૩. ચૂળમાલુક્યસુત્તં

૧૨૨. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. અથ ખો આયસ્મતો માલુક્યપુત્તસ્સ [માલુઙ્ક્યપુત્તસ્સ (સી. સ્યા. કં. પી.)] રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ – ‘‘યાનિમાનિ દિટ્ઠિગતાનિ ભગવતા અબ્યાકતાનિ ઠપિતાનિ પટિક્ખિત્તાનિ – ‘સસ્સતો લોકો’તિપિ, ‘અસસ્સતો લોકો’તિપિ, ‘અન્તવા લોકો’તિપિ, ‘અનન્તવા લોકો’તિપિ, ‘તં જીવં તં સરીર’ન્તિપિ, ‘અઞ્ઞં જીવં અઞ્ઞં સરીર’ન્તિપિ, ‘હોતિ તથાગતો પરં મરણા’તિપિ, ‘ન હોતિ તથાગતો પરં મરણા’તિપિ, ‘હોતિ ચ ન ચ હોતિ તથાગતો પરં મરણા’તિપિ, ‘નેવ હોતિ ન ન હોતિ તથાગતો પરં મરણા’તિપિ – તાનિ મે ભગવા ન બ્યાકરોતિ. યાનિ મે ભગવા ન બ્યાકરોતિ તં મે ન રુચ્ચતિ, તં મે નક્ખમતિ. સોહં ભગવન્તં ઉપસઙ્કમિત્વા એતમત્થં પુચ્છિસ્સામિ. સચે મે ભગવા બ્યાકરિસ્સતિ – ‘સસ્સતો લોકો’તિ વા ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણા’તિ વા – એવાહં ભગવતિ બ્રહ્મચરિયં ચરિસ્સામિ; નો ચે મે ભગવા બ્યાકરિસ્સતિ – ‘સસ્સતો લોકો’તિ વા ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણા’તિ વા – એવાહં સિક્ખં પચ્ચક્ખાય હીનાયાવત્તિસ્સામી’’તિ.

૧૨૩. અથ ખો આયસ્મા માલુક્યપુત્તો સાયન્હસમયં પટિસલ્લાના વુટ્ઠિતો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા માલુક્યપુત્તો ભગવન્તં એતદવોચ –

