૩. તતિયવગ્ગો

૧. માતુગામસુત્તં

૧૭૦. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો…પે… ન તસ્સ, ભિક્ખવે, માતુગામો એકો એકસ્સ ચિત્તં પરિયાદાય તિટ્ઠતિ યસ્સ લાભસક્કારસિલોકો ચિત્તં પરિયાદાય તિટ્ઠતિ. એવં દારુણો ખો, ભિક્ખવે, લાભસક્કારસિલોકો …પે… એવઞ્હિ વો, ભિક્ખવે, સિક્ખિતબ્બ’’ન્તિ. પઠમં.

૨. કલ્યાણીસુત્તં

૧૭૧. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો…પે… ન તસ્સ, ભિક્ખવે, જનપદકલ્યાણી એકા એકસ્સ ચિત્તં પરિયાદાય તિટ્ઠતિ યસ્સ લાભસક્કારસિલોકો ચિત્તં પરિયાદાય તિટ્ઠતિ. એવં દારુણો ખો, ભિક્ખવે, લાભસક્કારસિલોકો…પે… એવઞ્હિ વો, ભિક્ખવે, સિક્ખિતબ્બ’’ન્તિ. દુતિયં.

૩. એકપુત્તકસુત્તં

૧૭૨. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો…પે… સદ્ધા, ભિક્ખવે, ઉપાસિકા એકપુત્તકં પિયં મનાપં એવં સમ્મા આયાચમાના આયાચેય્ય – ‘તાદિસો, તાત, ભવાહિ યાદિસો ચિત્તો ચ ગહપતિ હત્થકો ચ આળવકો’તિ. એસા, ભિક્ખવે, તુલા એતં પમાણં મમ સાવકાનં ઉપાસકાનં, યદિદં ચિત્તો ચ ગહપતિ હત્થકો ચ આળવકો. સચે ખો ત્વં, તાત, અગારસ્મા અનગારિયં પબ્બજસિ; તાદિસો, તાત, ભવાહિ યાદિસા સારિપુત્તમોગ્ગલ્લાનાતિ. એસા, ભિક્ખવે, તુલા એતં પમાણં મમ સાવકાનં ભિક્ખૂનં, યદિદં સારિપુત્તમોગ્ગલાના. મા ચ ખો ત્વં, તાત, સેખં અપ્પત્તમાનસં લાભસક્કારસિલોકો અનુપાપુણાતૂતિ. તઞ્ચે, ભિક્ખવે, ભિક્ખું સેખં અપ્પત્તમાનસં લાભસક્કારસિલોકો અનુપાપુણાતિ, સો તસ્સ હોતિ અન્તરાયાય. એવં દારુણો ખો, ભિક્ખવે, લાભસક્કારસિલોકો…પે… એવઞ્હિ વો, ભિક્ખવે, સિક્ખિતબ્બ’’ન્તિ. તતિયં.

૪. એકધીતુસુત્તં

૧૭૩. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો…પે… સદ્ધા ભિક્ખવે ઉપાસિકા એકં ધીતરં પિયં મનાપં એવં સમ્મા આયાચમાના આયાચેય્ય – ‘તાદિસા, અય્યે, ભવાહિ યાદિસા ખુજ્જુત્તરા ચ ઉપાસિકા વેળુકણ્ડકિયા [વેળુકણ્ડકી (સી. છક્કઙ્ગુત્તરેપિ)] ચ નન્દમાતા’તિ. એસા, ભિક્ખવે, તુલા એતં પમાણં મમ સાવિકાનં ઉપાસિકાનં, યદિદં ખુજ્જુત્તરા ચ ઉપાસિકા વેળુકણ્ડકિયા ચ નન્દમાતા. સચે ખો ત્વં, અય્યે, અગારસ્મા અનગારિયં પબ્બજસિ; તાદિસા, અય્યે, ભવાહિ યાદિસા ખેમા ચ ભિક્ખુની ઉપ્પલવણ્ણા ચાતિ. એસા, ભિક્ખવે, તુલા એતં પમાણં મમ સાવિકાનં ભિક્ખુનીનં, યદિદં ખેમા ચ ભિક્ખુની ઉપ્પલવણ્ણા ચ. મા ચ ખો ત્વં, અય્યે, સેખં અપ્પત્તમાનસં લાભસક્કારસિલોકો અનુપાપુણાતૂતિ. તં ચે, ભિક્ખવે, ભિક્ખુનિં સેખં અપ્પત્તમાનસં લાભસક્કારસિલોકો અનુપાપુણાતિ, સો તસ્સા હોતિ અન્તરાયાય. એવં દારુણો ખો, ભિક્ખવે, લાભસક્કારસિલોકો…પે… એવઞ્હિ વો, ભિક્ખવે, સિક્ખિતબ્બ’’ન્તિ. ચતુત્થં.

