૪. સુવણ્ણવિમાનવત્થુ

૧૧૩૪. ‘‘સોવણ્ણમયે પબ્બતસ્મિં, વિમાનં સબ્બતોપભં;

હેમજાલપટિચ્છન્નં [હેમજાલકપચ્છન્નં (સી.)], કિઙ્કિણિ [કિઙ્કણિક (સ્યા. ક.), કિઙ્કિણિક (પી.)] જાલકપ્પિતં.

૧૧૩૫. ‘‘અટ્ઠંસા સુકતા થમ્ભા, સબ્બે વેળુરિયામયા;

એકમેકાય અંસિયા, રતના સત્ત નિમ્મિતા.

૧૧૩૬. ‘‘વેળુરિયસુવણ્ણસ્સ, ફલિકા રૂપિયસ્સ ચ;

મસારગલ્લમુત્તાહિ, લોહિતઙ્ગમણીહિ ચ.

૧૧૩૭. ‘‘ચિત્રા મનોરમા ભૂમિ, ન તત્થુદ્ધંસતી રજો;

ગોપાણસીગણા પીતા, કૂટં ધારેન્તિ નિમ્મિતા.

૧૧૩૮. ‘‘સોપાણાનિ ચ ચત્તારિ, નિમ્મિતા ચતુરો દિસા;

નાનારતનગબ્ભેહિ, આદિચ્ચોવ વિરોચતિ.

૧૧૩૯. ‘‘વેદિયા ચતસ્સો તત્થ, વિભત્તા ભાગસો મિતા;

દદ્દલ્લમાના આભન્તિ, સમન્તા ચતુરો દિસા.

૧૧૪૦. ‘‘તસ્મિં વિમાને પવરે, દેવપુત્તો મહપ્પભો;

અતિરોચસિ વણ્ણેન, ઉદયન્તોવ ભાણુમા.

૧૧૪૧. ‘‘દાનસ્સ તે ઇદં ફલં, અથો સીલસ્સ વા પન;

અથો અઞ્જલિકમ્મસ્સ, તં મે અક્ખાહિ પુચ્છિતો’’.

૧૧૪૨. સો દેવપુત્તો અત્તમનો…પે… યસ્સ કમ્મસ્સિદં ફલં.

૧૧૪૩. ‘‘અહં અન્ધકવિન્દસ્મિં, બુદ્ધસ્સાદિચ્ચબન્ધુનો;

વિહારં સત્થુ કારેસિં, પસન્નો સેહિ પાણિભિ.

૧૧૪૪. ‘‘તત્થ ગન્ધઞ્ચ માલઞ્ચ, પચ્ચયઞ્ચ [પચ્ચગ્ગઞ્ચ (સી.), પચ્ચગ્ઘઞ્ચ (?)] વિલેપનં;

વિહારં સત્થુ અદાસિં, વિપ્પસન્નેન ચેતસા;

તેન મય્હં ઇદં લદ્ધં, વસં વત્તેમિ નન્દને.

૧૧૪૫. ‘‘નન્દને ચ વને [નન્દને પવને (સી. સ્યા.)] રમ્મે, નાનાદિજગણાયુતે;

રમામિ નચ્ચગીતેહિ, અચ્છરાહિ પુરક્ખતો’’તિ.

સુવણ્ણવિમાનં ચતુત્થં.