૧૨૪. ‘‘ઇધ મય્હં, ભન્તે, રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ – યાનિમાનિ દિટ્ઠિગતાનિ ભગવતા અબ્યાકતાનિ ઠપિતાનિ પટિક્ખિત્તાનિ – ‘સસ્સતો લોકો’તિપિ, ‘અસસ્સતો લોકો’તિપિ…પે… ‘નેવ હોતિ ન ન હોતિ તથાગતો પરં મરણા’તિપિ – તાનિ મે ભગવા ન બ્યાકરોતિ. યાનિ મે ભગવા ન બ્યાકરોતિ તં મે ન રુચ્ચતિ, તં મે નક્ખમતિ. સોહં ભગવન્તં ઉપસઙ્કમિત્વા એતમત્થં પુચ્છિસ્સામિ. સચે મે ભગવા બ્યાકરિસ્સતિ – ‘સસ્સતો લોકો’તિ વા, ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણા’તિ વા – એવાહં ભગવતિ, બ્રહ્મચરિયં ચરિસ્સામિ. નો ચે મે ભગવા બ્યાકરિસ્સતિ – ‘સસ્સતો લોકો’તિ વા, ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણા’તિ વા – એવાહં સિક્ખં પચ્ચક્ખાય હીનાયાવત્તિસ્સામીતિ. સચે ભગવા જાનાતિ – ‘સસ્સતો લોકો’તિ, ‘સસ્સતો લોકો’તિ મે ભગવા બ્યાકરોતુ; સચે ભગવા જાનાતિ – ‘અસસ્સતો લોકો’તિ, ‘અસસ્સતો લોકો’તિ મે ભગવા બ્યાકરોતુ. નો ચે ભગવા જાનાતિ – ‘સસ્સતો લોકો’તિ વા, ‘અસસ્સતો લોકો’તિ વા, અજાનતો ખો પન અપસ્સતો એતદેવ ઉજુકં હોતિ યદિદં – ‘ન જાનામિ, ન પસ્સામી’તિ. સચે ભગવા જાનાતિ – ‘અન્તવા લોકો’તિ, ‘અનન્તવા લોકો’તિ મે ભગવા બ્યાકરોતુ; સચે ભગવા જાનાતિ – ‘અનન્તવા લોકો’તિ, ‘અનન્તવા લોકો’તિ મે ભગવા બ્યાકરોતુ. નો ચે ભગવા જાનાતિ – ‘અન્તવા લોકો’તિ વા, ‘અનન્તવા લોકો’તિ વા, અજાનતો ખો પન અપસ્સતો એતદેવ ઉજુકં હોતિ યદિદં – ‘ન જાનામિ, ન પસ્સામી’તિ. સચે ભગવા જાનાતિ – ‘તં જીવં તં સરીર’ન્તિ, ‘તં જીવં તં સરીર’ન્તિ મે ભગવા બ્યાકરોતુ; સચે ભગવા જાનાતિ – ‘અઞ્ઞં જીવં અઞ્ઞં સરીર’ન્તિ, ‘અઞ્ઞં જીવં અઞ્ઞં સરીર’ન્તિ મે ભગવા બ્યાકરોતુ. નો ચે ભગવા જાનાતિ – ‘તં જીવં તં સરીર’ન્તિ વા, ‘અઞ્ઞં જીવં અઞ્ઞં સરીર’ન્તિ વા, અજાનતો ખો પન અપસ્સતો એતદેવ ઉજુકં હોતિ યદિદં – ‘ન જાનામિ, ન પસ્સામી’તિ. સચે ભગવા જાનાતિ – ‘હોતિ તથાગતો પરં મરણા’તિ, ‘હોતિ તથાગતો પરં મરણા’તિ મે ભગવા બ્યાકરોતુ; સચે ભગવા જાનાતિ – ‘ન હોતિ તથાગતો પરં મરણા’તિ, ‘ન હોતિ તથાગતો પરં મરણા’તિ મે ભગવા બ્યાકરોતુ. નો ચે ભગવા જાનાતિ – ‘હોતિ તથાગતો પરં મરણા’તિ વા, ‘ન હોતિ તથાગતો પરં મરણા’તિ વા, અજાનતો ખો પન અપસ્સતો એતદેવ ઉજુકં હોતિ યદિદં – ‘ન જાનામિ ન પસ્સામી’તિ. સચે ભગવા જાનાતિ – ‘હોતિ ચ ન ચ હોતિ તથાગતો પરં મરણા’તિ, ‘હોતિ ચ ન ચ હોતિ તથાગતો પરં મરણા’તિ મે ભગવા બ્યાકરોતુ; સચે ભગવા જાનાતિ – ‘નેવ હોતિ ન ન હોતિ તથાગતો પરં મરણા’તિ, ‘નેવ હોતિ ન ન હોતિ તથાગતો પરં મરણા’તિ મે ભગવા બ્યાકરોતુ. નો ચે ભગવા જાનાતિ – ‘હોતિ ચ ન ચ હોતિ તથાગતો પરં મરણા’તિ વા, ‘નેવ હોતિ ન ન હોતિ તથાગતો પરં મરણા’તિ વા, અજાનતો ખો પન અપસ્સતો એતદેવ ઉજુકં હોતિ યદિદં – ‘ન જાનામિ, ન પસ્સામી’’’તિ.

