૨. પટિપદાસુત્તં

૪૪. સાવત્થિનિદાનં. ‘‘સક્કાયસમુદયગામિનિઞ્ચ વો, ભિક્ખવે, પટિપદં દેસેસ્સામિ, સક્કાયનિરોધગામિનિઞ્ચ પટિપદં. તં સુણાથ. કતમા ચ, ભિક્ખવે, સક્કાયસમુદયગામિની પટિપદા? ઇધ, ભિક્ખવે, અસ્સુતવા પુથુજ્જનો અરિયાનં અદસ્સાવી અરિયધમ્મસ્સ અકોવિદો અરિયધમ્મે અવિનીતો, સપ્પુરિસાનં અદસ્સાવી સપ્પુરિસધમ્મસ્સ અકોવિદો સપ્પુરિસધમ્મે અવિનીતો, રૂપં અત્તતો સમનુપસ્સતિ, રૂપવન્તં વા અત્તાનં; અત્તનિ વા રૂપં, રૂપસ્મિં વા અત્તાનં. વેદનં અત્તતો… સઞ્ઞં… સઙ્ખારે… વિઞ્ઞાણં અત્તતો સમનુપસ્સતિ, વિઞ્ઞાણવન્તં વા અત્તાનં; અત્તનિ વા વિઞ્ઞાણં, વિઞ્ઞાણસ્મિં વા અત્તાનં. અયં વુચ્ચતિ, ભિક્ખવે, ‘સક્કાયસમુદયગામિની પટિપદા, સક્કાયસમુદયગામિની પટિપદા’તિ. ઇતિ હિદં, ભિક્ખવે, વુચ્ચતિ ‘દુક્ખસમુદયગામિની સમનુપસ્સના’તિ. અયમેવેત્થ અત્થો’’.

‘‘કતમા ચ, ભિક્ખવે, સક્કાયનિરોધગામિની પટિપદા? ઇધ, ભિક્ખવે, સુતવા અરિયસાવકો અરિયાનં દસ્સાવી અરિયધમ્મસ્સ કોવિદો અરિયધમ્મે સુવિનીતો, સપ્પુરિસાનં દસ્સાવી સપ્પુરિસધમ્મસ્સ કોવિદો સપ્પુરિસધમ્મે સુવિનીતો, ન રૂપં અત્તતો સમનુપસ્સતિ, ન રૂપવન્તં વા અત્તાનં; ન અત્તનિ વા રૂપં, ન રૂપસ્મિં વા અત્તાનં. ન વેદનં અત્તતો… ન સઞ્ઞં… ન સઙ્ખારે… ન વિઞ્ઞાણં અત્તતો સમનુપસ્સતિ, ન વિઞ્ઞાણવન્તં વા અત્તાનં; ન અત્તનિ વા વિઞ્ઞાણં, ન વિઞ્ઞાણસ્મિં વા અત્તાનં. અયં વુચ્ચતિ, ભિક્ખવે, ‘સક્કાયનિરોધગામિની પટિપદા, સક્કાયનિરોધગામિની પટિપદા’તિ. ઇતિ હિદં, ભિક્ખવે, વુચ્ચતિ ‘દુક્ખનિરોધગામિની સમનુપસ્સના’તિ. અયમેવેત્થ અત્થો’’તિ. દુતિયં.