૫. સત્તિસુત્તં

૨૨૭. સાવત્થિયં વિહરતિ…પે… ‘‘સેય્યથાપિ, ભિક્ખવે, સત્તિ તિણ્હફલા. અથ પુરિસો આગચ્છેય્ય – ‘અહં ઇમં સત્તિં તિણ્હફલં પાણિના વા મુટ્ઠિના વા પટિલેણિસ્સામિ પટિકોટ્ટિસ્સામિ પટિવટ્ટેસ્સામી’તિ. તં કિં મઞ્ઞથ, ભિક્ખવે, ભબ્બો નુ ખો સો પુરિસો અમું સત્તિં તિણ્હફલં પાણિના વા મુટ્ઠિના વા પટિલેણેતું પટિકોટ્ટેતું પટિવટ્ટેતુ’’ન્તિ? ‘‘નો હેતં, ભન્તે’’. ‘‘તં કિસ્સ હેતુ’’? ‘‘અસુ હિ, ભન્તે, સત્તિ તિણ્હફલા ન સુકરા પાણિના વા મુટ્ઠિના વા પટિલેણેતું પટિકોટ્ટેતું પટિવટ્ટેતું. યાવદેવ ચ પન સો પુરિસો કિલમથસ્સ વિઘાતસ્સ ભાગી અસ્સા’’તિ.

‘‘એવમેવ ખો, ભિક્ખવે, યસ્સ કસ્સચિ ભિક્ખુનો મેત્તાચેતોવિમુત્તિ ભાવિતા બહુલીકતા યાનીકતા વત્થુકતા અનુટ્ઠિતા પરિચિતા સુસમારદ્ધા, તસ્સ ચે અમનુસ્સો ચિત્તં ખિપિતબ્બં મઞ્ઞેય્ય; અથ ખો સ્વેવ અમનુસ્સો કિલમથસ્સ વિઘાતસ્સ ભાગી અસ્સ. તસ્માતિહ, ભિક્ખવે, એવં સિક્ખિતબ્બં – ‘મેત્તા નો ચેતોવિમુત્તિ ભાવિતા ભવિસ્સતિ બહુલીકતા યાનીકતા વત્થુકતા અનુટ્ઠિતા પરિચિતા સુસમારદ્ધા’તિ. એવઞ્હિ વો, ભિક્ખવે, સિક્ખિતબ્બ’’ન્તિ. પઞ્ચમં.