૧૨૫. ‘‘કિં નુ [કિં નુ ખો (સ્યા. કં. ક.)] તાહં, માલુક્યપુત્ત, એવં અવચં – ‘એહિ ત્વં, માલુક્યપુત્ત, મયિ બ્રહ્મચરિયં ચર, અહં તે બ્યાકરિસ્સામિ – ‘સસ્સતો લોકો’તિ વા, ‘અસસ્સતો લોકો’તિ વા, ‘અન્તવા લોકો’તિ વા, ‘અનન્તવા લોકો’તિ વા, ‘તં જીવં તં સરીર’ન્તિ વા, ‘અઞ્ઞં જીવં અઞ્ઞં સરીર’ન્તિ વા, ‘હોતિ તથાગતો પરં મરણા’તિ વા, ‘ન હોતિ તથાગતો પરં મરણા’તિ વા, ‘હોતિ ચ ન ચ હોતિ તથાગતો પરં મરણા’તિ વા, ‘નેવ હોતિ ન ન હોતિ તથાગતો પરં મરણા’તિ વા’’તિ? ‘‘નો હેતં, ભન્તે’’. ‘‘ત્વં વા પન મં એવં અવચ – અહં, ભન્તે, ભગવતિ બ્રહ્મચરિયં ચરિસ્સામિ, ભગવા મે બ્યાકરિસ્સતિ – ‘સસ્સતો લોકો’તિ વા, ‘અસસ્સતો લોકો’તિ વા, ‘અન્તવા લોકો’તિ વા, ‘અનન્તવા લોકો’તિ વા, ‘તં જીવં તં સરીર’ન્તિ વા, ‘અઞ્ઞં જીવં અઞ્ઞં સરીર’ન્તિ વા, ‘હોતિ તથાગતો પરં મરણા’તિ વા, ‘ન હોતિ તથાગતો પરં મરણા’તિ વા, ‘હોતિ ચ ન ચ હોતિ તથાગતો પરં મરણા’તિ વા, ‘નેવ હોતિ ન ન હોતિ તથાગતો પરં મરણા’તિ વા’’તિ? ‘‘નો હેતં, ભન્તે’’. ‘‘ઇતિ કિર, માલુક્યપુત્ત, નેવાહં તં વદામિ – એહિ ત્વં, માલુક્યપુત્ત, મયિ બ્રહ્મચરિયં ચર, અહં તે બ્યાકરિસ્સામિ – ‘સસ્સતો લોકો’તિ વા, ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણાતિ વા’તિ; નપિ કિર મં ત્વં વદેસિ – અહં, ભન્તે, ભગવતિ બ્રહ્મચરિયં ચરિસ્સામિ, ભગવા મે બ્યાકરિસ્સતિ – ‘સસ્સતો લોકો’તિ વા ‘અસસ્સતો લોકો’તિ વા…પે… ‘નેવ હોતિ ન ન હોતિ તથાગતો પરં મરણા’તિ વા’’તિ. એવં સન્તે, મોઘપુરિસ, કો સન્તો કં પચ્ચાચિક્ખસિ?

૧૨૬. ‘‘યો ખો, માલુક્યપુત્ત, એવં વદેય્ય – ‘ન તાવાહં ભગવતિ બ્રહ્મચરિયં ચરિસ્સામિ યાવ મે ભગવા ન બ્યાકરિસ્સતિ – ‘‘સસ્સતો લોકો’’તિ વા, ‘‘અસસ્સતો લોકો’’તિ વા…પે… ‘‘નેવ હોતિ ન ન હોતિ તથાગતો પરં મરણા’’તિ વાતિ, અબ્યાકતમેવ તં, માલુક્યપુત્ત, તથાગતેન અસ્સ, અથ સો પુગ્ગલો કાલં કરેય્ય. સેય્યથાપિ, માલુક્યપુત્ત, પુરિસો સલ્લેન વિદ્ધો અસ્સ સવિસેન ગાળ્હપલેપનેન. તસ્સ મિત્તામચ્ચા ઞાતિસાલોહિતા ભિસક્કં સલ્લકત્તં ઉપટ્ઠપેય્યું. સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં પુરિસં જાનામિ યેનમ્હિ વિદ્ધો, ખત્તિયો વા બ્રાહ્મણો વા વેસ્સો વા સુદ્દો વા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં પુરિસં જાનામિ યેનમ્હિ વિદ્ધો, એવંનામો એવંગોત્તો ઇતિ વા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં પુરિસં જાનામિ યેનમ્હિ વિદ્ધો, દીઘો વા રસ્સો વા મજ્ઝિમો વા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં પુરિસં જાનામિ યેનમ્હિ વિદ્ધો, કાળો વા સામો વા મઙ્ગુરચ્છવી વા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં પુરિસં જાનામિ યેનમ્હિ વિદ્ધો, અમુકસ્મિં ગામે વા નિગમે વા નગરે વા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં ધનું જાનામિ યેનમ્હિ વિદ્ધો, યદિ વા ચાપો યદિ વા કોદણ્ડો’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં જિયં જાનામિ યાયમ્હિ વિદ્ધો, યદિ વા અક્કસ્સ યદિ વા સણ્હસ્સ [સણ્ઠસ્સ (સી. સ્યા. કં. પી.)] યદિ વા ન્હારુસ્સ યદિ વા મરુવાય યદિ વા ખીરપણ્ણિનો’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં કણ્ડં જાનામિ યેનમ્હિ વિદ્ધો, યદિ વા ગચ્છં યદિ વા રોપિમ’ન્તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં કણ્ડં જાનામિ યેનમ્હિ વિદ્ધો, યસ્સ પત્તેહિ વાજિતં [વાખિત્તં (ક.)] યદિ વા ગિજ્ઝસ્સ યદિ વા કઙ્કસ્સ યદિ વા કુલલસ્સ યદિ વા મોરસ્સ યદિ વા સિથિલહનુનો’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં કણ્ડં જાનામિ યેનમ્હિ વિદ્ધો, યસ્સ ન્હારુના પરિક્ખિત્તં યદિ વા ગવસ્સ યદિ વા મહિંસસ્સ યદિ વા ભેરવસ્સ [રોરુવસ્સ (સી. સ્યા. કં. પી.)] યદિ વા સેમ્હારસ્સા’તિ; સો એવં વદેય્ય – ‘ન તાવાહં ઇમં સલ્લં આહરિસ્સામિ યાવ ન તં સલ્લં જાનામિ યેનમ્હિ વિદ્ધો, યદિ વા સલ્લં યદિ વા ખુરપ્પં યદિ વા વેકણ્ડં યદિ વા નારાચં યદિ વા વચ્છદન્તં યદિ વા કરવીરપત્ત’ન્તિ – અઞ્ઞાતમેવ તં, માલુક્યપુત્ત, તેન પુરિસેન અસ્સ, અથ સો પુરિસો કાલં કરેય્ય. એવમેવ ખો, માલુક્યપુત્ત, યો એવં વદેય્ય – ‘ન તાવાહં ભગવતિ બ્રહ્મચરિયં ચરિસ્સામિ યાવ મે ભગવા ન બ્યાકરિસ્સતિ – ‘‘સસ્સતો લોકો’’તિ વા ‘‘અસસ્સતો લોકો’’તિ વા…પે… ‘‘નેવ હોતિ ન ન હોતિ તથાગતો પરં મરણા’’તિ વાતિ – અબ્યાકતમેવ તં, માલુક્યપુત્ત, તથાગતેન અસ્સ, અથ સો પુગ્ગલો કાલઙ્કરેય્ય.

