૧૨. રજ્જુમાલાવિમાનવત્થુ

૮૨૬. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

હત્થપાદે ચ વિગ્ગય્હ, નચ્ચસિ સુપ્પવાદિતે.

૮૨૭. ‘‘તસ્સા તે નચ્ચમાનાય, અઙ્ગમઙ્ગેહિ સબ્બસો;

દિબ્બા સદ્દા નિચ્છરન્તિ, સવનીયા મનોરમા.

૮૨૮. ‘‘તસ્સા તે નચ્ચમાનાય, અઙ્ગમઙ્ગેહિ સબ્બસો;

દિબ્બા ગન્ધા પવાયન્તિ, સુચિગન્ધા મનોરમા.

૮૨૯. ‘‘વિવત્તમાના કાયેન, યા વેણીસુ પિળન્ધના;

તેસં સુય્યતિ નિગ્ઘોસો, તુરિયે પઞ્ચઙ્ગિકે યથા.

૮૩૦. ‘‘વટંસકા વાતધુતા, વાતેન સમ્પકમ્પિતા;

તેસં સુય્યતિ નિગ્ઘોસો, તુરિયે પઞ્ચઙ્ગિકે યથા.

૮૩૧. ‘‘યાપિ તે સિરસ્મિં માલા, સુચિગન્ધા મનોરમા;

વાતિ ગન્ધો દિસા સબ્બા, રુક્ખો મઞ્જૂસકો યથા.

૮૩૨. ‘‘ઘાયસે તં સુચિગન્ધં, રૂપં પસ્સસિ અમાનુસં;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૮૩૩. ‘‘દાસી અહં પુરે આસિં, ગયાયં બ્રાહ્મણસ્સહં;

અપ્પપુઞ્ઞા અલક્ખિકા, રજ્જુમાલાતિ મં વિદું [વિદૂ (સ્યા. પી. ક.)].

૮૩૪. ‘‘અક્કોસાનં વધાનઞ્ચ, તજ્જનાય ચ ઉગ્ગતા [ઉક્કતા (સી. સ્યા.)];

કુટં ગહેત્વા નિક્ખમ્મ, અગઞ્છિં [આગચ્છિં (સ્યા. ક.), અગચ્છિં (પી.), ગચ્છિં (સી.)] ઉદહારિયા [ઉદકહારિયા (સી.)].

૮૩૫. ‘‘વિપથે કુટં નિક્ખિપિત્વા, વનસણ્ડં ઉપાગમિં;

ઇધેવાહં મરિસ્સામિ, કો અત્થો [ક્વત્થોસિ (ક.), કીવત્થોપિ (સ્યા.)] જીવિતેન મે.

૮૩૬. ‘‘દળ્હં પાસં કરિત્વાન, આસુમ્ભિત્વાન પાદપે;

તતો દિસા વિલોકેસિં,કો નુ ખો વનમસ્સિતો.

૮૩૭. ‘‘તત્થદ્દસાસિં સમ્બુદ્ધં, સબ્બલોકહિતં મુનિં;

નિસિન્નં રુક્ખમૂલસ્મિં, ઝાયન્તં અકુતોભયં.

૮૩૮. ‘‘તસ્સા મે અહુ સંવેગો, અબ્ભુતો લોમહંસનો;

કો નુ ખો વનમસ્સિતો, મનુસ્સો ઉદાહુ દેવતા.

૮૩૯. ‘‘પાસાદિકં પસાદનીયં, વના નિબ્બનમાગતં;

દિસ્વા મનો મે પસીદિ, નાયં યાદિસકીદિસો.

૮૪૦. ‘‘ગુત્તિન્દ્રિયો ઝાનરતો, અબહિગ્ગતમાનસો;

હિતો સબ્બસ્સ લોકસ્સ, બુદ્ધો અયં [સોયં (સી.)] ભવિસ્સતિ.

૮૪૧. ‘‘ભયભેરવો દુરાસદો, સીહોવ ગુહમસ્સિતો;

દુલ્લભાયં દસ્સનાય, પુપ્ફં ઓદુમ્બરં યથા.

૮૪૨. ‘‘સો મં મુદૂહિ વાચાહિ, આલપિત્વા તથાગતો;

રજ્જુમાલેતિ મંવોચ, સરણં ગચ્છ તથાગતં.

