૪. પરિઞ્ઞેય્યસુત્તં

૧૬૩. સાવત્થિનિદાનં. આયસ્મા રાધો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં રાધં ભગવા એતદવોચ –

‘‘પરિઞ્ઞેય્યે ચ, રાધ, ધમ્મે દેસેસ્સામિ પરિઞ્ઞઞ્ચ પરિઞ્ઞાતાવિં પુગ્ગલઞ્ચ. તં સુણાહિ, સાધુકં મનસિ કરોહિ; ભાસિસ્સામી’’તિ. ‘‘એવં, ભન્તે’’તિ ખો આયસ્મા રાધો ભગવતો પચ્ચસ્સોસિ. ભગવા એતદવોચ – ‘‘કતમે ચ, રાધ, પરિઞ્ઞેય્યા ધમ્મા? રૂપં ખો, રાધ, પરિઞ્ઞેય્યો ધમ્મો, વેદના પરિઞ્ઞેય્યો ધમ્મો, સઞ્ઞા પરિઞ્ઞેય્યો ધમ્મો, સઙ્ખારા પરિઞ્ઞેય્યો ધમ્મો, વિઞ્ઞાણં પરિઞ્ઞેય્યો ધમ્મો. ઇમે વુચ્ચન્તિ, રાધ, પરિઞ્ઞેય્યા ધમ્મા. કતમા ચ, રાધ, પરિઞ્ઞા? યો ખો, રાધ, રાગક્ખયો દોસક્ખયો મોહક્ખયો – અયં વુચ્ચતિ, રાધ, પરિઞ્ઞા. કતમો ચ, રાધ, પરિઞ્ઞાતાવી પુગ્ગલો? ‘અરહા’તિસ્સ વચનીયં. ય્વાયં આયસ્મા એવંનામો એવંગોત્તો – અયં વુચ્ચતિ, રાધ, પરિઞ્ઞાતાવી પુગ્ગલો’’તિ. ચતુત્થં.