૧૨૭. ‘‘‘સસ્સતો લોકો’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવં ‘નો અસસ્સતો લોકો’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવમ્પિ ‘નો સસ્સતો લોકો’તિ વા, માલુક્યપુત્ત, દિટ્ઠિયા સતિ, ‘અસસ્સતો લોકો’તિ વા દિટ્ઠિયા સતિ અત્થેવ જાતિ, અત્થિ જરા, અત્થિ મરણં, સન્તિ સોકપરિદેવદુક્ખદોમનસ્સુપાયાસા; યેસાહં દિટ્ઠેવ ધમ્મે નિઘાતં પઞ્ઞપેમિ. ‘અન્તવા લોકો’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવં ‘નો અનન્તવા લોકો’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવમ્પિ ‘નો અન્તવા લોકો’તિ વા, માલુક્યપુત્ત, દિટ્ઠિયા સતિ, ‘અનન્તવા લોકો’તિ વા દિટ્ઠિયા સતિ અત્થેવ જાતિ, અત્થિ જરા, અત્થિ મરણં, સન્તિ સોકપરિદેવદુક્ખદોમનસ્સુપાયાસા; યેસાહં દિટ્ઠેવ ધમ્મે નિઘાતં પઞ્ઞપેમિ. ‘તં જીવં તં સરીર’ન્તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવં ‘નો અઞ્ઞં જીવં અઞ્ઞં સરીર’ન્તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવમ્પિ ‘નો તં જીવં તં સરીર’ન્તિ વા, માલુક્યપુત્ત, દિટ્ઠિયા સતિ, ‘અઞ્ઞં જીવં અઞ્ઞં સરીર’ન્તિ વા દિટ્ઠિયા સતિ અત્થેવ જાતિ…પે… નિઘાતં પઞ્ઞપેમિ. ‘હોતિ તથાગતો પરં મરણા’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવં ‘નો ન હોતિ તથાગતો પરં મરણા’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવમ્પિ ‘નો હોતિ તથાગતો પરં મરણા’તિ વા, માલુક્યપુત્ત, દિટ્ઠિયા સતિ, ‘ન હોતિ તથાગતો પરં મરણા’તિ વા દિટ્ઠિયા સતિ અત્થેવ જાતિ…પે… યેસાહં દિટ્ઠેવ ધમ્મે નિઘાતં પઞ્ઞપેમિ. ‘હોતિ ચ ન ચ હોતિ તથાગતો પરં મરણા’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવં ‘નો નેવ હોતિ ન ન હોતિ તથાગતો પરં મરણા’તિ, માલુક્યપુત્ત, દિટ્ઠિયા સતિ બ્રહ્મચરિયવાસો અભવિસ્સાતિ, એવમ્પિ ‘નો હોતિ ચ ન ચ હોતિ તથાગતો પરં મરણા’તિ, માલુક્યપુત્ત, દિટ્ઠિયા સતિ, ‘નેવ હોતિ ન ન હોતિ તથાગતો પરં મરણા’તિ વા દિટ્ઠિયા સતિ અત્થેવ જાતિ…પે… યેસાહં દિટ્ઠેવ ધમ્મે નિઘાતં પઞ્ઞપેમિ.

