૧. મઞ્જિટ્ઠકવિમાનવત્થુ

૬૮૯. ‘‘મઞ્જિટ્ઠકે [મઞ્જેટ્ઠકે (સી.)] વિમાનસ્મિં, સોણ્ણવાલુકસન્થતે [સોવણ્ણવાલુકસન્થતે (સ્યા. પી.), સોવણ્ણવાલિકસન્થતે (ક.)];

પઞ્ચઙ્ગિકે તુરિયેન [તુરિયેન (સી. સ્યા. પી.)], રમસિ સુપ્પવાદિતે.

૬૯૦. ‘‘તમ્હા વિમાના ઓરુય્હ, નિમ્મિતા રતનામયા;

ઓગાહસિ સાલવનં, પુપ્ફિતં સબ્બકાલિકં.

૬૯૧. ‘‘યસ્સ યસ્સેવ સાલસ્સ, મૂલે તિટ્ઠસિ દેવતે;

સો સો મુઞ્ચતિ પુપ્ફાનિ, ઓનમિત્વા દુમુત્તમો.

૬૯૨. ‘‘વાતેરિતં સાલવનં, આધુતં [આધૂતં (સી.)] દિજસેવિતં;

વાતિ ગન્ધો દિસા સબ્બા, રુક્ખો મઞ્જૂસકો યથા.

૬૯૩. ‘‘ઘાયસે તં સુચિગન્ધં, રૂપં પસ્સસિ અમાનુસં;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૬૯૪. ‘‘અહં મનુસ્સેસુ મનુસ્સભૂતા, દાસી અયિરકુલે [અય્યિરકુલે (સ્યા. ક.)] અહું;

બુદ્ધં નિસિન્નં દિસ્વાન, સાલપુપ્ફેહિ ઓકિરિં.

૬૯૫. ‘‘વટંસકઞ્ચ સુકતં, સાલપુપ્ફમયં અહં;

બુદ્ધસ્સ ઉપનામેસિં, પસન્ના સેહિ પાણિભિ.

૬૯૬. ‘‘તાહં કમ્મં કરિત્વાન, કુસલં બુદ્ધવણ્ણિતં;

અપેતસોકા સુખિતા, સમ્પમોદામનામયા’’તિ.

મઞ્જિટ્ઠકવિમાનં પઠમં.