૫. સમણબ્રાહ્મણસુત્તં

૧૭૪. સાવત્થિયં વિહરતિ…પે… ‘‘યે હિ કેચિ, ભિક્ખવે, સમણા વા બ્રાહ્મણા વા લાભસક્કારસિલોકસ્સ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં નપ્પજાનન્તિ, ન મે તે, ભિક્ખવે, સમણા વા બ્રાહ્મણા વા સમણેસુ વા સમણસમ્મતા બ્રાહ્મણેસુ વા બ્રાહ્મણસમ્મતા, ન ચ પન તે આયસ્મન્તા સામઞ્ઞત્થં વા બ્રહ્મઞ્ઞત્થં વા દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરન્તિ. યે ચ ખો કેચિ, ભિક્ખવે, સમણા વા બ્રાહ્મણા વા લાભસક્કારસિલોકસ્સ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં પજાનન્તિ, તે ચ ખો મે, ભિક્ખવે, સમણા વા બ્રાહ્મણા વા સમણેસુ ચેવ સમણસમ્મતા બ્રાહ્મણેસુ ચ બ્રાહ્મણસમ્મતા, તે ચ પનાયસ્મન્તો સામઞ્ઞત્થઞ્ચ બ્રહ્મઞ્ઞત્થઞ્ચ દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરન્તી’’તિ. પઞ્ચમં.

૬. દુતિયસમણબ્રાહ્મણસુત્તં

૧૭૫. સાવત્થિયં વિહરતિ…પે… ‘‘યે હિ કેચિ, ભિક્ખવે, સમણા વા બ્રાહ્મણા વા લાભસક્કારસિલોકસ્સ સમુદયઞ્ચ અત્થઙ્ગમઞ્ચ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં નપ્પજાનન્તિ…પે… પજાનન્તિ…પે… સયં અભિઞ્ઞા સચ્છિકત્વા ઉપસમ્પજ્જ વિહરન્તી’’તિ. છટ્ઠં.

૭. તતિયસમણબ્રાહ્મણસુત્તં

૧૭૬. સાવત્થિયં વિહરતિ…પે… ‘‘યે હિ કેચિ, ભિક્ખવે, સમણા વા બ્રાહ્મણા વા લાભસક્કારસિલોકં યથાભૂતં નપ્પજાનન્તિ, લાભસક્કારસિલોકસમુદયં નપ્પજાનન્તિ, લાભસક્કારસિલોકનિરોધં નપ્પજાનન્તિ, લાભસક્કારસિલોકનિરોધગામિનિં પટિપદં નપ્પજાનન્તિ …પે… પજાનન્તિ…પે… સયં અભિઞ્ઞા સચ્છિકત્વા ઉપસમ્પજ્જ વિહરન્તી’’તિ. સત્તમં.

૮. છવિસુત્તં

૧૭૭. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો. લાભસક્કારસિલોકો, ભિક્ખવે, છવિં છિન્દતિ, છવિં છેત્વા ચમ્મં છિન્દતિ, ચમ્મં છેત્વા મંસં છિન્દતિ, મંસં છેત્વા ન્હારું છિન્દતિ, ન્હારું છેત્વા અટ્ઠિં છિન્દતિ, અટ્ઠિં છેત્વા અટ્ઠિમિઞ્જં આહચ્ચ તિટ્ઠતિ. એવં દારુણો ખો, ભિક્ખવે, લાભસક્કારસિલોકો…પે… એવઞ્હિ વો ભિક્ખવે, સિક્ખિતબ્બ’’ન્તિ. અટ્ઠમં.

