૩. અઞ્ઞતરભિક્ખુસુત્તં

૩૫. સાવત્થિનિદાનં. અથ ખો અઞ્ઞતરો ભિક્ખુ યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો સો ભિક્ખુ ભગવન્તં એતદવોચ – ‘‘સાધુ મે, ભન્તે, ભગવા સંખિત્તેન ધમ્મં દેસેતુ; યમહં ભગવતો ધમ્મં સુત્વા એકો વૂપકટ્ઠો, અપ્પમત્તો આતાપી પહિતત્તો વિહરેય્ય’’ન્તિ. ‘‘યં ખો, ભિક્ખુ, અનુસેતિ, તેન સઙ્ખં ગચ્છતિ; યં નાનુસેતિ, ન તેન સઙ્ખં ગચ્છતી’’તિ. ‘‘અઞ્ઞાતં, ભગવા; અઞ્ઞાતં, સુગતા’’તિ.

‘‘યથા કથં પન ત્વં, ભિક્ખુ, મયા સંખિત્તેન ભાસિતસ્સ વિત્થારેન અત્થં આજાનાસી’’તિ? ‘‘રૂપં ચે, ભન્તે, અનુસેતિ તેન સઙ્ખં ગચ્છતિ. વેદનં ચે અનુસેતિ તેન સઙ્ખં ગચ્છતિ. સઞ્ઞં ચે અનુસેતિ તેન સઙ્ખં ગચ્છતિ. સઙ્ખારે ચે અનુસેતિ તેન સઙ્ખં ગચ્છતિ. વિઞ્ઞાણં ચે અનુસેતિ તેન સઙ્ખં ગચ્છતિ. રૂપં ચે, ભન્તે, નાનુસેતિ ન તેન સઙ્ખં ગચ્છતિ. વેદનં ચે… સઞ્ઞં ચે… સઙ્ખારે ચે… વિઞ્ઞાણં ચે નાનુસેતિ ન તેન સઙ્ખં ગચ્છતિ. ઇમસ્સ ખ્વાહં, ભન્તે, ભગવતા સંખિત્તેન ભાસિતસ્સ એવં વિત્થારેન અત્થં આજાનામી’’તિ.

‘‘સાધુ સાધુ, ભિક્ખુ! સાધુ ખો ત્વં, ભિક્ખુ, મયા સંખિત્તેન ભાસિતસ્સ વિત્થારેન અત્થં આજાનાસિ. રૂપં ચે, ભિક્ખુ, અનુસેતિ તેન સઙ્ખં ગચ્છતિ. વેદનં ચે… સઞ્ઞં ચે… સઙ્ખારે ચે… વિઞ્ઞાણં ચે અનુસેતિ તેન સઙ્ખં ગચ્છતિ. રૂપં ચે, ભિક્ખુ, નાનુસેતિ ન તેન સઙ્ખં ગચ્છતિ. વેદનં ચે… સઞ્ઞં ચે… સઙ્ખારે ચે… વિઞ્ઞાણં ચે નાનુસેતિ ન તેન સઙ્ખં ગચ્છતિ. ઇમસ્સ ખો, ભિક્ખુ, મયા સંખિત્તેન, ભાસિતસ્સ એવં વિત્થારેન અત્થો દટ્ઠબ્બો’’તિ.

અથ ખો સો ભિક્ખુ ભગવતો ભાસિતં અભિનન્દિત્વા અનુમોદિત્વા ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કામિ.

અથ ખો સો ભિક્ખુ એકો વૂપકટ્ઠો અપ્પમત્તો આતાપી પહિતત્તો વિહરન્તો નચિરસ્સેવ – યસ્સત્થાય કુલપુત્તા સમ્મદેવ અગારસ્મા અનગારિયં પબ્બજન્તિ તદનુત્તરં – બ્રહ્મચરિયપરિયોસાનં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહાસિ. ‘‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયા’’તિ અબ્ભઞ્ઞાસિ. અઞ્ઞતરો ચ પન સો ભિક્ખુ અરહતં અહોસીતિ. તતિયં.