૭. આણિસુત્તં

૨૨૯. સાવત્થિયં વિહરતિ…પે… ‘‘ભૂતપુબ્બં, ભિક્ખવે, દસારહાનં આનકો [આણકો (સી.)] નામ મુદિઙ્ગો અહોસિ. તસ્સ દસારહા આનકે ઘટિતે અઞ્ઞં આણિં ઓદહિંસુ. અહુ ખો સો, ભિક્ખવે, સમયો યં આનકસ્સ મુદિઙ્ગસ્સ પોરાણં પોક્ખરફલકં અન્તરધાયિ. આણિસઙ્ઘાટોવ અવસિસ્સિ. એવમેવ ખો, ભિક્ખવે, ભવિસ્સન્તિ ભિક્ખૂ અનાગતમદ્ધાનં, યે તે સુત્તન્તા તથાગતભાસિતા ગમ્ભીરા ગમ્ભીરત્થા લોકુત્તરા સુઞ્ઞતપ્પટિસંયુત્તા, તેસુ ભઞ્ઞમાનેસુ ન સુસ્સૂસિસ્સન્તિ ન સોતં ઓદહિસ્સન્તિ ન અઞ્ઞા ચિત્તં ઉપટ્ઠાપેસ્સન્તિ ન ચ તે ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ’’.

‘‘યે પન તે સુત્તન્તા કવિકતા કાવેય્યા ચિત્તક્ખરા ચિત્તબ્યઞ્જના બાહિરકા સાવકભાસિતા, તેસુ ભઞ્ઞમાનેસુ સુસ્સૂસિસ્સન્તિ, સોતં ઓદહિસ્સન્તિ, અઞ્ઞા ચિત્તં ઉપટ્ઠાપેસ્સન્તિ, તે ચ ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ. એવમેતેસં, ભિક્ખવે, સુત્તન્તાનં તથાગતભાસિતાનં ગમ્ભીરાનં ગમ્ભીરત્થાનં લોકુત્તરાનં સુઞ્ઞતપ્પટિસંયુત્તાનં અન્તરધાનં ભવિસ્સતિ. તસ્માતિહ, ભિક્ખવે, એવં સિક્ખિતબ્બં – ‘યે તે સુત્તન્તા તથાગતભાસિતા ગમ્ભીરા ગમ્ભીરત્થા લોકુત્તરા સુઞ્ઞતપ્પટિસંયુત્તા, તેસુ ભઞ્ઞમાનેસુ સુસ્સૂસિસ્સામ, સોતં ઓદહિસ્સામ, અઞ્ઞા ચિત્તં ઉપટ્ઠાપેસ્સામ, તે ચ ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સામા’તિ. એવઞ્હિ વો, ભિક્ખવે, સિક્ખિતબ્બ’’ન્તિ. સત્તમં.