૯. પીતવિમાનવત્થુ

૭૯૫. ‘‘પીતવત્થે પીતધજે, પીતાલઙ્કારભૂસિતે;

પીતચન્દનલિત્તઙ્ગે, પીતઉપ્પલમાલિની [પીતુપ્પલમધારિની (સ્યા. ક.), પીતુપ્પલમાલિની (પી.)].

૭૯૬. ‘‘પીતપાસાદસયને, પીતાસને પીતભાજને;

પીતછત્તે પીતરથે, પીતસ્સે પીતબીજને.

૭૯૭. ‘‘કિં કમ્મમકરી ભદ્દે, પુબ્બે માનુસકે ભવે;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૭૯૮. ‘‘કોસાતકી નામ લતત્થિ ભન્તે, તિત્તિકા અનભિચ્છિતા;

તસ્સા ચત્તારિ પુપ્ફાનિ, થૂપં અભિહરિં અહં.

૭૯૯. ‘‘સત્થુ સરીરમુદ્દિસ્સ, વિપ્પસન્નેન ચેતસા;

નાસ્સ મગ્ગં અવેક્ખિસ્સં, ન તગ્ગમનસા [તદગ્ગમનસા (સી.), તદઙ્ગમનસા (સ્યા.)] સતી.

૮૦૦. ‘‘તતો મં અવધી ગાવી, થૂપં અપત્તમાનસં;

તઞ્ચાહં અભિસઞ્ચેય્યં, ભિય્યો [ભીયો (સી. અટ્ઠ.)] નૂન ઇતો સિયા.

૮૦૧. ‘‘તેન કમ્મેન દેવિન્દ, મઘવા દેવકુઞ્જરો;

પહાય માનુસં દેહં, તવ સહબ્ય [સહબ્યત (સી. સ્યા.)] માગતા’’તિ.

૮૦૨. ઇદં સુત્વા તિદસાધિપતિ, મઘવા દેવકુઞ્જરો;

તાવતિંસે પસાદેન્તો, માતલિં એતદબ્રવિ [એતદબ્રૂવીતિ (સી.)].

૮૦૩. ‘‘પસ્સ માતલિ અચ્છેરં, ચિત્તં કમ્મફલં ઇદં;

અપ્પકમ્પિ કતં દેય્યં, પુઞ્ઞં હોતિ મહપ્ફલં.

૮૦૪. ‘‘નત્થિ ચિત્તે પસન્નમ્હિ, અપ્પકા નામ દક્ખિણા;

તથાગતે વા સમ્બુદ્ધે, અથ વા તસ્સ સાવકે.

૮૦૫. ‘‘એહિ માતલિ અમ્હેપિ, ભિય્યો ભિય્યો મહેમસે;

તથાગતસ્સ ધાતુયો, સુખો પુઞ્ઞાન મુચ્ચયો.

૮૦૬. ‘‘તિટ્ઠન્તે નિબ્બુતે ચાપિ, સમે ચિત્તે સમં ફલં;

ચેતોપણિધિહેતુ હિ, સત્તા ગચ્છન્તિ સુગ્ગતિં.

૮૦૭. ‘‘બહૂનં [બહુન્નં (સી. સ્યા.)] વત અત્થાય, ઉપ્પજ્જન્તિ તથાગતા;

યત્થ કારં કરિત્વાન, સગ્ગં ગચ્છન્તિ દાયકા’’તિ.

પીતવિમાનં નવમં.