૯. રજ્જુસુત્તં

૧૭૮. સાવત્થિયં વિહરતિ…પે… ‘‘દારુણો, ભિક્ખવે, લાભસક્કારસિલોકો. લાભસક્કારસિલોકો, ભિક્ખવે, છવિં છિન્દતિ, છવિં છેત્વા ચમ્મં છિન્દતિ, ચમ્મં છેત્વા મંસં છિન્દતિ, મંસં છેત્વા ન્હારું છિન્દતિ, ન્હારું છેત્વા અટ્ઠિં છિન્દતિ, અટ્ઠિં છેત્વા અટ્ઠિમિઞ્જં આહચ્ચ તિટ્ઠતિ’’.

‘‘સેય્યથાપિ, ભિક્ખવે, બલવા પુરિસો દળ્હાય વાળરજ્જુયા જઙ્ઘં વેઠેત્વા ઘંસેય્ય. સા છવિં છિન્દેય્ય, છવિં છેત્વા ચમ્મં છિન્દેય્ય, ચમ્મં છેત્વા મંસં છિન્દેય્ય, મંસં છેત્વા ન્હારું છિન્દેય્ય, ન્હારું છેત્વા અટ્ઠિં છિન્દેય્ય, અટ્ઠિં છેત્વા અટ્ઠિમિઞ્જં આહચ્ચ તિટ્ઠેય્ય. એવમેવ ખો, ભિક્ખવે, લાભસક્કારસિલોકો છવિં છિન્દતિ, છવિં છેત્વા ચમ્મં છિન્દતિ, ચમ્મં છેત્વા મંસં છિન્દતિ, મંસં છેત્વા ન્હારું છિન્દતિ, ન્હારું છેત્વા અટ્ઠિં છિન્દતિ, અટ્ઠિં છેત્વા અટ્ઠિંમિઞ્જં આહચ્ચ તિટ્ઠતિ. એવં દારુણો ખો, ભિક્ખવે, લાભસક્કારસિલોકો…પે… એવઞ્હિ વો, ભિક્ખવે, સિક્ખિતબ્બ’’ન્તિ. નવમં.

૧૦. ભિક્ખુસુત્તં

૧૭૯. સાવત્થિયં વિહરતિ…પે… ‘‘યોપિ સો, ભિક્ખવે, ભિક્ખુ અરહં ખીણાસવો તસ્સપાહં લાભસક્કારસિલોકો અન્તરાયાય વદામી’’તિ. એવં વુત્તે, આયસ્મા આનન્દો ભગવન્તં એતદવોચ – ‘‘કિસ્સ પન, ભન્તે, ખીણાસવસ્સ ભિક્ખુનો લાભસક્કારસિલોકો અન્તરાયાયા’’તિ? ‘‘યા હિસ્સ સા, આનન્દ, અકુપ્પા ચેતોવિમુત્તિ નાહં તસ્સા લાભસક્કારસિલોકં અન્તરાયાય વદામિ. યે ચ ખ્વસ્સ, આનન્દ, અપ્પમત્તસ્સ આતાપિનો પહિતત્તસ્સ વિહરતો દિટ્ઠધમ્મસુખવિહારા અધિગતા તેસાહમસ્સ લાભસક્કારસિલોકં અન્તરાયાય વદામિ. એવં દારુણો ખો, આનન્દ, લાભસક્કારસિલોકો કટુકો ફરુસો અન્તરાયિકો અનુત્તરસ્સ યોગક્ખેમસ્સ અધિગમાય. તસ્માતિહાનન્દ, એવં સિક્ખિતબ્બં – ‘ઉપ્પન્નં લાભસક્કારસિલોકં પજહિસ્સામ, ન ચ નો ઉપ્પન્નો લાભસક્કારસિલોકો ચિત્તં પરિયાદાય ઠસ્સતી’તિ. એવઞ્હિ વો, આનન્દ, સિક્ખિતબ્બ’’ન્તિ. દસમં.

તતિયો વગ્ગો.

તસ્સુદ્દાનં –

માતુગામો ચ કલ્યાણી, પુત્તો ચ એકધીતુ ચ;

સમણબ્રાહ્મણા તીણિ, છવિ રજ્જુ ચ ભિક્ખુનાતિ.