૮૪૩. ‘‘તાહં ગિરં સુણિત્વાન, નેલં અત્થવતિં સુચિં;

સણ્હં મુદુઞ્ચ વગ્ગુઞ્ચ, સબ્બસોકાપનૂદનં.

૮૪૪. ‘‘કલ્લચિત્તઞ્ચ મં ઞત્વા, પસન્નં સુદ્ધમાનસં;

હિતો સબ્બસ્સ લોકસ્સ, અનુસાસિ તથાગતો.

૮૪૫. ‘‘ઇદં દુક્ખન્તિ મંવોચ, અયં દુક્ખસ્સ સમ્ભવો;

દુક્ખ [અયં (સી. સ્યા. પી.)] નિરોધો મગ્ગો ચ [દુક્ખનિરોધો ચ (સ્યા.)], અઞ્જસો અમતોગધો.

૮૪૬. ‘‘અનુકમ્પકસ્સ કુસલસ્સ, ઓવાદમ્હિ અહં ઠિતા;

અજ્ઝગા અમતં સન્તિં, નિબ્બાનં પદમચ્ચુતં.

૮૪૭. ‘‘સાહં અવટ્ઠિતાપેમા, દસ્સને અવિકમ્પિની;

મૂલજાતાય સદ્ધાય, ધીતા બુદ્ધસ્સ ઓરસા.

૮૪૮. ‘‘સાહં રમામિ કીળામિ, મોદામિ અકુતોભયા;

દિબ્બમાલં ધારયામિ, પિવામિ મધુમદ્દવં.

૮૪૯. ‘‘સટ્ઠિતુરિયસહસ્સાનિ, પટિબોધં કરોન્તિ મે;

આળમ્બો ગગ્ગરો ભીમો, સાધુવાદી ચ સંસયો.

૮૫૦. ‘‘પોક્ખરો ચ સુફસ્સો ચ, વીણામોક્ખા ચ નારિયો;

નન્દા ચેવ સુનન્દા ચ, સોણદિન્ના સુચિમ્હિતા.

૮૫૧. ‘‘અલમ્બુસા મિસ્સકેસી ચ, પુણ્ડરીકાતિદારુણી [… તિચારુણી (સી.)];

એણીફસ્સા સુફસ્સા [સુપસ્સા (સ્યા. પી. ક.)] ચ, સુભદ્દા [સંભદ્દા (ક.)] મુદુવાદિની.

૮૫૨. ‘‘એતા ચઞ્ઞા ચ સેય્યાસે, અચ્છરાનં પબોધિકા;

તા મં કાલેનુપાગન્ત્વા, અભિભાસન્તિ દેવતા.

૮૫૩. ‘‘હન્દ નચ્ચામ ગાયામ, હન્દ તં રમયામસે;

નયિદં અકતપુઞ્ઞાનં, કતપુઞ્ઞાનમેવિદં.

૮૫૪. ‘‘અસોકં નન્દનં રમ્મં, તિદસાનં મહાવનં;

સુખં અકતપુઞ્ઞાનં, ઇધ નત્થિ પરત્થ ચ.

૮૫૫. ‘‘સુખઞ્ચ કતપુઞ્ઞાનં, ઇધ ચેવ પરત્થ ચ;

તેસં સહબ્યકામાનં, કત્તબ્બં કુસલં બહું;

કતપુઞ્ઞા હિ મોદન્તિ, સગ્ગે ભોગસમઙ્ગિનો.

૮૫૬. ‘‘બહૂનં વત અત્થાય, ઉપ્પજ્જન્તિ તથાગતા;

દક્ખિણેય્યા મનુસ્સાનં, પુઞ્ઞખેત્તાનમાકરા;

યત્થ કારં કરિત્વાન, સગ્ગે મોદન્તિ દાયકા’’તિ.

રજ્જુમાલાવિમાનં દ્વાદસમં.

મઞ્જિટ્ઠકવગ્ગો ચતુત્થો નિટ્ઠિતો.

તસ્સુદ્દાનં –

મઞ્જિટ્ઠા પભસ્સરા નાગા, અલોમાકઞ્જિકદાયિકા;

વિહારચતુરિત્થમ્બા, પીતા ઉચ્છુવન્દનરજ્જુમાલા ચ;

વગ્ગો તેન પવુચ્ચતીતિ.

ઇત્થિવિમાનં સમત્તં.