૩. નાગવિમાનવત્થુ

૭૦૫. ‘‘અલઙ્કતા મણિકઞ્ચનાચિતં, સોવણ્ણજાલચિતં મહન્તં;

અભિરુય્હ ગજવરં સુકપ્પિતં, ઇધાગમા વેહાયસં [વેહાસયં (સી.)] અન્તલિક્ખે.

૭૦૬. ‘‘નાગસ્સ દન્તેસુ દુવેસુ નિમ્મિતા, અચ્છોદકા [અચ્છોદિકા (સી. ક.)] પદુમિનિયો સુફુલ્લા;

પદુમેસુ ચ તુરિયગણા પભિજ્જરે, ઇમા ચ નચ્ચન્તિ મનોહરાયો.

૭૦૭. ‘‘દેવિદ્ધિપત્તાસિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૭૦૮. ‘‘બારાણસિયં ઉપસઙ્કમિત્વા, બુદ્ધસ્સહં વત્થયુગં અદાસિં;

પાદાનિ વન્દિત્વા [વન્દિત્વ (સી.)] છમા નિસીદિં, વિત્તા ચહં અઞ્જલિકં અકાસિં.

૭૦૯. ‘‘બુદ્ધો ચ મે કઞ્ચનસન્નિભત્તચો, અદેસયિ સમુદયદુક્ખનિચ્ચતં;

અસઙ્ખતં દુક્ખનિરોધસસ્સતં, મગ્ગં અદેસયિ [અદેસેસિ (સી.)] યતો વિજાનિસં;

૭૧૦. ‘‘અપ્પાયુકી કાલકતા તતો ચુતા, ઉપપન્ના તિદસગણં યસસ્સિની;

સક્કસ્સહં અઞ્ઞતરા પજાપતિ, યસુત્તરા નામ દિસાસુ વિસ્સુતા’’તિ.

નાગવિમાનં તતિયં.