૭. ઉપોસથાવિમાનવત્થુ

૨૨૯. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૨૩૦. ‘‘કેન તેતાદિસો વણ્ણો…પે…

વણ્ણો ચ તે સબ્બદિસા પભાસતી’’તિ.

૨૩૨. સા દેવતા અત્તમના…પે… યસ્સ કમ્મસ્સિદં ફલં.

૨૩૩. ‘‘ઉપોસથાતિ મં અઞ્ઞંસુ, સાકેતાયં ઉપાસિકા;

સદ્ધા સીલેન સમ્પન્ના, સંવિભાગરતા સદા.

૨૩૪. ‘‘અચ્છાદનઞ્ચ ભત્તઞ્ચ, સેનાસનં પદીપિયં;

અદાસિં ઉજુભૂતેસુ, વિપ્પસન્નેન ચેતસા.

૨૩૫. ‘‘ચાતુદ્દસિં પઞ્ચદસિં, યા ચ પક્ખસ્સ અટ્ઠમી;

પાટિહારિયપક્ખઞ્ચ, અટ્ઠઙ્ગસુસમાગતં.

૨૩૬. ‘‘ઉપોસથં ઉપવસિસ્સં, સદા સીલેસુ સંવુતા;

સઞ્ઞમા સંવિભાગા ચ, વિમાનં આવસામહં.

૨૩૭. ‘‘પાણાતિપાતા વિરતા, મુસાવાદા ચ સઞ્ઞતા;

થેય્યા ચ અતિચારા ચ, મજ્જપાના ચ આરકા.

૨૩૮. ‘‘પઞ્ચસિક્ખાપદે રતા, અરિયસચ્ચાન કોવિદા;

ઉપાસિકા ચક્ખુમતો, ગોતમસ્સ યસસ્સિનો.

૨૩૯. ‘‘તેન મેતાદિસો વણ્ણો…પે…

વણ્ણો ચ મે સબ્બદિસા પભાસતી’’તિ.

૨૪૧. ‘‘અભિક્ખણં નન્દનં સુત્વા, છન્દો મે ઉદપજ્જથ [ઉપપજ્જથ (બહૂસુ)];

તત્થ ચિત્તં પણિધાય, ઉપપન્નમ્હિ નન્દનં.

૨૪૨. ‘‘નાકાસિં સત્થુ વચનં, બુદ્ધસ્સાદિચ્ચબન્ધુનો;

હીને ચિત્તં પણિધાય, સામ્હિ પચ્છાનુતાપિની’’તિ.

૨૪૩. ‘‘કીવ ચિરં વિમાનમ્હિ, ઇધ વચ્છસુપોસથે [વસ્સસુપોસથે (સી.)];

દેવતે પુચ્છિતાચિક્ખ, યદિ જાનાસિ આયુનો’’તિ.

૨૪૪. ‘‘સટ્ઠિવસ્સસહસ્સાનિ [સટ્ઠિ સતસહસ્સાનિ (?)], તિસ્સો ચ વસ્સકોટિયો;

ઇધ ઠત્વા મહામુનિ, ઇતો ચુતા ગમિસ્સામિ;

મનુસ્સાનં સહબ્યત’’ન્તિ.

૨૪૫. ‘‘મા ત્વં ઉપોસથે ભાયિ, સમ્બુદ્ધેનાસિ બ્યાકતા;

સોતાપન્ના વિસેસયિ, પહીના તવ દુગ્ગતી’’તિ.

ઉપોસથાવિમાનં સત્તમં.