૩. પીતિસુત્તં

૩૩૪. સાવત્થિનિદાનં. અદ્દસા ખો આયસ્મા આનન્દો…પે… ‘‘વિપ્પસન્નાનિ ખો તે, આવુસો સારિપુત્ત, ઇન્દ્રિયાનિ; પરિસુદ્ધો મુખવણ્ણો પરિયોદાતો. કતમેનાયસ્મા સારિપુત્તો અજ્જ વિહારેન વિહાસી’’તિ?

‘‘ઇધાહં, આવુસો, પીતિયા ચ વિરાગા ઉપેક્ખકો ચ વિહાસિં સતો ચ સમ્પજાનો સુખઞ્ચ કાયેન પટિસંવેદેમિ; યં તં અરિયા આચિક્ખન્તિ ‘ઉપેક્ખકો સતિમા સુખવિહારી’તિ તતિયં ઝાનં ઉપસમ્પજ્જ વિહરામિ. તસ્સ મય્હં, આવુસો, ન એવં હોતિ – ‘અહં તતિયં ઝાનં સમાપજ્જામી’તિ વા ‘અહં તતિયં ઝાનં સમાપન્નો’તિ વા ‘અહં તતિયા ઝાના વુટ્ઠિતો’તિ વા’’તિ. ‘‘તથા હિ પનાયસ્મતો સારિપુત્તસ્સ દીઘરત્તં અહઙ્કારમમઙ્કારમાનાનુસયા સુસમૂહતા. તસ્મા આયસ્મતો સારિપુત્તસ્સ ન એવં હોતિ – ‘અહં તતિયં ઝાનં સમાપજ્જામી’તિ વા ‘અહં તતિયં ઝાનં સમાપન્નો’તિ વા ‘અહં તતિયા ઝાના વુટ્ઠિતો’તિ વા’’તિ. તતિયં.