્યન્તિ – ઇદં, ભિક્ખવે, તતિયં ઠાનં સુલભં કતપુઞ્ઞેન માતુગામેન. પતિરૂપે કુલે જાયિત્વા પતિરૂપં કુલં ગન્ત્વા અસપત્તિ અગારં અજ્ઝાવસન્તી પુત્તવતી અસ્સન્તિ – ઇદં, ભિક્ખવે, ચતુત્થં ઠાનં સુલભં કતપુઞ્ઞેન માતુગામેન. પતિરૂપે કુલે જાયિત્વા પતિરૂપં કુલં ગન્ત્વા અસપત્તિ અગારં અજ્ઝાવસન્તી પુત્તવતી સમાના સામિકં અભિભુય્ય વત્તેય્યન્તિ – ઇદં, ભિક્ખવે, પઞ્ચમં ઠાનં સુલભં કતપુઞ્ઞેન માતુગામેન. ઇમાનિ ખો, ભિક્ખવે, પઞ્ચ ઠાનાનિ સુલભાનિ કતપુઞ્ઞેન માતુગામેના’’તિ. અટ્ઠમં.

૯. પઞ્ચસીલવિસારદસુત્તં

૩૧૨. ‘‘પઞ્ચહિ, ભિક્ખવે, ધમ્મેહિ સમન્નાગતો માતુગામો વિસારદો અગારં અજ્ઝાવસતિ. કતમેહિ પઞ્ચહિ? પાણાતિપાતા પટિવિરતો ચ હોતિ, અદિન્નાદાના પટિવિરતો ચ હોતિ, કામેસુમિચ્છાચારા પટિવિરતો ચ હોતિ, મુસાવાદા પટિવિરતો ચ હોતિ, સુરામેરયમજ્જપ્પમાદટ્ઠાના પટિવિરતો ચ હોતિ – ઇમેહિ ખો, ભિક્ખવે, પઞ્ચહિ ધમ્મેહિ સમન્નાગતો માતુગામો વિસારદો અગારં અજ્ઝાવસતી’’તિ. નવમં.

૧૦. વડ્ઢીસુત્તં

૩૧૩. ‘‘પઞ્ચહિ, ભિક્ખવે, વડ્ઢીહિ વડ્ઢમાના અરિયસાવિકા અરિયાય વડ્ઢિયા વડ્ઢતિ સારાદાયિની ચ હોતિ વરાદાયિની ચ કાયસ્સ. કતમેહિ પઞ્ચહિ? સદ્ધાય વડ્ઢતિ, સીલેન વડ્ઢતિ, સુતેન વડ્ઢતિ, ચાગેન વડ્ઢતિ, પઞ્ઞાય વડ્ઢતિ – ઇમેહિ ખો, ભિક્ખવે, પઞ્ચહિ વડ્ઢીહિ વડ્ઢમાના અરિયસાવિકા અરિયાય વડ્ઢિયા વડ્ઢતિ, સારાદાયિની ચ હોતિ, વરાદાયિની ચ કાયસ્સા’’તિ.

‘‘સદ્ધાય સીલેન ચ યાધ વડ્ઢતિ,

પઞ્ઞાય ચાગેન સુતેન ચૂભયં;

સા તાદિસી સીલવતી ઉપાસિકા,

આદીયતિ સારમિધેવ અત્તનો’’તિ. દસમં;

બલવગ્ગો તતિયો.

તસ્સુદ્દાનં –

વિસારદા પસય્હ અભિભુય્ય, એકં અઙ્ગેન પઞ્ચમં;

નાસેન્તિ હેતુ ઠાનઞ્ચ, વિસારદો વડ્ઢિના દસાતિ.

માતુગામસંયુત્તં સમત્તં.