૭. કણ્ડકવિમાનવત્થુ

૧૧૭૧. ‘‘પુણ્ણમાસે યથા ચન્દો, નક્ખત્તપરિવારિતો;

સમન્તા અનુપરિયાતિ, તારકાધિપતી સસી.

૧૧૭૨. ‘‘તથૂપમં ઇદં બ્યમ્હં, દિબ્બં દેવપુરમ્હિ ચ;

અતિરોચતિ વણ્ણેન, ઉદયન્તોવ રંસિમા.

૧૧૭૩. ‘‘વેળુરિયસુવણ્ણસ્સ, ફલિકા રૂપિયસ્સ ચ;

મસારગલ્લમુત્તાહિ, લોહિતઙ્ગમણીહિ ચ.

૧૧૭૪. ‘‘ચિત્રા મનોરમા ભૂમિ, વેળૂરિયસ્સ સન્થતા;

કૂટાગારા સુભા રમ્મા, પાસાદો તે સુમાપિતો.

૧૧૭૫. ‘‘રમ્મા ચ તે પોક્ખરણી, પુથુલોમનિસેવિતા;

અચ્છોદકા વિપ્પસન્ના, સોવણ્ણવાલુકસન્થતા.

૧૧૭૬. ‘‘નાનાપદુમસઞ્છન્ના, પુણ્ડરીકસમોતતા [સમોત્થતા (ક.), સમોગતા (સ્યા.)];

સુરભિં સમ્પવાયન્તિ, મનુઞ્ઞા માલુતેરિતા.

૧૧૭૭. ‘‘તસ્સા તે ઉભતો પસ્સે, વનગુમ્બા સુમાપિતા;

ઉપેતા પુપ્ફરુક્ખેહિ, ફલરુક્ખેહિ ચૂભયં.

૧૧૭૮. ‘‘સોવણ્ણપાદે પલ્લઙ્કે, મુદુકે ગોણકત્થતે [ચોલસન્થતે (સી.)];

નિસિન્નં દેવરાજંવ, ઉપતિટ્ઠન્તિ અચ્છરા.

૧૧૭૯. ‘‘સબ્બાભરણસઞ્છન્ના, નાનામાલાવિભૂસિતા;

રમેન્તિ તં મહિદ્ધિકં, વસવત્તીવ મોદસિ.

૧૧૮૦. ‘‘ભેરિસઙ્ખમુદિઙ્ગાહિ, વીણાહિ પણવેહિ ચ;

રમસિ રતિસમ્પન્નો, નચ્ચગીતે સુવાદિતે.

૧૧૮૧. ‘‘દિબ્બા તે વિવિધા રૂપા, દિબ્બા સદ્દા અથો રસા;

ગન્ધા ચ તે અધિપ્પેતા, ફોટ્ઠબ્બા ચ મનોરમા.

૧૧૮૨. ‘‘તસ્મિં વિમાને પવરે, દેવપુત્ત મહપ્પભો;

અતિરોચસિ વણ્ણેન, ઉદયન્તોવ ભાણુમા.

૧૧૮૩. ‘‘દાનસ્સ તે ઇદં ફલં, અથો સીલસ્સ વા પન;

અથો અઞ્જલિકમ્મસ્સ, તં મે અક્ખાહિ પુચ્છિતો’’.

૧૧૮૪. સો દેવપુત્તો અત્તમનો…પે… યસ્સ કમ્મસ્સિદં ફલં.

૧૧૮૫. ‘‘અહં કપિલવત્થુસ્મિં, સાકિયાનં પુરુત્તમે;

સુદ્ધોદનસ્સ પુત્તસ્સ, કણ્ડકો સહજો અહં.

૧૧૮૬. ‘‘યદા સો અડ્ઢરત્તાયં, બોધાય મભિનિક્ખમિ;

સો મં મુદૂહિ પાણીહિ, જાલિ [જાલ (સી.)] તમ્બનખેહિ ચ.

૧૧૮૭. ‘‘સત્થિં આકોટયિત્વાન, વહ સમ્માતિ ચબ્રવિ;

અહં લોકં તારયિસ્સં, પત્તો સમ્બોધિમુત્તમં.

૧૧૮૮. ‘‘તં મે ગિરં સુણન્તસ્સ, હાસો મે વિપુલો અહુ;

ઉદગ્ગચિત્તો સુમનો, અભિસીસિં [અભિસિંસિં (સી.), અભિસીસિ (પી.)] તદા અહં.

૧૧૮૯. ‘‘અભિરૂળ્હઞ્ચ મં ઞત્વા, સક્યપુત્તં મહાયસં;

ઉદગ્ગચિત્તો મુદિતો, વહિસ્સં પુરિસુત્તમં.

૧૧૯૦. ‘‘પરેસં વિજિતં ગન્ત્વા, ઉગ્ગતસ્મિં દિવાકરે [દિવઙ્કરે (સ્યા. ક.)];

મમં છન્નઞ્ચ ઓહાય, અનપેક્ખો સો અપક્કમિ.

૧૧૯૧. ‘‘તસ્સ તમ્બનખે પાદે, જિવ્હાય પરિલેહિસં;

ગચ્છન્તઞ્ચ મહાવીરં, રુદમાનો ઉદિક્ખિસં.

૧૧૯૨. ‘‘અદસ્સનેનહં તસ્સ, સક્યપુત્તસ્સ સિરીમતો;

અલત્થં ગરુકાબાધં, ખિપ્પં મે મરણં અહુ.

૧૧૯૩. ‘‘તસ્સેવ આનુભાવેન, વિમાનં આવસામિદં;

સબ્બકામગુણોપેતં, દિબ્બં દેવપુરમ્હિ ચ.

૧૧૯૪. ‘‘યઞ્ચ મે અહુવા હાસો, સદ્દં સુત્વાન બોધિયા;

તેનેવ કુસલમૂલેન, ફુસિસ્સં આસવક્ખયં.

૧૧૯૫. ‘‘સચે હિ ભન્તે ગચ્છેય્યાસિ, સત્થુ બુદ્ધસ્સ સન્તિકે;

મમાપિ નં વચનેન, સિરસા વજ્જાસિ વન્દનં.

૧૧૯૬. ‘‘અહમ્પિ દટ્ઠું ગચ્છિસ્સં, જિનં અપ્પટિપુગ્ગલં;

દુલ્લભં દસ્સનં હોતિ, લોકનાથાન તાદિન’’ન્તિ.

૧૧૯૭. સો કતઞ્ઞૂ કતવેદી, સત્થારં ઉપસઙ્કમિ;

સુત્વા ગિરં ચક્ખુમતો, ધમ્મચક્ખું વિસોધયિ.

૧૧૯૮. વિસોધેત્વા દિટ્ઠિગતં, વિચિકિચ્છં વતાનિ ચ;

વન્દિત્વા સત્થુનો પાદે, તત્થેવન્તરધાયથાતિ [તત્થેવન્તરધાયતીતિ (ક.)].

કણ્ડકવિમાનં સત્તમં.