૧૨૮. ‘‘તસ્માતિહ, માલુક્યપુત્ત, અબ્યાકતઞ્ચ મે અબ્યાકતતો ધારેથ; બ્યાકતઞ્ચ મે બ્યાકતતો ધારેથ. કિઞ્ચ, માલુક્યપુત્ત, મયા અબ્યાકતં? ‘સસ્સતો લોકો’તિ માલુક્યપુત્ત, મયા અબ્યાકતં; ‘અસસ્સતો લોકો’તિ – મયા અબ્યાકતં; ‘અન્તવા લોકો’તિ – મયા અબ્યાકતં; ‘અનન્તવા લોકો’તિ – મયા અબ્યાકતં; ‘તં જીવં તં સરીર’ન્તિ – મયા અબ્યાકતં; ‘અઞ્ઞં જીવં અઞ્ઞં સરીર’ન્તિ – મયા અબ્યાકતં; ‘હોતિ તથાગતો પરં મરણા’તિ – મયા અબ્યાકતં; ‘ન હોતિ તથાગતો પરં મરણા’તિ – મયા અબ્યાકતં; ‘હોતિ ચ ન ચ હોતિ તથાગતો પરં મરણા’તિ – મયા અબ્યાકતં; ‘નેવ હોતિ ન ન હોતિ તથાગતો પરં મરણા’તિ – મયા અબ્યાકતં. કસ્મા ચેતં, માલુક્યપુત્ત, મયા અબ્યાકતં? ન હેતં, માલુક્યપુત્ત, અત્થસંહિતં ન આદિબ્રહ્મચરિયકં ન [નેતં (સી.)] નિબ્બિદાય ન વિરાગાય ન નિરોધાય ન ઉપસમાય ન અભિઞ્ઞાય ન સમ્બોધાય ન નિબ્બાનાય સંવત્તતિ. તસ્મા તં મયા અબ્યાકતં. કિઞ્ચ, માલુક્યપુત્ત, મયા બ્યાકતં? ‘ઇદં દુક્ખ’ન્તિ, માલુક્યપુત્ત, મયા બ્યાકતં; ‘અયં દુક્ખસમુદયો’તિ – મયા બ્યાકતં; ‘અયં દુક્ખનિરોધો’તિ – મયા બ્યાકતં; ‘અયં દુક્ખનિરોધગામિની પટિપદા’તિ – મયા બ્યાકતં. કસ્મા ચેતં, માલુક્યપુત્ત, મયા બ્યાકતં? એતઞ્હિ, માલુક્યપુત્ત, અત્થસંહિતં એતં આદિબ્રહ્મચરિયકં નિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતિ. તસ્મા તં મયા બ્યાકતં. તસ્માતિહ, માલુક્યપુત્ત, અબ્યાકતઞ્ચ મે અબ્યાકતતો ધારેથ; બ્યાકતઞ્ચ મે બ્યાકતતો ધારેથા’’તિ.

ઇદમવોચ ભગવા. અત્તમનો આયસ્મા માલુક્યપુત્તો ભગવતો ભાસિતં અભિનન્દીતિ.

ચૂળમાલુક્યસુત્તં નિટ્ઠિતં તતિયં.